Nriran ofolek ebi Babilọn
21
Eyi ìre nriran ofolek Babilọn:aIke egwijo okigbugbọ iraka inin̄ agan̄ osiki,
ikeya ke ùrioon̄ okinan̄a me emen èwê,
me lek ijọn̄ ebi ìkup ukpook ukpook, inu.
2 Nriran òkup uyọt uyọt ke ejeen̄ emi:
Ogwu òkileke ene ifiin̄ òkileke ene ifiin̄,
ogwu òkifum inu ene òkifum inu ene.
Enyi ebi Elam, ìjibi akọn̄ ìgọọk!
Enyi ebi Midia, ìkpa mbin akọn̄ ìkana!
Otutuuk mfi ebi ido cha ekito me irak ubọk ebi Babilọn,
emi mârọ ibe ifieek.
3 Eya orọ, unaan̄ îfan̄a emi ebon,
ufiak ìsoso emi lek,
kubọk ufiak nwa-owot uman okitet.
Etip nnọbe îran emi lek,
inu mmun̄be îgọm emi uga.
4 Ejit n̄a îwulu,
ukpook înin̄ ijot emi lek,
ufit-egwe nkiweweek,
îkana inu ukpook inyi emi.
5 Mînen̄e ikasi ijọk isun̄,
mè iwele ute igwook,
mè ikweek irek ikirie, mè ikinwọ!
Enyi ebi ibot, ìnan̄a ikeke,
mè ìgwook aran̄ me lek agbọ, ìbem lek akọn̄!
6 Mije, Ogwukaan̄-ene ìtumu inyi emi ibe ikeyi:
“Je si do ogwu mbem;
inu geelek îmun̄be, itumu!
7 Mgbọ ọmọ isimun̄ uji akọn̄,
mè imun̄ inyinya okije iba iba mè ene me inyọn̄,
mè imun̄ si ebi ìkikọp inyinya akpan,
mè ebi ìkikọp aligọ,
ọmọ igwọk chieen̄,
iriọọn̄ ubọk igwọk chieen̄.”
8 Ogwu mbem ya onenitaan̄ ukpo kubọk egbe àtat ibe,
“ ‘Ogwu nte, ikarek usen geelek
emi ǹkikekeke me mbem me uwu-oket,
otutuuk eririeen̄ geelek
ǹkikukup me irek ikwaan̄ n̄a.
9 Kpọ, ene ge òkinu me uji akọn̄
eyi inyinya iba okitaba ije!’
Inenifọọk otu ibe,
‘Babilọn îrọn̄, îrọn̄!
Otutuuk mkpọmfaka awaji kiban̄
îkpukpuku ita me ijọn̄.’ ”
10 Jei ebi kiji, ebi ekpukpukube igwook,
ebi ekọkbe iriọk kubọk ekikọk akpa,
inu nnọbe Okumugwem Ogwukaan̄ Inyọn̄ mè Ijọn̄,
Awaji ebi Ijeren otumube,
ọmọ ke mkpa inyi enyi.
Nriran ofolek ebi Edọm
11 Eyi ìre nriran ofolek Duma:b
Ene ge okup me Seya ikigwen emi ibe,
“Ogwu mbem, ìre eririeen̄ ìje ire owa?
Ogwu mbem, ìre eririeen̄ ìje ire owa?”
12 Ogwu mbem ofọfọọk ibe,
“Ewelegwe îra inunu, eririeen̄ si òkinu.
Ire enyi iweek idodo ikọ, ìdo;
ìkpọk ìgwu ìkom ìna ìnido.”
Nriran ofolek ebi Arebia
13 Eyi ìre nriran ofolek ebi Arebia:
Enyi ogbo ebi ije inyọn̄ aligọ ebi ìnan̄a me Dedan,
emen oron Arebia ke enyi ebegba ilaak.
14 Enyi ebi ìluk me lek ijọn̄ Teyima,
ìsa mudim ìje ìsibi ìkweek ebi ebek orakbe,
ìsa inorie ìninyi ebi mkpat akọn̄.
15 Ema ekilibi inan̄a me otu oge akọn̄,
me otu oge akọn̄ ewọọkbe itet ikaan̄,
melek ogbaan̄ enwunwuun̄be itele,
ema ekilibi inan̄a me lek ukwook isi akọn̄.
16 Mije Ogwukaan̄-ene ìtumu inyi emi ibe ikeyi: “Me emen acha ge, igọọk me ifuk-acha ogwu ebọkọbe me ọkọ, otutuuk umin ebi Keda môta isan̄a kpai. 17 Ebi mêsikbe me lek ebi akọn̄ ebi Keda ebi ìkisook oraan̄, ìrere ebi usọ akọn̄ ebi Keda, ebere ene inen me inen gaalek. Emi Okumugwem, Awaji ebi Ijeren ntumu.”