Nriran ofolek ebi Ijipiti mè ebi Etiopia
20
Me acha Sagọn, ogwu ubọọn̄ Asiria, oriabe ogwu otu uji akọn̄ kan̄ inu Asidọdu, eyi ene ya onube initim akọn̄, mè ibọkọ ama ya, 2 mgbọ ya ke Okumugwem otumu itibi Asaya gwun̄ kè Amọs ibe, “Wọọk ekwut ufieejit san̄a me lek kwun̄, mè san̄a ikpukot me ukot kwun̄.” Asaya orọrọ si ikeya, mè ikisa ukpọk lek mè ukpọk ukot ikije ikana ere.3 Okumugwem onenibe, “Eyi gwun̄ ikwaan̄ n̄a Asaya ojebe ukpọk lek mè ukpọk ukot acha ita, eya ìre inu ijejeen̄ mè itataba ubọk me utọn̄ inyi ebi Ijipiti mè ebi Etiopia. 4 Ikeya si ke ogwu ubọọn̄ Asiria obokpulu ebi Ijipiti ebi ekpulube me usun̄ akọn̄ mè ebi mkpat akọn̄ ebi Etiopia isa ifo. Mêsa ema, nsabọn mè ugane, ije ikeya ukpọk lek mè ukpọk ukot, ibot-edim kiban̄ òbook, inyi esip itet ebi Ijipiti. 5 Me mgbọ ya, ukpook mè esip môtet otutuuk ebi ìtotoon̄ ejit me lek ebi Etiopia mè ebi ìkisa ebi Ijipiti igugo lek cha. 6 Me mgbọ ya si, ebi ìluk me agba okwaan̄ yi mêkekitumu ibe, ‘Jei, ìkpọ-nu inu òsisibi inyi ebi eji etoon̄be ejit me lek, ebi eji elibibe inin̄ lek, ibe etap ubọk enyan̄a eji esibi me ubọk ebi Asiria! Me mgbọ keyi, eji ebejeje inwọnọ?’ ”