16
Enyi ebi mkpat akọn̄ Mowabu ìkup me Sela me emen èwê,ìria bọn arọọn̄ ifan̄a-ikpoko ìsi me
inyọn̄ ogoon̄ ujuja ama Jeruselem,
ìsa ìjet ogwu mkpulu òkikpulu me lek ijọn̄ ya.
2 Ebibaan̄ Mowabu ekititeek ikana me agba okwaan̄ Anọn,
kubọk bọn ofut erieen̄be isibi me uwu ofut.
3 Ìtumu ìnyi ebi Jeruselem ibe,
“Ìnyi eji nteme!
Ìnyi eji nkeek kinyi!
Ìsa ogugo lek kinyi ìkwek eji lek me ejit ikarek,
kubọk udun okichit ene lek me eririeen̄.
Ìlet ebi mkpat akọn̄,
ikasan̄a ebi ìlibi ekot ugwem ìsibi.
4 Ìtele ebi mkpat akọn̄ Mowabu eluk melek kinyi;
ìkana okwukwek ìnyi ema me lek ebi ìkpan̄ ene.”
Mgbọ ubọk ogwu òkitutuku ene isita me mun̄,
mè mkpan̄-ene isifieek,
mè ebi ìjijaka-inu isita isan̄a me lek ijọn̄;
5 mgbọ ya, sa me atata nnwọn,
mêneninen̄e ogboon̄ ubọọn̄ isun̄,
ogwu ubọọn̄ ge ògbegbe utoon̄-ejit
mônenikweek irek me inyọn̄ ogboon̄ ya;
ogwu ubọọn̄ ya ìbonan̄a me uwu kè Debit,
ọmọ môre ogwu òkisibi unen oyerebet,
mè ogwu òkirọ ibe ata irọrọ igwat.
6 Eji mîra inọ ugumulek ebi Mowabu,
ema ìre ebi ìkibene lek enenen;
ubenelek kiban̄ mè ugumulek kiban̄
mè ikpọkpọ ene chieen̄ isiki kiban̄ ìkatat,
otutuuk cha geelek ìre ukpọk ukpọk.
7 Eya orọ, ebi Mowabu mêto ito,
ema otutuuk ene mêto ito me ibot ido kiban̄.
Ema mêfieek ejit, mè isun̄ lek kiban̄ njijin njijin,
mije utop utop nchicha gerep
ebi Kiri Areset cha echi ema kpeyaka itaka.
8 Mije, uko ebi Esibon îchiaak ita,
uko gerep ebi Sibima si îchiaak ita.
Ebi ibot esese ido mîjak
atata olik gerep kiban̄ ikpukpuku,
olik gerep cha echi mgbọ
òtitibi isi igwook me Jajeri,
mè iwele isi ire emen èwê.
Agọọk kiban̄ ìsasan iwele,
mè iraka isi igwook me lek okwaan̄ Uchi.
9 Eya orọ, mâto ito inyi ebi Jajeri,
mè ito mije gerep ebi Sibima.
Jei ebi Esibon, mè ebi Eliale,
mun̄ ito n̄a môdek enyi lek isan̄a!
Okput unwọọn̄ enyi ekikput mgbọ mfut isiren̄e,
mè mgbọ ekirọkọ inu me uko, ìkayaka ìkup!
10 Unwọọn̄ mè ubelejit îchep me uko mfut uti,
kpunu ogwu òyaka ìkikọt okwa
mè ìre itaan̄ ukpo me uko gerep;
kpunu ogwu òyayaka ikichimi
miin̄ me ere ekichimi miin̄,
mije, nra irọ ibe ukpo unwọọn̄ cha ikayaka ìkup.
11 Eya orọ, ejit îfieek emi me lek ebi Mowabu
kubọk uneen̄ ija òkikọt okwa ufieejit;
ejit îfieek emi ire lek ekpọọk mije ebi Kiri Areset.
12 Ìbore, mgbọ ebi Mowabu isinikeke me isi-ijọn̄ kiban̄,
lek kiban̄ ìboweweek, mè itak ita;
ema isinu me isi yọk kiban̄ ibeniriaak uriaak,
uriaak kiban̄ ìkpokaan̄ ibot.
13 Eyiyi ore ikọ Okumugwem otumube ofolek ebi Mowabu karake mgbọ òraraka. 14 Ire, me mgbọ keyi, Okumugwem ìbe, “Me emen acha ita, igọọk me ubọk ifuk-acha eyi ebi ebọkọbe me ọkọ, umin ebi Mowabu melek ebi kan̄ cha ìwawa me otu ifuk, ìbokana inu ekikpọkpọ ilọ chieen̄. Ebi kan̄ ebi mêsikbe ebere ibot ene inen mè inen gaalek, kpebekaan̄ unye kubọk ge.”