Nriran ofolek ebi Mowabu
15
Eyi ìre nriran ofolek ebi Mowabu:Mêgwak Ari me Mowabu igwook,
ebejijaka ọmọ me eririeen̄ ge gaalek!
Mêgwak Kiri me Mowabu igwook,
ebejijaka ema me eririeen̄ ge gaalek!
2 Ebi Mowabu mênene isi Uwu Mbuban kiban̄,
ebi Dibọn mênene isi isi-ijọn̄ kiban̄ isi ito ito.
Ebi Mowabu mêkito ito me ibot ebi Nebo mè ebi Medeba,
ema mêkwat ijeek isan̄a me ibot,
mè ikwọkọ ifet irọt me otu.
3 Ema ebetap ofọnti ufieejit isa ikije me lek oniin̄,
me otutuuk inyọn̄ otoon̄-uwu mè oyet ile geelek,
ema mêkikwukwaan̄ me lek ito,
ema ebekirọrọn̄ inyana,
mè ikisa chieen̄ ichit me lek ito.
4 Ebi Esibon mè ebi Eliale mêtaan̄ ukpo,
ida kiban̄ môtaan̄ isi igwook me karake Jayas.
Eya orọ, ebi akọn̄ Mowabu mêtaan̄ ukpo,
ema mêtọk ita kpai.
5 Ejit îfieek emi me lek ebi Mowabu;
ebi kan̄ mêlibi mkpat akọn̄ isi igwook me Sowari,
mè iraka isi igwook me karake Egulat Selisiya.
Ema mêsa ito me chieen̄ ikinene orioon̄ ifo Luyit;
me lek oniin̄ òkisi Oronayim
ke ema ebekitaan̄ ukpo ito ito ofolek jakajaka kiban̄.
6 Mun̄ Nimirim îchiaak ita kpai, mbubet îkwaan̄ isan̄a,
njijoon̄ inwan̄ geege ìkayaka ìkup.
7 Eya orọ, inu echi ema ekọtbe ikpulu ikaan̄ me ubọk,
ema mêbeen̄ isaba okolo wilo.
8 Okput ukpo kiban̄ îtaan̄ ikana iso
otutuuk okike ijọn̄ ebi Mowabu;
ida ito kiban̄ îtaan̄ isi igwook me Egilayim;
ito ufieejit kiban̄ îre karake Bie Elim.
9 Eje îjot emen mun̄ okwaan̄ òkup me ama Dimọn,
ire, mâsa ofifi ufialek si
inisọkọ me lek ufialek ebi Dimọn;
Egbe àtat môlilaba ebi ìlilim mkpat akọn̄ Mowabu,
mè ililaba si ebi ìsisik me lek ijọn̄ ya.