Nriran ofolek ebi Babilọn
13
Eyi ìre nriran ofolek ebi Babilọn, eyi Asaya gwun̄ kè Amọs obenbe:2 “Ìgwuun̄ egop me inyọn̄ ibot ogoon̄ òlalak,
ìtaan̄ ukpo ìgwen ebi akọn̄ ebi ochicha,
ìwuwum ubọk ìnyi ema ibe enu,
mè ema enu enenin̄ me otunchit ebi isi ile.
3 Emi me lek n̄a nra inyi ebi n̄a,
ebi nsan̄abe isun̄ esese, ida,
nra igween̄ ebi usọ akọn̄ n̄a,
ebi n̄a cha ebi ìkinwọọn̄ mè ikitik lek kiban̄,
ibe enerọ inu unaan̄-ejit n̄a odobe.
4 “Ìgban̄, okput òkitaan̄ inu me inyọn̄ ogoon̄,
kubọk okput ogbogbo urum ene!
Ìgban̄, okput akọn̄ ebi owuwa ido,
ebi owuwa ido mêkigbaan̄ lek kiban̄ ititiin̄.
Okumugwem Ogwukaan̄ Inyọn̄ mè Ijọn̄ òkititiin̄ urum akọn̄,
òkibem lek akọn̄.
5 Ema ekinan̄a me ujọn̄ọ ere, me okputut linyọn̄ inu,
Okumugwem òkinu,
ọmọ melek nroon̄ akọn̄ eyi unaan̄-ejit kan̄,
ema ekinu ibenijijaka otutuuk lek ijọn̄ yi isan̄a kpai.
6 “Ìdimi ito, mije, usen oyerebet Okumugwem îta me ubọk,
ìbonu kubọk jakajaka ònan̄a
me ubọk Ogwu Òkaan̄ Unye Geelek.
7 Eya orọ, ubọk otutuuk ebi ene môwọ,
ogugo ene geelek môwulu.
8 Uga ukpook mônin̄ ijot ema emen,
unaan̄ mè uga ufiak môkeme ema igọm;
ema mêkinyinya kubọk nwa-owot uman okifiak.
Ge môbene isi ikpọ ge, ìkpokọt isan̄a amọn,
chieen̄ kiban̄ mônin̄ irio.
9 “Ìkpọ, usen oyerebet Okumugwem òkinu,
ìbokup unan unan, mè ije melek
uga unaan̄-ejit mè uyok-ejit,
ìbonu inichep otutuuk lek ijọn̄ yi isan̄a kpai,
mè ijijaka ebi ijo ife ìluk me inyọn̄ ijọn̄ yi isan̄a kpai.
10 Ebi kè ntoronyan̄ me akpa isinyọn̄, mè urum kiban̄, kpebenyi utoon̄;
ura òkibubum, ìbodudun ikisibi inu,
onyan̄ ìkabonyi utoon̄ kan̄.
11 Mâsulu ebi linyọn̄ osusut, mije ijo irọrọ kiban̄,
mè isulu ebi ikpak osusut, bak me lek ijo inu kiban̄.
Mâtap okputut inyi ubenelek ebi ugumu,
mè ikeme ugumulek ebi ìkisa
unye kiban̄ itutuku ene, isiki.
12 Mârọ ibe ene enan, kubọk ata alata araran̄ okinan;
ebilene mênan igak alata araran̄ ònan̄a me Ofiri.
13 Eya orọ, mâsisik akpabin inyọn̄,
linyọn̄ môjijibi inan̄a me akpat kan̄,
sa me unaan̄-ejit eyi Okumugwem Ogwukaan̄ Inyọn̄ mè Ijọn̄,
me usen uyok unaan̄-ejit kan̄ mônube.
14 “Ogwu ikup, môgwu ikom isi lek ebi kan̄,
ene geelek môlibi ifo ama kan̄,
kubọk ogaan̄ ebi ota ekigọọk,
mè arọọn̄ kpunube ogwu òkikpukpo.
15 Ene geelek emun̄be, ebechichim itibi;
ogwu geelek etetbe ire ubọk, mônin̄ me otu oge akọn̄.
16 Mêbeen̄ asa nsabọn kiban̄ itọọn̄
ikpọk isan me chieen̄ kiban̄,
mêfum uwu kiban̄ inọọn̄,
mè ilaak ebi nwa kiban̄.
17 “Ìkpọ, mârọ ebi Midia ejibi akọn̄ enu me lek kiban̄;
ebi Midia kpekisa alata okuket igwen inu;
alata araran̄ ìkakitotop ema me lek.
18 Ogbaan̄ kiban̄ ìkigwagwak nsabọn irieen̄ iche;
ema kpebekaan̄ nsan me lek nsek bọn ìkup me otu ebe,
kpebesa chieen̄ njijin ikpọ nsabọn.
19 Babilọn ore ama òjajaan̄ ichit me otutuuk ido geelek,
ọmọ ore umin mè gogolek ebi Kalidia.
Ire, Awaji môtọp ema ida igwook,
kubọk îrọbe Sodọm mè Gomora.
20 Ìbochechep dìp dìp mege ire mgbọ ikakaan̄ge itata,
kpunu ene geege òboyaka iluk me emen kan̄
bene me ukot re me ukot.
Ogwu Arabu geege ìkpogwuun̄ uwu ọfọ kan̄ me ama ya,
kpunu ebi òkpukpo arọọn̄
geege ìbesasa si anam kiban̄ inu
ibe initap efuuk me ere ya.
21 Ire, ebi kè anam emen èwê ebekililam me ere ya,
ebi kè ibo oron afa mêluk ijot uwu kiban̄,
ebi kè ikwurikwu mêluk me ere ya,
ebi kè ebot oron mêkiniraan̄ iwulu ikana me ere cha.
22 Ebi kè ibo oron ngwugwat lek mêkitaan̄ ukpo me uwu ebi ubọọn̄ kiban̄,
ebi kè ibo oron afa ebekup me
emen ujuja uwu kiban̄ cha.
Mgbọ kan̄ îta me ubọk,
kpebesọkọ usen geege me lek mgbọ kan̄.”