Okwa Itọn̄
Okwa ekikọt isa inene isi Uwu Mbuban.
135
Ìtọn̄ Okumugwem;ìtọn̄ erieen̄ Okumugwem;
ìnyi Okumugwem itọn̄, enyi ebi ikwaan̄ kan̄!
2 Enyi ebi ìkikeke isi ikwaan̄
me Uwu Mbuban Okumugwem,
me oyet egep uwu Awaji kiji,
3 ìtọn̄ Okumugwem, ke ọmọ minwọn;
ìkọt okwa ìtọn̄ erieen̄ kan̄, ke irọrọ ikeya îjaan̄.
4 Okumugwem ìgogobo Jekọp inyi lek kan̄,
mè isa bọn kè Ijeren irọ ebi eyi kan̄ ọkpọkpọ.
5 Emi nriọọn̄ ibe ke Okumugwem îmin,
mè iriọọn̄ si ibe ke Ogwukaan̄ kiji
îmin igak awaji geelek.
6 Inu geelek òneme ọmọ ke îkirọ
me emen inyọn̄ mè linyọn̄
mè okwaan̄ mè ugwuuk okwaan̄ geelek.
7 Ọmọ orọ oruk ikinan̄a me ntutun̄ ere geelek me linyọn̄ isibi,
mè irọ omumen-inyọn̄ òkirọ ibot irep,
mè ikisan̄a efet isibi me ere îsun̄be ito ibe iwut.
8 Okumugwem îkpaan̄ adasi owot bọn ebi Ijipiti,
bọn ebilene mè bọn anam.
9 Îrọ si ikwaan̄ òkup nke nke
mè inu òkup uyeke uyeke me Ijipiti
isa isulu ogwu Fero mè ebi ikwaan̄ kan̄ osusut.
10 Îchep owuwa ido,
mè ikpan̄ ebi ubọọn̄ ìkakaan̄ unye.
11 Îkpan̄ Siyon ogwu ubọọn̄ ebi Amọ,
mè Ôgu ogwu ubọọn̄ ido Basan,
mè ikpan̄ si otutuuk ebi ubọọn̄ ebi lek ijọn̄ Kenan,
12 mè isa ijọn̄ kiban̄ inyi ebi eyi kan̄,
ebi Ijeren, me ìrot.
13 Okumugwem, erieen̄ kwun̄ ìbokukup ire mgbọ geelek;
etip kwun̄ si ìbotataan̄ ire otutuuk ukot geelek.
14 Okumugwem môsibi oyerebet inwọn ebi eyi kan̄,
mè ikaan̄ nsan me lek bọn ikwaan̄ kan̄.
15 Inu ebi ofifi ido esabe irọ awaji kiban̄
ìre mkpọmfaka alata araran̄ mè alata okuket,
echi ebilene esabe ubọk itọkọ.
16 Ema mîkaan̄ otu, ire, kpekikọt itumu ikọ,
mîkaan̄ chieen̄, ire, kpekikọt imọọn̄ inu.
17 Ema mîkaan̄ utọn̄, ire, kpekikọt inọ ikọ;
ubọk yaage si, ema kpekifufuuk efuuk.
18 Ebi ìkirom mkpọmfaka cha ebet lek mkpọmfaka cha;
ebi ìkitoon̄ ejit me lek mkpọmfaka cha
ekup si kubọk mkpọmfaka cha.
19 Enyi ebi Ijeren, ìtọn̄ Okumugwem;
enyi ebi uwu kè Erọn, ìtọn̄ ọmọ!
20 Enyi ebi uwu kè Libai, ìtọn̄ Okumugwem;
enyi ebi ìkitet ukpook Okumugwem, ìtọn̄ ọmọ.
21 Ìtọn̄ Okumugwem me Sayọn;
ìtọn̄ ọmọ me Jeruselem, ere îlukbe!
Ìtọn̄ Okumugwem.