Ikan Okumugwem mijaan̄
119
Kpọ-nu uga ubelejit òkup inyiebi kpekaan̄ nrọ-nlọ geege me ugwem kiban̄;
òrere ebi ìkiluk ugwem ikpọ me lek Ikan Okumugwem.
2 Kpọ-nu uga ubelejit òkup inyi
ebi ìkirọ ida ata-ikọ Okumugwem;
òrere ebi ìkiweek ọmọ me otutuuk ejit kiban̄,
3 mè ebi kpekirọ inu geege òlọlọ;
ire, ekije me oniin̄ eyi Okumugwem.
4 Okumugwem, owu ora inyi ida,
ibe egbala chieen̄ ekerọ ikọ owu otọbe.
5 Jei, kè ojaan̄ ire makeke inye,
mè iriọọn̄ ubọk ikisun̄ ikan kwun̄ cha egebe isun̄!
6 Esip geege kpomokitet emi,
mgbọ nkikeek inu òfo me lek ikọ owu otọbe.
7 Nsikween̄ unen oyerebet kwun̄ iriọọn̄,
mâchili otutuuk ejit n̄a inyi owu itọn̄.
8 Mâsun̄ ikan kwun̄ cha egebe isun̄;
soso, katọtọp emi ìfiin̄ isi ge.
Isisiki ibot inyi Ikan Okumugwem
9 Ìre gwun̄ nsabọn irieen̄ ìbojeje ikọt iluk ugwem òtatana?
Îre sa me iluluk ugwem igọọk me lek ikọ kwun̄.
10 Okumugwem, ǹsa otutuuk ejit n̄a
iweek ubọk makitọbọ ebum inyi owu;
soso, kachieek ibe ǹtutun ǹnan̄a me lek ikọ otọbe!
11 Ǹtatap ikọ otu kwun̄ me emen ejit n̄a,
inyi nkarọ owu inu geege ìlọ.
12 Okumugwem itọn̄ ikup inyi owu;
soso, jeen̄ emi ikan kwun̄.
13 Otu n̄a ke nsa ikpa
otutuuk unen oyerebet osabe otu kwun̄ ifieek.
14 Ililibi igọọk ata-ikọ kwun̄ îmin emi me lek enenen
igak ikakaan̄ otutuuk inu ubọọn̄ geelek.
15 Mâtap ikọ owu otọbe me ekiket,
mè isa chieen̄ n̄a igwuun̄ me lek ubọk irọ-inu kwun̄.
16 Mâkisa ikan kwun̄ cha egebe isun̄ ibaan̄ alọm;
emi ǹkabawuuk ikọ kwun̄.
Unwọọn̄ òkup me emen Ikan Okumugwem
17 Rọ inyi inu ije ijaan̄ emi gwun̄ ikwaan̄ kwun̄ me lek,
inyi ǹgat ugwem,
mè ǹkenrọ ikọ kwun̄.
18 Chili emi chieen̄,
inyi m̀mun̄ uyeke uyeke inu
òkup me emen ikan kwun̄.
19 Emi ìre ogwu ichen me linyọn̄;
soso, kalet emi ikọ owu otọbe.
20 Ulọk irọriọọn̄ unen oyerebet kwun̄
mônikeme emi ikpan̄ eririeen̄ mè ikarek.
21 Owu môgana ikọ inyi ebi ugumulek,
ebi ofieekbe otu inyi;
ebi kpekirọ ikọ otọbe.
22 Kachieek ibe ochak mè unyechieen̄ ire emi lek,
mije, nrọ ida ata-ikọ kwun̄ iso.
23 Ebi ilile si mîkup inin̄ oru ikeme emi,
ire, emi gwun̄ ikwaan̄ kwun̄,
mâgwuun̄ chieen̄ ikikween̄
ikan kwun̄ cha egebe isun̄.
24 Ililibi igọọk ida ata-ikọ kwun̄ okitop emi me lek,
ikọ ata-ikọ cha okirọ chieen̄ n̄a ibolo.
Itutumu ifieek ibe mêtet Ikan Awaji inye
25 Ibot ejit n̄a ìkup me otu udọn̄ mkpa,
na jomo emi gọọk me ida ikọ kwun̄.
26 Mkpa ubọk ugwem n̄a okupbe inyi owu,
owu ofọfọọk emi otu;
soso, jeen̄ emi ikan̄ kwun̄ cha egebe isun̄.
27 Tap ubọk nyi emi, mè ǹgobo ikọ owu otọbe ǹtet,
inyi ǹkenkeek ekiket ofolek uyeke uyeke ikwaan̄ kwun̄.
28 Ufieejit mônikpan̄ emi;
tap emi efuuk me emen gọọk me ida ikọ kwun̄.
29 Kachieek ibe emi ǹre ene ataak;
ire, sa me ata ejit kwun̄ jeen̄ emi ikan kwun̄.
30 Ntumu ifieek ibe mâre ene atikọ;
unen oyerebet kwun̄ ke nkilibi igọọk.
31 Okumugwem, ǹgọgọbọ ida ata-ikọ kwun̄ ikam;
soso, kachieek ibe esip itet emi.
32 Òkilọk emi enenen irọrọ ikọ owu otọbe,
mije, owu môrọ inyi emi ǹriọọn̄ inu ǹgak ubọk nriọọn̄be.
Ibebeek Awaji ngobo-ntet
33 Okumugwem, jeen̄ emi inu òkup me emen ikan kwun̄,
inyi ǹsun̄ ikan kwun̄ cha egebe isun̄ ǹsi ǹre òta kan̄.
34 Nyi emi ngobo-ntet, ufuna mâkisun̄ ikan kwun̄;
mâsa otutuuk ejit n̄a ikisun̄ ikan cha.
35 Sa emi kije ike otọbe ibe ekeje,
mije, irọrọ ida kwun̄ mikitop emi me lek.
36 Nyi emi ulọk irọrọ ida ata-ikọ kwun̄;
ìkare ulọk ininin̄ ubọọn̄.
37 Da chieen̄ n̄a san̄a me lek inu ikike,
mè nyi emi ayaya ugwem me oniin̄ kwun̄.
38 Rọ otu ikọ kwun̄ so nyi emi gwun̄ ikwaan̄ kwun̄,
ogwu òkimin owu.
39 Ochak òkichak emi mikaan̄ emi ukpook;
nyan̄a emi sibi,
ke owu ìre ogwu unen oyerebet.
40 Ikọ owu otọbe òkilọk emi irọrọ;
nyi emi ayaya ugwem,
ke owu ìre ogwu ata irọrọ.
Ikan Okumugwem îgbe inu etoon̄be ejit me lek
41 Okumugwem,
jeen̄ emi imumechieen̄ mgbọ geelek kwun̄,
mè nyan̄a emi gọọk me ikọ otu kwun̄,
42 inyi ǹkaan̄ inu mbasa ifọọk ebi ìkichak emi ochak,
mije, ikọ kwun̄ ke nsa itoon̄ ejit.
43 Kachieek ibe atikọ inan̄a emi me otu mgbọ geege,
bak me lek, ikpọchieen̄ n̄a
ìkup me lek unen oyerebet kwun̄.
44 Ikeya ke mâkisun̄ ikan kwun̄ otutuuk mgbọ,
mege ire mgbọ geelek, mgbọ geelek.
45 Sa me ikeya si ke mâkup me utelelek,
mije, ǹkiweek irọrọ ikọ owu otọbe.
46 Mâkpa otu ata-ikọ kwun̄ isibi me isi ebi ubọọn̄;
esip geege ìkpotet emi.
47 Ubelejit n̄a ìbokup me lek ikọ otọbe;
emi mma irọrọ ida kwun̄.
48 Nkaan̄ ulibi inyi ikọ owu otọbe,
mè ima si irọrọ ida kwun̄;
mâgwuun̄ chieen̄ ikikween̄
ikan kwun̄ cha egebe isun̄.
Ikan Okumugwem ìkikat ene ejit
49 Kawuuk ikọ otumube inyi emi gwun̄ ikwaan̄ kwun̄,
ikọ ya ore ikpọchieen̄ n̄a.
50 Ikọ ya ore ukarajit n̄a
mgbọ nkupbe me emen uyọrọlek;
ọmọ ore ugwem n̄a.
51 Ebi ugumulek mîrọ emi inu ochak,
ire, ǹkayaka ikan kwun̄ ìto mgbọ geege.
52 Okumugwem, nsikikeek unen oyerebet kwun̄
me ukot ikaan̄,
îra ikikat emi ejit.
53 Ebi unye-ibot isikikpaka ikan kwun̄,
ejit ìkiyoyok emi.
54 Me mgbidim mgbọ nnikup me linyọn̄,
ikan kwun̄ cha egebe isun̄ ke nkikọt me lek okwa.
55 Okumugwem, erieen̄ kwun̄
ìkakinan̄a emi me ejit me eririeen̄,
ǹkakiwuuk si isusun̄ ikan kwun̄.
56 Eyi ore inu nkirọ mgbọ geelek,
bak me lek nkirọ inu owu otọbe.
Itetet lek inye ikisun̄ Ikan Awaji
57 Okumugwem, owu ore uche òre emi lek;
mwuuk lek itumu ifieek ibe ke m̀kpayaka ikọ kwun̄ ito.
58 Ǹsa otutuuk ejit n̄a ikibeek nnwọn kwun̄;
to emi nsan gọọk me lek ikọ otu kwun̄.
59 Ndọmọ otutuuk ugwem n̄a ikpọ,
mè igwu ikana igọọk ida ata-ikọ kwun̄.
60 Ǹkafiat mgbọ,
ire, ǹgwagwat lek ilibi igọọk ikọ owu otọbe.
61 Ebi ijo ife mîtip ufe ikana emi okokop,
ire, ǹkabawuuk ikan kwun̄.
62 Ǹkibolo chieen̄ me ilaak ejit eririeen̄ ikitọn̄ owu,
bak me lek unen oyerebet kwun̄.
63 Emi ìre unene melek ebi geelek ìkimin owu,
mè ebi geelek ìkirọ inu owu otọbe.
64 Okumugwem, owu omun̄ ene me chieen̄ mgbọ geelek
me otutuuk linyọn̄;
soso jeen̄ emi ikan kwun̄ cha egebe isun̄.
Ikan Okumugwem ìre inu unye otu ewe
65 Okumugwem, owu orọ inu ijaan̄
emi gwun̄ ikwaan̄ kwun̄ me lek,
igọọk me ida ikọ kwun̄.
66 Jeen̄ emi ata ifuk-ibot mè ubọk ekisibi unen oyerebet,
mije, nchieek me lek ikọ owu otọbe.
67 Ǹjeje ilọ, ke osusut kwun̄ ore emi lek;
ire, mgbọ keyi, emi gwa ǹkirọ ikọ otu kwun̄.
68 Owu onwọn, mè ikirọ inu ònwọnwọn;
soso, jeen̄ emi ikan kwun̄ cha egebe isun̄.
69 Ebi ugumulek mîkan̄ ataak ikeme emi me agan̄ geelek,
ire, mâsa otutuuk ejit n̄a ikirọ inu otọbe ibe erọ.
70 Ema kpekigobo ikan kwun̄ itet,
ire emi, ikan kwun̄ mikitop emi me lek.
71 Osusut osutbe emi înwọn me lek n̄a,
mije, îrọ inyi ǹkween̄ ikan kwun̄ cha egebe isun̄.
72 Ikan ònan̄a me otu kwun̄ înwọn me lek n̄a
igak obop obop alata araran̄ mè alata okuket.
Ata oyerebet me emen Ikan Okumugwem
73 Owu orom emi, mè irọ emi ǹre inu nrebe;
nyi emi ngobo-ntet,
inyi ǹkween̄ inu onyibe ida ibe erọ.
74 Ebi ìkimin owu mêbele ejit mgbọ ema isimun̄ emi,
mije, ikpọchieen̄ n̄a ìkup me lek ikọ kwun̄.
75 Okumugwem, nriọọn̄ ibe ke oyerebet kwun̄ ìkinenen;
eya orọ, osusut osutbe emi ìkpọkpọ igbe.
76 Kè imumechieen̄ mgbọ geelek kwun̄ ire ukarajit n̄a,
igọọk me ikọ otu kwun̄
otumube inyi emi gwun̄ ikwaan̄ kwun̄.
77 Rọ emi nsan, inyi ǹgat ugwem,
mije, ikan kwun̄ mikitop emi me lek.
78 Kè esip itet ebi ugumulek,
mije, ema mîkan̄ ataak ifiat emi me ikpak;
ire, eyi n̄a, ǹkikeek inu ofolek inu otọbe ibe erọ.
79 Ria ebi ìkimin owu jet emi;
ebi ìrọriọọn ata-ikọ kwun̄.
80 Rọ ibe ǹkensun̄ ikan kwun̄ cha egebe isun̄,
inyi esip geege ikatet emi.
Uriaak ibebeek unyan̄a
81 Okumugwem, ikukup ikikpọ unyan̄a kwun̄
òkita emi ifi me owot enenen;
ire, ntoon̄ ejit me lek ikọ otu kwun̄.
82 Chieen̄ îjat emi ikukup ikikpọ ibe owu òrọ otu ikọ kwun̄;
eya ke ndo ibe mè ìre kpa mgbọ
ke obonirọ ejit isiki emi?
83 Ǹdo ikọ yi, mije, nkana otukpọọk ikike;
ire, ubọk geelek si,
ǹkawuuk-nu ikan kwun̄ cha egebe isun̄.
84 Kpa mgbọ ke emi gwun̄ ikwaan̄ kwun̄
mbakup ikikpọ owu chieen̄ ire?
Mgbọ owa ke obonisibi oyerebet
me ibot ebi ìkililaba emi?
85 Ebi ugumulek mîrọkọ udọn̄ isun̄,
inyi ǹnenkwala ǹrọn̄ me emen;
ema kpekisa ikan kwun̄ igwen inu geege.
86 Otutuuk inu onyibe ida ibe erọ
îgbe inu etoon̄be ejit me lek;
ebi ene ekikan̄ ataak isa ikirọ ikeme emi;
soso, na nyan̄a emi!
87 Ìsik sọntiik ema mekpan̄ emi,
ire, emi ǹkasan̄a chieen̄ me lek inu owu otọbe ibe erọ.
88 Mije imumechieen̄ kwun̄ òkikup mgbọ geelek,
soso, sun̄ emi ebek ugwem;
inyi mâkirọ ida ata-ikọ ònan̄a me otu kwun̄.
Ichechieek me lek Ikan Okumugwem
89 Okumugwem, mege ire mgbọ ikakaan̄ge itata,
ikọ kwun̄ ìkekeke ibia me akpabin inyọn̄.
90 Owu ogbe ogwu etoon̄be ejit me lek
nan̄a me ukot re me ukot,
owu osun̄ linyọn̄ me irek, ibabia si ikeya.
91 Îre sa me ikọ otọbe ke inu geelek okup mege ire cherekeyi,
mije, ema otutuuk ekirọ inu obe ema erọ.
92 Mebe ikan kwun̄ ìkakitop emi me lek,
kè ǹkwu me emen uyọrọlek n̄a.
93 Emi ǹkakaan̄ mgbọ iwuwuuk ikọ kwun̄ otọbe,
mije, ema ke osa irọ inyi ǹgat ugwem.
94 Emi ìre ene kwun̄, soso, nyan̄a emi,
mije, ǹkiweek irọriọọn̄ ikọ otọbe ibe erọ.
95 Ebi ikpak ekeke egbe egbe ikiweek emi ikpakpan̄,
ire, ata-ikọ kwun̄ ke mbasa ibene ibot.
96 Mmun̄ ibe ke inu geelek îkaan̄ okputut,
ire, ata-ikọ kwun̄ îwele enenen,
ìkakaan̄ okputut.
Imama Ikan Okumugwem
97 Mma ikan kwun̄ iraka iman̄;
usen geelek, ǹkikakaan̄ ekiket ònin̄ me lek.
98 Ata-ikọ kwun̄ ìkikup melek n̄a mgbọ geelek;
ọmọ ke owu osa irọ inyi emi ǹriọọn̄ inu
ǹgak ebi ochicha n̄a.
99 Ikakaan̄ ikọ ata-ikọ kwun̄ me ekiket mgbọ geelek,
îrọ inyi ǹkengobo inu ǹtet
ǹgak otutuuk ebi ìkijeen̄ emi inu.
100 Mije nkirọ ikọ kwun̄ otọbe,
nkigobo inu itet igak ebi ugane.
101 Ǹtetet lek ikaan̄ me lek irọrọ ijo inu,
inyi ǹkọt ǹlibi ǹgọọk ikọ kwun̄.
102 Ǹkatele unen oyerebet kwun̄,
mije, îre owu me lek kwun̄ ojeen̄ emi.
103 Ikọ otu kwun̄ îtop me lek n̄a enenen;
înin̄i emi me otu igak aran̄ akwọọk.
104 Ikọ otọbe okinyi emi iriọọn̄-inu,
eya orọ, ǹchacha inu ofiaan̄ geelek.
Ikan Okumugwem ìre utoon̄
105 Ikọ kwun̄ ore mkpukan̄ nkisa imọọn̄ inu ije ije;
ọmọ ore utoon̄ òkijeen̄ emi oniin̄.
106 Nnyan̄a ibot ibe ke mâlibi igọọk unen oyerebet kwun̄;
nrọ si inyan̄a-ibot n̄a ya ijot.
107 Jei Okumugwem, uyọrọlek mônikeme emi ikpan̄;
na gat emi ugwem kubọk otumube me ikọ kwun̄.
108 Jei Okumugwem, bọkọ uriaak nkisa itọn̄ owu,
mè jeen̄ emi unen oyerebet kwun̄.
109 Ǹkabawuuk ikan kwun̄,
ubọk geelek îkikup mgbọ geelek
kubọk ìbosasak emi ibot.
110 Ebi ijo ife mîtip ufe ikana emi,
ire, ǹkaje ìkwala irọrọ ida ikọ owu otọbe.
111 Ata-ikọ kwun̄ îkana ìrot inyi emi ire mgbọ geelek;
îre ikọ cha okibele emi ejit.
112 Ntumu ifieek me ejit n̄a ibe
ke mâsun̄ ikan kwun̄ egebe isun̄ cha ire mgbọ geelek;
mâsun̄ ema ire òta.
Nnwọn me emen Ikan Okumugwem
113 Ncha ebi isi iba;
ire, mma ikan kwun̄.
114 Lek kwun̄ ke nkinin̄ ilet;
owu si ore agbọ òkikput emi lek;
ikpọchieen̄ n̄a ìkup me lek ikọ kwun̄.
115 Enyi ebi ijo ubọk irọrọ, ìkpebe emi lek me lek,
mije, mâkirọ inu Awaji n̄a onyibe ida ibe erọ.
116 Bieen̄ emi kaan̄ gọọk me ikọ otu kwun̄, inyi ǹgat ugwem;
kachieek ibe ǹrie esip
me lek inu nkikpọ chieen̄ ibe owu môrọ inyi emi.
117 Bene emi gwuun̄, inyi mfat ikafat emi,
ke mâkisun̄ ikan kwun̄ cha egebe isun̄ mgbọ geelek.
118 Owu ojit ebi ìjijit isusun̄ ikan kwun̄ cha egebe isun̄;
otutuuk ijo ifiọk kiban̄ îkana inu ikike.
119 Owu òsasan̄a otutuuk ebi ikpak ìkup me linyọn̄ isan̄a
kubọk mfurufu;
eya orọ mmabe ata-ikọ kwun̄.
120 Ǹkifieek owot me lek kwun̄,
mè ikitet ukpook me lek unen oyerebet kwun̄.
Isisiki ibot inyi Ikan Okumugwem
121 Nra irọ inu ònenen,
mè irọ inu ònwọnwọn;
kajit emi ìtele ìnyi ebi ìkitutuku emi.
122 Tele inyi emi, gwun̄ ikwaan̄ kwun̄,
ǹtet owu me ata-ikọ òbonin̄ oruru inyi emi;
kachieek ebi ugumulek etutuku emi.
123 Nkup ikpọ unyan̄a kwun̄ mege chieen̄ îjat emi;
nkup si ikpọ ibe owu òrọ otu ikọ ata irọrọ kwun̄,
ire, ǹkamun̄ inu geege.
124 Rọ emi, gwun̄ ikwaan̄ kwun̄, inu me lek
kpọ me lek imumechieen̄ kwun̄
òkikup mgbọ geelek;
jeen̄ si emi ikan kwun̄ cha egebe isun̄.
125 Emi ìre gwun̄ ikwaan̄ kwun̄;
nyi emi ngobo-ntet, inyi ǹriọọn̄ ata-ikọ kwun̄.
126 Okumugwem, kpọ ebi ene
mêkisa ikan kwun̄ isun̄ inu ikike;
îkem mgbọ owu môrọbe ema inu.
127 Ire emi, mma ubọk owu okinyi ida;
îkitop emi me lek igak alata araran̄;
iin̄, mma igak alata araran̄ eyi atata kan̄.
128 Eya orọ, otutuuk ikọ otọbe ofolek otutuuk inu geelek,
emi mmun̄ ibe ke ìkpọkpọ itat;
ofiaan̄ mè ataak geelek, ǹchacha.
Ulọk isisiki ibot inyi Ikan Okumugwem
129 Ata-ikọ kwun̄ îmin uyeke me lek enenen;
eya orọ, ǹchichili ejit n̄a ikisa isun̄ ema.
130 Isikpa ikọ kwun̄ iwele, îra ichili nlelet inu geelek ibook,
mè orọ inyi ebi kpekaan̄ ifuk-ibot egobo inu etet.
131 Ulọk irọrọ inu onyibe ida ibe erọ îmin emi me ejit enenen,
ire lek nkisa otu ifuuk efuuk ejit ge ejit ge.
132 Yaka chieen̄ kpọ emi, mè rọ emi nsan,
kubọk okirọ inyi otutuuk ebi ìmama erieen̄ kwun̄.
133 Sa ikọ otu kwun̄ jeen̄ emi oniin̄ mbaje;
kachieek ibe ijo inu ibọkọ emi ikaan̄.
134 Faka emi sibi me tukutuku bọn ebilene ekitutuku emi,
inyi ǹkenrọ ikọ owu otọbe.
135 Soso, kaan̄ emi gwun̄ ikwaan̄ kwun̄ nsan me lek,
mè jeen̄ emi ikan kwun̄ cha egebe isun̄.
136 Ogbogbo mun̄ ito ìkigbugbuk emi me chieen̄ mgbọ geelek,
mije, ebilene kpeyaka ikisun̄ ikan kwun̄.
Ikan Okumugwem ìnenen ikup
137 Okumugwem, owu ìre ogwu ata irọrọ;
oyerebet kwun̄ si ìkinenen.
138 Ata-ikọ kwun̄, eyi onyibe ida ibe ekegọọk, ìkpọkpọ itat,
mè igbe inu etoon̄be ejit me lek enenen.
139 Ejit ìyok emi kubọk ukan̄,
mije, ebi ochicha n̄a kpesa ikọ kwun̄ igwen inu.
140 Ikọ otu kwun̄ îgbe inu etoon̄be ejit me lek;
eya orọ, emi gwun̄ ikwaan̄ kwun̄, m̀mama iraka iman̄.
141 Emi nsip enenen me chieen̄ ene,
mè ire ogwu ekikpọ igele,
ire, ǹkawuuk ikọ kwun̄ otọbe.
142 Ata irọrọ kwun̄ môkup ire mgbọ geelek;
ikan kwun̄ ìre atikọ.
143 Uyọrọlek mè ukwook îjot emi ejit enenen,
ire, inu onyibe ida ibe erọ, ọmọ okinyi emi unwọọn̄.
144 Ata-ikọ kwun̄ ìkitatat mgbọ geelek;
rọ inyi ǹgobo ǹtet,
mè ǹgat ugwem.
Uriaak ibebeek unyan̄a
145 Okumugwem, ntaan̄ ukpo igwen owu me otutuuk ejit n̄a;
soso, nọ emi ida, ke mâsun̄ ikan kwun̄ cha egebe isun̄.
146 Owu ke nkitaan̄ ukpo igwen;
soso, nyan̄a emi, ke mârọ ata-ikọ kwun̄.
147 Ǹkinan̄a ilaak sabum egwe ònowele,
mè itaan̄ ukpo igwen owu ibe owu òtap ubọk ònyi emi;
ikpọchieen̄ n̄a ìkup me lek ikọ kwun̄.
148 Otutuuk eririeen̄, ilaak ìkakinin̄ emi chieen̄;
ǹkitop chieen̄ ikiwọlọ emen ikọ otu kwun̄.
149 Okumugwem, nọ ida n̄a
sa me imumechieen̄ kwun̄ òkikup mgbọ geelek;
sun̄ emi me ugwem sa me unen oyerebet kwun̄.
150 Ebi ìkirọ inu ikpak mîjuuk igbet emi lek;
ema mîjọn̄ọ ere me lek ikan kwun̄.
151 Ire, owu Okumugwem okup iriaak emi lek;
otutuuk inu onyibe ida ibe erọ ìre atikọ.
152 Ire me lek ata-ikọ kwun̄,
mwuuk lek iriọọn̄ karake mgbọ ibe
ke owu òsun̄ ibe ikup ire mgbọ geelek.
Ibebeek Awaji ntap-ubọk
153 Okumugwem, kpọ uyọrọlek òkitet emi,
mè nyan̄a emi sibi,
mije, ǹkawuuk ikan kwun̄.
154 Bọkọ ikọ ibot n̄a tumu,
mè faka emi sibi,
gat emi ugwem sa me ikọ otu kwun̄.
155 Owu òkponyan̄a ebi ikpak kubọk ge,
mije, ema kpekirọ ikan kwun̄ cha egebe isun̄.
156 Okumugwem, ejit nsan kwun̄ mimin;
sun̄ emi me ugwem gọọk me lek unen oyerebet kwun̄.
157 Ebi ìchacha emi mè ebi ìkililaba emi miwa;
ire, ǹkagwu ìkom ìnan̄a me lek ata-ikọ kwun̄.
158 Nsiraan̄ chieen̄ imun̄ ebi ìkileke ene ifiin̄,
ema ekijọjọ emi ejit,
mije, ema kpekirọ ikọ otu kwun̄.
159 Owu omun̄ ike mmabe ikọ owu otọbe;
sun̄ emi me ugwem
sa me imumechieen̄ kwun̄ òkikup mgbọ geelek.
160 Ibot ibot ikọ kwun̄ ìre atikọ;
ikeya si, otutuuk unen oyerebet kwun̄
ìbokukup ire mgbọ geelek.
Imọmọnọ Ikan Okumugwem kubọk inu òkup me uyọt ichit
161 Ebi ilile ekisisaak emi
me nkarọge ema inu geege ìlọ,
ire, umin eyi ikọ kwun̄ îgwook emi mbiribọ me lek.
162 Ikọ otu kwun̄ îtap emi unwọọn̄ me ejit enenen;
ìkup kubọk ene osi ichichini inu ubọọn̄.
163 Ikakan̄ ataak, emi ǹchacha enenen, mè ijọ ejit me lek,
ire, mma ikan kwun̄ iraka iman̄.
164 Mgbọ jaaba me egwe usen ke nkitọn̄ owu,
mije, oyerebet kwun̄ ìkinenen.
165 Ikpele esuuk ke ebi ìkima ikan kwun̄ ekikaan̄;
kpunu inu geege òbokọt ida ema ito.
166 Okumugwem, ǹkikpọ chieen̄ ibe ke owu mônyan̄a emi;
ǹkirọrọ inu onyibe ida ibe erọ.
167 Ǹkekirọ ida ata-ikọ kwun̄;
mma ata-ikọ kwun̄ cha enenen.
168 Ǹkirọ inu otọbe ibe erọ,
mè ikilibi igọọk otu ata-ikọ kwun̄,
mije, owu okimun̄ inu geelek nkirọ.
Uriaak ibebeek ntap-ubọk
169 Okumugwem,
tele inyi ukpo nkibọn̄ igwen owu ire owu utọn̄;
igọọk me lek ikọ kwun̄, rọ inyi emi ǹgobo inu ǹtet.
170 Tele mè uriaak n̄a ire owu utọn̄,
mè nyan̄a emi kpọ me lek ikọ otu kwun̄.
171 Mâkisa otu n̄a itọn̄ owu,
mije, owu okijeen̄ emi ikan kwun̄ cha egebe isun̄.
172 Mâkikọt ikọ otu kwun̄ me lek okwa,
mije, inu onyibe ida ibe erọ ìre inu ata irọrọ.
173 Bem lek ikekitap ubọk inyi emi,
mije, nkeke inye irọrọ inu otọbe ibe erọ.
174 Okumugwem, òkilọk emi ibe owu ònonyan̄a emi;
ikan kwun̄ mikitop emi me lek.
175 Soso, sun̄ emi me ugwem, ke mâkitọn̄ owu,
mè tele si mè unen oyerebet kwun̄ itap ubọk inyi emi.
176 Nje ilọ owu ukot kubọk arọọn̄ òchechep;
soso, na week emi gwun̄ ikwaan̄ kwun̄,
mije, ǹkawuuk inu onyibe ida ibe erọ.