Okwa itọn̄ mije etimbe ikpan̄
118
Ìnyi Okumugwem itọn̄, mije, ọmọ minwọn;mije imumechieen̄ kan̄ ìbabia ire mgbọ geelek.
2 Enyi ebi Ijeren ìtumu ibe,
“Imumechieen̄ kan̄ ìbabia ire mgbọ geelek.”
3 Enyi ebi uwu kè Erọn, ebi ngwugwa, ìtumu ibe,
“Imumechieen̄ kan̄ ìbabia ire mgbọ geelek.”
4 Otutuuk ebi ìkimin Awaji ìtumu ibe,
“Imumechieen̄ kan̄ ìbabia ire mgbọ geelek.”
5 Ǹkup me emen ukwook igwen Okumugwem,
inọnọ emi ida,
mè irọ inyi ǹnwọnọ.
6 Eyi Okumugwem okukup melek n̄a, ǹkabatet ukpook.
Ìre keke ke ogwu ebilene obokọt irọ emi?
7 Okumugwem ìkup me agba lek n̄a ikitap ubọk inyi emi;
eya orọ, mâsa chieen̄ n̄a imun̄
ubọk ọmọ obotim ikpan̄ ebi ìchacha emi.
8 Înwọn itatap ibot me irak ubọk Okumugwem
igak itotoon̄ ejit me lek ebilene.
9 Înwọn itatap ibot me irak ubọk Okumugwem
igak itotoon̄ ejit me lek ebi ilile.
10 Ebi ido geelek mîsa akọn̄ ikana emi me ijọn̄;
ire, njijaka ema isan̄a kpai,
sa me erieen̄ Okumugwem.
11 Ema ekakana emi okokop;
iin̄, ekakana emi me agan̄ geelek;
ire, sa me erieen̄ Okumugwem, njijaka ema isan̄a kpai.
12 Ema egwogwook ichit emi kubọk akwọọk;
ire, ema mîniin̄ ita mgbọ yaage
kubọk ukan̄ lek oron mkpatat;
sa me erieen̄ Okumugwem, njijaka ema isan̄a kpai.
13 Ebi ochicha mîbieen̄ emi inwan,
ire lek ebetim ikpan̄ emi;
ire, Okumugwem onenitap ubọk inyi emi.
14 Okumugwem okinyi emi unye;
ọmọ ore ogwu nkikọt okwa isa itọn̄;
ọmọ ore ogwu unyan̄a n̄a.
15 Okwa ubelejit mè ntim-mkpan̄
òkitaan̄ me emen uwu ọfọ ebi ata irọrọ ikibe,
“Okumugwem îsa ikpele
unye ubọk ulom kan̄ itim ikpan̄.
16 Ubọk ulom Okumugwem îkaan̄ unye enenen;
Okumugwem îsa ikpele unye
ubọk ulom kan̄ itim ikpan̄.”
17 Emi ǹkabakwu-nu;
m̀bagagat ugwem,
mè ikitumu inu Okumugwem orọbe isibi.
18 Okumugwem îsut emi osusut ininọọn̄ me lek;
ire, ìkachieek ibe emi ǹkwu.
19 Ìgwuku otunchit ebi ata irọrọ ekije itibi ìnyi emi,
inyi ǹraka ǹnin̄, mè ǹsi ǹnyi Okumugwem itọn̄.
20 Eyiyi ore otunchit Okumugwem;
îre ebi ata irọrọ ebeje itibi otunchit yi iraka inin̄.
21 Ntọn̄ owu Okumugwem,
mije, owu onọ emi ida,
mè inyan̄a emi isibi.
22 Ewuuk ebi ìnama uwu ejitbe,
ọmọ oyaka inikana atà ibot uwu.
23 Eyi ìre inu Okumugwem orọbe,
inu yi îjaan̄ enenen me chieen̄ kiji.
24 Eyiyi ìre usen Okumugwem odọmọbe isun̄;
eji ebele ejit, mè erie ijọk me egwe usen yi!
25 Nyan̄a eji, jei Okumugwem, soso nyan̄a eji,
mè rọ inu ije ijaan̄ me lek kiji!
26 Ugbana ikup inyi ogwu ònu me erieen̄ Okumugwem!a
Eji ekup me Uwu Mbuban Okumugwem igbana enyi.
27 Okumugwem ore Awaji;
ọmọ îrọ inyi utoon̄ kan̄ itoon̄ eji me lek.
Ìtap olik me ebek anam ijọk cha,
mè ìtaba ìtobo me lek ntook ngwugwa.
28 Owu ore Awaji n̄a, mânyi owu itọn̄;
owu ore Awaji n̄a, mâbene owu ifo inyọn̄.
29 Ebilene, ìnyi Okumugwem itọn̄, mije, ọmọ minwọn;
mije, imumechieen̄ kan̄ ìkibabia ire mgbọ geelek.