Ịdi aHosia amoghiom Ịzirel
14
Weye Ịzirel, iḅula esi Ọmoogh-we Ẹnaan phọ anyina. Ịkaraph anyina meḍighi ịdi nyina mekpetaan emeel. 2 Iḅula esi Ọmoogh-we phọ; ẹrol dị ịiḅereghi phọ ịphen eḍighi ẹkia dị nyina ẹphighiron ẹngo nyọdi: “Sạr oomo ịkaraph ayoor ạwile, ạnaghanan ịiḅereghi phọ ayoor, kụ yoor kooseeny ni nyịna ịdipho yoor moguanaan bọ. 3 Asiria kótue ụphel iyoor kụ ịnam-ạsu ẹgham kétue iikpereghi iyoor. Yoor kọ́ḅeni mun ịkaaghineen ạrumugh mọ bịdi kụ Ẹnaan ayoor. Ọmoogh-we, nạ bịn kụ raḍeenaan ghan ọnma ighirigiir bụnyigo ạnmuny.”Ọmoogh-we phọ aguanaan ọngo akumoom aghuḍum weye Ịzirel
4 Ọmoogh-we phọ ạḅem mọ,
“Mị kaḅulemi ni we phọ ạmi loor ạmi.
Mị kạpomoghian bịdi rꞌoomo ologhi ạmi.
Mị kạ́kagham mun bịdi ologhi.
5 Esi awe phọ Ịzirel mị kạkigh
ịdipho ọlophia dị aakuom ḍịgharaghar ade.
Bịdi koonmenan ịdipho ạsifalaway;
ạsini ạbidi kẹkpaph ude agey
ịdipho ireeny phọ ạLebanon.
6 Bịdi kọtol rꞌakumoom aghuḍum,
kụ ọnighe ịdipho ireeny ọliv.
Bịdi kopur ịma eḍu
ịdipho ọsaga phọ ạLebanon.
7 Bịdi kọḅile ni ọtol ọnhu-aḍibuo ạmi.
Bịdi kopoph ịdipho ịizupha oghoony
kụ omuum iimuma ịdipho ozo ireeny avain.
Bịdi komitiom ḍien ịdipho amiim.
8 Awe phọ Ịzirel kọ́moogh mun ịyaar oḍighinom ịkaaghineen ạrumugh.
Mị kạnaghanan ni ịiḅereghi phọ ạbidi kụ ạmaar ạpam bịdi.
Ịdipho oreeny dị ọnam rákeel ghan kụ ịdi mị kakoph bịdi;
Oomo ạḍiseph ạbidi kẹḍua esi ạmi kụ emite.”
Ekureriom mọ
9 Ạbulo ọmoogh ologhi ọnaghanan ịpe ọge bọ sịen, kụ bịdi ọnaghanam ḍụghum. Areten Ọmoogh-we phọ eeleeny ni, kụ awe aruukuan rọdaphan ghan kụ kọrol, abuḍighinom ịkaraph okpetaan ghan romeel loor esi dị bịdi okel reten phọ ọdi.