Ạḍuor omoghinaan aTaya
27
Ọmoogh-we phọ ụḅeni ịmi mọ, 2 “Oye dị kamugh ni, mọor ḍụor omoghinaan aTaya, 3 ẹmha phọ ẹpe phọ edi bọ ọogaany ọphiiny kụ remuulan ghan bọ ḍighi rꞌawe lọ orugh tọrobo ọgbal ọphiiny. Ḅẹni nyọdi ịphen Ọmoogh-we dị ạmoogh oomo ịikpo phọ rạḅem bọ:“Taya, nạ uubaga ịlo ẹser-sẹr ẹnighe ạna,
4 Amarugh ạna pọ ọphiiny.
Awe phọ ọlogh bọ nyịna ụghighemi ịma ụnwunyaru;
5 Bịdi ụsighe ịma ireeny ẹpe Eegum ạHermon kụ odoghoḍiom
kụ inmom-nmom ọsaga ạLebanon kụ ẹdi ọmeremiom ghan ạgalaga.
6 Bịdi ọsighe sịogh ẹpe Bạsan kụ ọkaam ịlom;
bịdi ụdiom ude ụnwunyaru phọ ireeny dị ọsighe ẹpe Sạipros
kụ okpiom oḍu ọoma
7 Rukpe arughuugh ịzoghi phọ uḍighinom ọnemeneme ukpe,
ịnemeneme arukpe dị olho dị ọsighe ẹpe Ijipt,
dị kꞌẹekela bịn kọlogh ni elegh.
Rukpe ookpereghiom ạraraar uḍighinom ọkar ịma ukpe
ozu oghozo dị ạḍua ekpu-ogbo phọ ạSaipros.
8 Awe ịzoghi phọ ạna ạbuo ạramha aSaidon rꞌAvad.
Awe ẹmaar ạna ạbuo ịzoghi phọ.
9 Bụo ạmaka ụnwunyaru phọ
awe ạbuo ạBiblos dị ọkar ọtughemi.
Bụo ịzoghi dị ọḍua tọrobo ụnwunyaru dị odi ghan ọphiiny
omuul ḍighi ologhi aruutu aḍighi ạna.
10 “Awe ẹgham bụo aPasia, Lịdia rꞌạLibia ụrolan rꞌaḍita ẹgham ạna. Bịdi ukereri ịsuaram ạbidi rꞌaroghoony ạbidi esi ạdol phọ ạna. Bịdi kụ awe phọ oruomaan bọ nyịna ḍien igbogh phọ. 11 Awe ẹgham ạbuo Avad kụ uphogh ghan iikpe ạna, kụ awe ạbuo aGamad ophogh ghan iiphopha aruutu phọ ạna. Bịdi ukereri ịsuaram ạbidi loor iikpe ạna. Bịdi kụ awe phọ oḍighi bọ ịdi nạ ạnighe.
12 “Nạ umuul ghan ḍighi ẹpe Spen kụ ạsighe silva, okuron, ạmama, rꞌạleezu kụ ạkpiom ịbalabala aruphua. 13 Nạ umuul ḍighi ẹpe Gris, Tubal rꞌạMesek kụ aanmenenom rạraar ạna rẹbene rꞌạraraar enaba. 14 Nạ uunmenenom rạraar ạna rụsu oḍurom adool, ạrusu ọghimom ẹgham, rꞌịnam adool dị ẹḍua ẹpe Bẹt Togama kụ eru. 15 Awe ẹpe Rods umuulan ḍighi rꞌạna; awe ịigaany ạriphiiny ụngo nyịna oḍu-ạruuma rꞌiḍiil ireeny oonmenenom aruphua ạna. 16 Awe ạSiria ugho rạraar aḍighi ạna rꞌịbadi aruphua ạna. Bịdi ụngo ẹmerald, rukpe ozu oghozo, ilooneen arukpe, ogey ọnemeneme ukpe, ibi rꞌịtogh-tọgh ạraraar ọkpiom aruphua ạna. 17 AJuda rꞌỊzirel ụkpiom ruphua ạna ẹnuum aḍiowo, mụnum-ọliv rꞌạraraar ọdughemiom ịisa. 18-19 Awe ạDamaskos ugho ruphua ạna kụ ọkpiom miim dị ọsighe Hẹlbon rꞌawul dị ạḍua Sahar. Bịdi ugho ruphua ạna kụ ọkpiom rukuron rꞌạraraar eḍu ịisa. 20 Awe aDedan ugho ruphua ạna kụ ọkpiom rukpe ọde ọrolom. 21 Awe Arebia rꞌawe dị ọda de aKedar ụkpiom ruphua ạna nmụny iyool-ịga rꞌiyool-ịga rꞌạrutu-ịga. 22 Ruphua ạna, abumuul ḍighi ẹpe Siba rꞌaRaama uunmenenom ikpo ẹbe rꞌagol rꞌịma ạraraar eḍu ịisa. 23 Ạramha phọ ạHaran, Kane rꞌIden, abumuul ḍighi aSiba, ạramha Ashur rꞌaKilmad — oomo ạbidi umuulan ghan ḍighi rꞌạna. 24 Bịdi aalha nyịna rukpe dị ẹnighe iboom, rukpe ozu oghozo rꞌịdi olooghi, reetere ọde ude dị ẹnighe, rꞌiḍigh dị ọmaar ọphur. 25 *Ruphua ạna ụsaanyom ghan ḍita igbogh ạrunwunyaru.
“Nạ ụghigh oghuugh ephua dị odi ạnyu ạmuum ọphiiny
dị ạsaany ḍiboom adool.
26 Mem dị awe ịlom mọ ạna ọsighe nyịna omitiom ẹpe ọphiiny,
ookuugh emitenom erumuḍio aḅiemi nyịna ogbo ọphiiny.
27 Oomo ẹelha aruphua ạna,
oomo ạbuo ịzoghi phọ odianan bọ ḍita phọ,
ạbuo ạmaka ịsiphe ụnwunyaru phọ rꞌabumuul ḍighi ạna,
tọrobo oye ẹgham lọ odi ụnwunyaru phọ —
oomo, oomo awe uphe ụmuum
mem dị ụnwunyaru phọ ạna aḅi.
28 Ịlooghi awe ịzoghi phọ roḅiighi bọ
imenyon oogbom ọphiiny phọ.
29 “Tọrobo ụnwunyaru, awe phọ mọḍuaghu
kụ tọrobo oye sịphe phọ apun ạnyu.
30 Oomo ạbidi romoghinaan nyịna iboom,
rookuom ophugh ẹmhu kụ kookila ude loor ọoru.
31 Bịdi ọtuan nyịna okula rụmhu
kụ oonmenan rukpe-ọto.
Iloghi ạbidi ị́ḅaal kụ romoghi.
32 Bịdi ọmooraan nyịna ḍụor amaḍi;
‘Ạnhian kụ ẹdi kọtomaam Taya,
Taya ẹmha phọ mokpomori bọ ẹpe ude ọphiiny?
33 Mem mọ ọsaany ghan bọ ruphua ạna ọghi ẹmha ẹḅeenyom ạriphiiny,
nạ uḍighi ịiḅaghami ạngo tọrobo eelhe.
Ạbudaam uḍighi we ikpoki
esi ẹelha aruphua phọ ạna.
34 Nyịidipho nạ maḅi ọphiiny,
nạ maḅi kꞌude ạmuum otu-ḅualhe phọ.
Aruphua phọ ạna rꞌoomo ạbuphe roḍighinaan bọ nyịna
mophe rꞌạna ẹpe ọphiiny phọ.’