Ạḍuor Ọto
19
Ọmoogh-we phọ ụḅeni ni ịmi ọmoor ạḍuor ọto phọ aḍien ịlo ịyal ịkpana ạraalha Ịzirel:2 Eeghe ẹya ạnam-dịka dị onhiin ạna aḍighi!
Ọdi aakonom nmụny ọdi ogbo ịigama ilephiri ạnam-dịka.
3 Ọdi aakonom mọony kụ ạtughemi nyọdi ịlo ịtaya;
ọdi aḍighi ọbaam-awe.
4 Areelhe phọ ọnaghan ịlo ọdi
kụ osiph nyọdi ḍiphil ologhi ooni.
Rꞌạsiḅaph bịdi ọghogh nyọdi ọsighe osiemi Ijipt.
5 Ọdi akori tụtu ọdi ạmiin mọ oomo oḍuom ologhi maphe.
Pọ kụ amem dị ọdi aakonom ọnon ọony ọdi,
kụ ọdi aphoph aḍighi ẹegama ạnam-dịka.
6 Mem dị ọdi maphoph ạmanam,
ọdi arelhe ghan rꞌịpheri phọ ạnam-dịka phọ.
Ọdi kẹn ạtuugha ịlo ịtaya kụ aḍighi ọbaam-awe.
7 Ọdi aḅomoghi ịikpara arikpisi, ọdi aphiemi rạma.
Awe ịsiphe ade phọ ariḅio ekaph tọrobo amem lọ ọdi aroraan.
8 Areelhe phọ ookpomoghan eenan ọdi;
awe ọḍua tọrobo ekpisi oru.
Bịdi ọotarion ịzuguru ạbidi
kụ osiph nyọdi ologhi aḍiphil ạbidi.
9 Bịdi ọlogh nyọdi ologhi okporoma
kụ ọsighe nyọdi ọghiom ogbogh ọdaam ạBabilon phọ.
Bịdi oseere nyọdi esi dị rokori ghan,
ọbo eḍighi mạar dị ororaan ọdi kọ́naghan mun
ạnyu aroogbolom phọ Ịzirel.
10 Onhiin ạna ạghigh eghuuny oreeny-amiim avain
dị ọzuph otumeniom okol.
Loor esi dị ạmuum ạrol bọ iboom,
oreeny-amiim mọ ạmoogh rịnya rꞌarughuuny.
11 Ịla ọdi ẹkpar,
kụ ephoph eḍighi ịkpara ọdaam.
Oreeny-amiim mọ aphoph ạkasian ịlo osi arukuaḍio phọ;
tọrobo oye ạmiin ịdi ạrinya rꞌaḍiphoph ọdi ẹrol.
12 Kụ ọlo ạraghaagh ophin ologhi eruphuron nyọdi sịphe ạsini phọ
kụ eroph nyọdi sịphe ude phọ.
Ookuugh phọ ẹpe erumuḍio phọ remite ghan bọ ạgharagharami rughuuny ọdi.
Ịla ọdi uḅonyon ni ọsighe;
bịdi ẹgharaghar kụ oguom nịan.
13 Nyịidipho nyọdi ọzuph sịphe ẹdala ịisaar phọ,
ologhi ade dị ẹgharaghar kụ ạmuum úlho.
14 Ogboku oreeny-amiim mọ akoph nịan;
ạnian ele ẹman ịla rꞌarughuuny ọdi.
Ịla phọ kẹ́ḅile mun ẹ́moogh ịikpo,
kéḍighi mun ịkpara ọdaam.
Ḍịen kụ ạḍuor ọto; ḍịdi mọmoor ri kụ ọḅile ọmoor.