2 Ẹnaan ịḅeni ịmi mọ, “Oye dị kamugh ni, awe phọ ạbuen ọpam ịkaraph igbiighi kụ ọngo ọkaraph oroma sịen ẹmha phọ ẹphen. 3 Bịdi ọḅem ghan mọ, ‘Esugha ẹnum yira kọḅile omiigh ọloghoḍi aruutu. Ẹmha phọ ẹkigh ịdipho aguugh dị rọsaam ghan kụ yira ọtol ịdipho ẹnam mọ edi bọ ologhi phọ, kụ ọlo tọrobo ịlo ẹrol ọdi ughoph ni iyira esi ạnian phọ.’ 4 Nyịidipho loor ịphen phọ, ḅạaghiom bịdi, Oye dị kamugh ni.”

5 Uwaloor Ọmoogh-we phọ aḍigh loor ạmi, kụ Ọmoogh-we phọ ụḅeni ịmi ọngo awe phọ dom mọ ạḍien: “We Ịzirel, mị alegheri ni ịpe nyina rẹḅem bọ rꞌịpe nyina regbiighi bọ. 6 Nyina mẹze ḍita awe sịen ologhi ẹmha phọ dị reten phọ asizu dị memuughu kụ emuza.

7 “Esi ịduon phọ, ịphen kụ ịdi mị Ọmoogh-we dị ạmoogh oomo ịikpo phọ rịḅeni inyina. Agey ni ẹmha phọ ẹphen ẹkar ẹkigh guugh dị rọsaam ghan, kụ ọlo eeghe kụ ẹnam mọ? Iimugheeny asizu phọ ạbuphe nyina mẹze bọ! Nyina kẹ́tol sịen — mị kiroph inyina amitiom sịen ẹmha phọ! 8 Nyina rekiilaan ni rolhool ẹgham ḍụghum? Mị kạsighe atu we rꞌarolhool ẹgham ịlo ozuom anyina. 9 Mị kịsighe inyina amitiom sịphe ẹmha phọ kụ ịḅogh inyina ẹngo ruuruen. Mị masoph ọoruen aḍuugh ịngo inyina, 10 kụ kịze inyina mem ẹgham sịphe eelhe phọ anyina. Pọ kụ amem dị tọrobo oye kalegheri mọ mị kụ Ọmoogh-we phọ. 11 Ẹmha phọ ẹphen kíghoph inyina ịdipho aguugh rakoph ghan bọ ẹnam lọ edi ologhi ọdi. Mị kịliom inyina tọrobo ekpisi lọ nyina kẹtol sịphe ade phọ Ịzirel. 12 Nyina kelegheri mọ mị kụ Ọmoogh-we phọ kụ mọ ịdipho nyina eeko ghan bọ iilogh areelhe phọ ituman bọ inyina, nyina ịkaaghi ghan iilogh ạmi kụ ị́naghanan ghan ịtooghi phọ ạmi.”

13 Ịduon mị rạkaaph bọ ọghaaph phọ, aPelataya ameel bịn amugh. Mị alher loor ạmi azumeri risigh sịphe ude phọ kụ ạlho, “Kị́dipho, Ọmoogh-we dị ạmoogh oomo ịikpo. Nạ kakiigh ni tọrobo ọlo asugha sịen Ịzirel ḍụghum?”

14 Ọmoogh-we phọ ụḅeni ịmi mọ, 15 “Oye dị kamugh ni, awe phọ bụphe orugh bọ sịphe Jeruselem rọkaaph ni ịlo anyina ḅịle rꞌạbueri phọ ạbuo Ịzirel phọ odi bọ dọl iiruen phọ. Bịdi ọḅem ghan mọ, ‘Bụphe odi bọ dọl iiruen phọ ọkelan ọpughan ịlo ooseeny Ọmoogh-we phọ. Ọdi mụngo iyoor de phọ ọmoogh.’

16 “Nyịidipho, ḅẹni bụeri phọ rꞌạna edi bọ dọl iiruen phọ ịpe mị rạkaaph bọ. Mị kụ ọdi ạsighe bọ bịdi ạghi orugh ịsiphe areelhe phọ ẹkel bọ kụ ạwalalami bọ bịdi ologhi ịnon areelhe. Ghạlamo ịduon phọ ni, nyịidipho phọ mị kạtolan ni rꞌạbidi sịphe arere phọ ẹpe bịdi mọghi bọ.

17 “Esi ịduon phọ ḅẹni bịdi ịpe mị Ọmoogh-we dị ạmoogh oomo ịikpo phọ rạḅem ghan bọ. Mị kaakpomoghi bịdi amitiom sịphe areelhe phọ ẹpe mị ạwalalami bọ bịdi, kụ aḅulemi de phọ Ịzirel ạngo bịdi. 18 Mem dị bịdi origheel, ẹkpe ni dị bịdi kopiemi oomo ịkaaghineen ạrumugh isa phọ ịpe bịdi ọmiin bọ. 19 ^*Mị kạngo ni bịdi emoom ekpom rꞌomoom ologhi. Mị kạsighe ni ekpom aḍighiigh oḅom ẹmhu phọ ạbidi ạḍuanam kụ ạngo bịdi ekpom ọnaghanan. 20 Pọ kụ amem dị bịdi kooko iilogh phọ ạmi, ọḅile ọnaghanan oomo ịtooghi phọ ạmi rꞌoomo iloghi ạbidi. Bịdi koḍighi we ạmi, kụ mị aḍighi Ẹnaan ạbidi. 21 Kụ ọlo mị kạliom ni we phọ ạbuphe ọphomoghian bọ ooseeny ịkaaghineen ạrumugh isa phọ. Mị kạliom bịdi esi ịpe bịdi moḍighi bọ.” Ọmoogh-we dị ạmoogh oomo ịikpo kụ mạḅem.

22 ^*Ạruukpaany aghuḍuul phọ imiigh ni ọpheeph, kụ idighila phọ ẹghi rꞌạbidi. Ạḍiḅaal phọ rẹtaphan bọ ḍịphe esomanan Ẹnaan phọ Ịzirel ẹrol ạnyu ạbidi. 23 Pọ kụ amem dị ạḍiḅaal phọ rẹtaphan bọ ẹḍua ẹmha phọ kụ erelhe ẹghi sịphe ẹeḅaraph phọ edi bọ ạga ẹmha phọ ẹpe erumuḍio phọ remite ghan bọ. 24 Sịphe uḍien phọ uwaloor phọ Ẹnaan uphoophe ịmi ạnyu kụ uḅulemi ịmi aruom bụphe ọrol bọ dọl iiruen sịphe Bạbilonia. Kụ uḍien phọ agbi ophe, 25 kụ mị ạḅeni bụphe ọrol bọ dọl iiruen phọ tọrobo ịyaar dị Ọmoogh-we phọ muḍeenaan ịmi.