AJerimaya rꞌawe aRekabait
35
*Mem dị aJehoyakim ọony phọ aJosaya aḍighi ọdaam-ẹmha phọ aJuda, Ọmoogh-we phọ ụḅeni ịmi mọ, 2 “Kịa ạteeny we ọto aRekabait kụ ạḅaanaan bịdi, kụ ạsighe bịdi arumom nyoniin osoph Otu Ịiḅereghi phọ kụ ạngo bịdi miim.” 3 Kụ mị ạsighe oomo ọto aRekabait phọ — Jaazanaya (ọony ọnon aJerimaya dị aḍighi ọony aHabazinaya) rꞌoomo abumor ọdi rꞌạnmuny ọdi — 4 kụ ạpham bịdi arumom Otu Ịiḅereghi phọ. Mị ạsighe bịdi aḍighom osoph abutelhedom oyil aHanan ọony Igdaliya. Osoph phọ ọphon ạrol risigh osoph aMaaseya ọony aSalum ọnyo oḍighi dị ạman mạar sịphe Otu Ịiḅereghi phọ, kụ atuman iisoph ạbueri phọ awe iiḍighi phọ, 5 Kụ mị ạsighe rạphaal rꞌiḍukuru ạsigbagba dị omuzeḍi miim asereghi risigh awe aRekabait phọ, kụ mị ạḅeni bịdi, “Itiin ẹnum amiim.”6 Kụ bịdi ọphagharaan mọ, “Yoor rọ́pughol ghan miim. Ọde ọde ayoor Jọnadab ọony aRekab ụḅeni iyoor mọ yoor rꞌạnmuny ạnmuny ayoor kụ́pughol ghan miim. 7 Ọdi ạḅile ụḅeni iyoor mọ yoor kụ́loghoḍi ghan ruutu, kúḅeph ghan iizo, ḅịle kụ́moogh iizo ireeny iimuma ghạlamo rꞌogho kẹn. Ọdi ụḅeni iyoor mọ yoor ọrol ghan oomo amem iloghi arugbogo, ọbo yoor ọrol ghan sịphe yoor odi ghan bọ mụdi aruuruen phọ. 8 Yoor mọdaph ni oomo oromoghiom mọ ạJonadab ụto bọ iyoor. Yoor rꞌaloor miim rọ́pughol ghan, ạnmariir ayoor kẹn, alephiri ạnmuny ayoor rꞌạnmanyaan ayoor. 9-10 Yoor ụ́loghoḍi ruutu oḍighi ariisi ạdol — yoor otughogh iloghi arugbogo — kụ yoor iizo ireeny iimuma, iizo ịbiakpa ụ́moogh, Yoor mọkar ri ọdaphan oomo ịlo ạJonadab ạto ụngo iyoor. 11 Kụ mem mọ ạNebukadnezar ogbogh ọdaam mọ aḍigh bọ eelhe phọ rꞌẹekpara ekpeḍien, kụ ẹdi yoor ụutughian bọ oru sịen Jeruselem ịlo okpetenaan we ẹgham mọ ạBabilon rꞌạSiria. Ịdipho kụ iḍighi bọ kụ ẹdi yoor odi ghan bọ Jeruselem.”
12-13 Kụ Ọmoogh-we Egbogh Ẹnaan phọ Ịzirel ụḅeni ịmi ọghi ọḅeni awe phọ aJuda rꞌaJeruselem, “Mị Ọmoogh-we phọ rạwa opuru anyina ịpe eḍighi bọ kụ nyina ímeera bọ ọnaghanan ạmi rꞌọḅile ọdaphan ịtooghi phọ ạmi. 14 Ạnmuny ạnmuny ạJonadab mọdaphan ịto phọ ọdi mọ miim kụ́pughol ghan, kụ kꞌaḍio phọ kꞌarodon rꞌoniin ọnyo ạbidi kạ́pughol miim. Kụ ọlo mị odi ghan ni rịḅeni inyina kụ nyina ịmi kị̋naghanan. 15 Mị miruom ghan ni inyina oomo abutelhedom mọ ạmi, riil phọ kụ bịdi mịḅeni inyina ọwile yogh ẹkaraph eḍighinom ạraraar kụ eḍighi ghan ịlo ẹnighe. Bịdi ịḅeni ghan inyina mọ kéeseeny ịnon ạrumugh ẹrol dị nyina ẹtol ẹkiom ghisigh de phọ mị ịngo bọ inyina rꞌạburude ạburude anyina, kụ ọlo nyina ímeera ọnaghanan ạmi ḅịle rꞌoler ạruru ọnaghanan mem lọ mị rạkaaph. 16 Ạnmuny ạnmuny ạJonadab mọdaphan oromoghiom mọ ạburude ạburude phọ ạbidi ọto bọ ọngo bịdi, kụ ọlo nyina ịmi kị̋naghanan. 17 Kụ nyịidipho mị Ọmoogh-we Egbogh Ẹnaan phọ Ịzirel kiruomaan inyina awe phọ aJuda rꞌaJeruselem oomo oogulemi phọ mị aguanaan bọ. Mị kaḍighi ni ịphen phọ loor esi dị nyina rẹ́naghanan ghan mem lọ mị ạḅem, kụ ẹḅile rémegheron ghan mem lọ mị ịmagh inyina.”
18 Kụ mị ạḅeni ọto aRekabait phọ, mọ Ọmoogh-we Egbogh Ẹnaan phọ Ịzirel mạḅem mọ, “Nyina mẹdaph ịto phọ ọde ọde phọ anyina Jọnadab ịngo bọ inyina; nyina mẹnaghanan oomo oromoghiom mọ ọdi, kụ nyina meḍighi oomo ạraraar lọ ọdi ạto ịngo inyina. 19 Loor esi ịduon phọ mị Ọmoogh-we Egbogh Ẹnaan phọ Ịzirel aguanaan ni mọ amem kẹ́tol dị ạJonadab ọony phọ aRekab kạ́moogh ọony ọony dị rakumu ghan ghisigh ạmi.”