AJerimaya sịphe otu ọlemom aroko phọ
18
Ọmoogh-we phọ ụḅeni ịmi mọ, 2 “Kịa ẹpe otu ọlemom aroko phọ; ẹpe kụ ẹdi mị karom nyịna dom mọ ạmi.” 3 Kụ iḍighi kụ mị ạghi bọ ẹpe phọ kụ mị ạmiin ọlemom aroko phọ dị ọdi rạlem. 4 Tọro amem lọ oko phọ ụ́nighe agey, ọdi ạsighe ạḅay phọ ạlemom ẹnon ịyaar. 5 Kụ Ọmoogh-we phọ agbi ọḅeni ạmi mọ, 6 “Mịna ụ́moogh elhiom ọsighe anyina awe phọ Ịzirel oḍighinom ịpe ọlemom aroko phọ aḍighinom bọ ạḅay phọ ḍụghum? Nyina edi ḍịghaagh ạmi ịdipho ạḅay phọ odi bọ ḍịghaagh ọlemom aroko phọ. 7 Tọro amem lọ mị ạḅem mọ mị katuphuron mụghumo oḅomoghi mụghumo oogulemi eelhe mꞌọmar phọ, 8 kụ eelhe phọ ẹpe phọ okiton esi ịkaraph phọ ạbidi, mị káḍighi mun ịpe mị ạḅem bọ mọ mị kaḍighi phọ. 9 Ḍịeri phọ ạḍighaagh phọ, eḍighi ịyaar dị mị ạḅem mọ mị kạzuph mụghumo ophighi eelhe phọ mꞌọmar phọ ạkparami, 10 bịn kụ eelhe phọ ẹpe phọ ụ́naghanan kụ ọḅile oḍighi yogh ịkaraph, pọ mị káḍighi mun ịpe mị ạḅem bọ mọ mị kaḍighi phọ. 11 Kụ iḍighi kụ ḅẹni weye phọ aJuda rꞌaJeruselem mọ mị ragbiighi ni ạḅile raakolobian ọliom ạbidi. Ḅẹni bịdi mọ ọwile ọrol ạdol ịkaraph — mọ bịdi onme reten phọ rꞌeḍighinom ạraraar phọ ạbidi. 12 Bịdi kọpagharanaan mọ, ‘Eeye, yoor kọtuan eeghe kụ onmia bọ? Oomo ayoor kọtolom ni ẹekpara ẹmhu phọ rꞌịkaraph phọ ayoor.’”
Awe phọ okel Ọmoogh-we phọ
13 Ọmoogh-we phọ rạḅem mọ,
“Ipuru tọrotoro eelhe mụghumo ọdo phọ ịphen phọ memite ghan ni.
Awe phọ Ịzirel moḍighi iikia!
14 Ạnyu asighiigh aruugum mọ ạLebanon mẹrol ghan ni dị ibikpo íkar ḍụghum?
Asikol ạmuum mọ ạbidi mẹgharaghar ghan ni ḍụghum?
15 Kụ iḍighi ika nụun kụ awe phọ ạmi muwula bọ ịmi;
bịdi mọsu ịnsens ọngo ruru.
Bịdi mokpeteghaan sịphe eten phọ ẹpe bịdi mụki bọ,
bịdi rọ́daph mun igbaany areten phọ;
bịdi rotelhe ghan reten dị ụ́sam.
16 Bịdi mọsighe de phọ ạḍien oḍighi ịlo aruugu,
ịyaar dị kọḅitonaan kꞌagee-pọ.
Keḍigh ni ruugu esi oomo awe lọ roten;
bịdi kooḅoghomi ghan ni rụmhu ạbidi omaghagha.
17 Mị kạwalalami ni weye phọ ạmi risigh ẹpomoghian phọ ạbidi,
ịdipho ophugh lọ ookuugh phọ ẹpe erumuḍio phọ remite ghan bọ rapula.
Mị kạgumom ni bịdi ọman ạmi;
mị kạ́loghonaan bịdi ḍịghaagh mem lọ ịiḅaghami phọ eru.”
Omitenom ẹkaraph ezue aJerimaya
18 Kụ awe phọ ọḅem mọ, “Ịgua ophogh ịlo koḍighi Jerimaya. Ạbupinyon rịkia kọtol ghan ni ọtughemi ayira, aweye olegheri-ịyaar dị kuromoghiom ghan iyira, ḅịle kẹn rꞌariil Ẹnaan dị kogbeelom ghan dom Ẹnaan. Ịgua ọgbaaghi ịkaraph ọḅam ẹmhu ọdi, bịn kụ́naghanan mun ịlo ọdi ạghaaph.”
19 Kụ iḍighi kụ mị ạaḅereghi, “Ọmoogh-we, nạghan ịphen mị rạkaaph bọ ạḅile aler rụru ạnaghan ịphen ẹpomoghian phọ ạmi rọkaaph bọ ịlo ạmi. 20 Ịkaraph kụ iḍighi ruunmo ogey oye ḍụghum? Bịdi moguph ooni mọ mị umeel usuma. Tụutughian ịpe mị aghol bọ ẹmhu ạbidi kụ aru ạḅaanaan nyịna, pịdi nạ kạsighe ghan bọ ọghagh-ologhi kụ apoghom bịdi. 21 Kụ ọlo nyịidipho, Ọmoogh-we, bịle ọkoony ạze nmụny phọ ạbidi; ẹgham ẹze bịdi. Aburulhom mọ rꞌạnmuny phọ omuughu ọwile nmạriir phọ; alephiri phọ omuughu esi ạreezegh ḅịle kẹn ughel ạnmuny phọ omuughu erugh ẹgham. 22 Tom ḍita awe ọghi ekperenom owum rạraar amarugh phọ ạbidi; ḍighi ịdi bịdi komoghi loor aruugu. Bịdi moguph ooni mọ mị umeel usuma, ọḅile ọkpamaghi siphil osiphom ạmi. 23 Kụ ọlo, Ọmoogh-we, nạ alegheri ni oomo ịkaraph aruuzue phọ bịdi umitenom bọ ịmi okori oghiigh ạmi. Kạ́sar mun ịkaraph phọ ạbidi ạbilenaan bịdi. Sịghe ọghagh ologhi kụ anyuom bịdi alher.”