AJerimaya apuru Ọmoogh-we phọ ḍipuru
12
“Ọmoogh-we, eḍighi ịyaar dị mị ạgba ḍighiton phọ ạmi rꞌạna,nạ kạmoogh ni akeel.
Kụ ghạlamo ịduon phọ ni mị rạwa ni opuru ạna
ịlo ạraraar dị egbolomaam iiḅi ịiruen.
Eeghe kụ iḍighi kụ edughom edianaan ghan bọ bụkaraph awe?
Eeghe kụ iḍighi kụ ạraraar rẹnighenaan ghan bọ reepheeny?
2 Nạ ạzuph bịdi, kụ bịdi ọmoogh sịni;
Bịdi opoph kụ omuum iimuma.
Bịdi rọkaaph ghan ni ịma ịlo ạna oomo amem,
kụ ọlo bịdi ụ́kar ụ́moogh ịyaar oḍighinom ạna.
3 Kụ ạri, Ọmoogh-we, nạ ulegheri ni ịmi;
nạ rạmiin ghan ni ịlo mị aḍighi,
ḅịle kẹn rꞌịpe mị ạphomoghian bọ nyịna.
Kọgh bụkaraph awe phọ ạbuen amitiom ịdipho iyool-ịga lọ rọki ọze;
ḅạaḅaki bịdi aseere tụtu ẹteeny mem lọ kọkanyan bọ bịdi.
4 Ade phọ kẹkaraghar ịduon phọ kꞌạpur-aḍio,
ḅịle kẹn ạroogho phọ kạnuughi ịduon phọ kꞌạpur-aḍio?
Ịnam mọ rꞌịnun phọ remuughu
loor esi ẹkaraph eḍighinom ịyaar awe phọ ayira,
weye dị rọḅem ghan mọ, ‘Ẹnaan rẹ́miin ghan ịphen yoor roḍighi bọ.’”
5 Ọmoogh-we phọ ạḅem mọ,
“Jerimaya, eḍighi ịyaar dị mẹpher nyịna ophorogh awe,
nạ kaḍighi bọ ika kụ atue aporogh rụsu?
Eḍighi ịyaar dị nạ kátue ạmeera sịphe ạḍiyaghaghaany ade phọ,
nạ kaḍighi bọ ika kụ atue ạmerenyan ẹekpua phọ edi bọ ọgbal ạJodan?
6 Ghạlamo abumor phọ ạna, bụo asiya phọ ạna, bịn mookeleghi nyịna;
bịdi mọghi oḍighan ozuom ạna ẹgham.
Káḍuom bịdi ologhi, ghạlamo ịduon bịdi rọkaaph bọ ni ịlo ạrighiri phọ.”
Ọto Ọmoogh-we phọ loor esi awe phọ ọdi
7 Ọmoogh-we phọ rạḅem mọ,
“Mị mạḅitonaan Ịzirel;
mị maghel eelhe phọ mị ạsaḅar bọ.
Mị mạḅogh weye phọ mị ạphomoghian bọ
ạlogh ḍịghaagh ẹpomoghian phọ ạbidi.
8 Awe phọ mị ạsaḅar bọ mooghiraan uruphiom ịmi;
bịdi rogbophoghu ghan kuphoghom ịmi
ịdipho ạnam-dịka lọ edi ẹekpua,
kụ iḍighi kụ mị mạlhogh bịdi ḍien.
9 Awe phọ mị ạsaḅar bọ ọkigh ẹnun
dị aḍita ạroogho reesophoghian oghiigh.
Ịmagh ilhom ịnam
mọ eru eḍighan ạanyi!
10 Ịbadi ạbudaam iiruen areelhe moogulemi ozo amiim avain phọ ạmi;
bịdi mọozeghi iizo phọ ạmi,
bịdi mokiton ịma phọ ade phọ ạmi otene ẹdala.
11 Bịdi mọsighe otene ọkpagha;
ade phọ edi ni oopho bịn risigh ạmi.
Oomo phọ ade phọ meḍighi ophugh,
bịn kụ oye óphogh.
12 Awe ẹgham mọghi eten ẹdala phọ rẹḅeeny bọ roogbolom mọ
kụ role uruur rạraar ade phọ.
Mị marom mọ ẹgham ẹghi eegulemi de phọ;
oye ólho dị kạtolom rꞌẹepho.
13 Awe phọ ạmi ụzuph ni ịbiakpa, kụ ọlo ọku rọogho;
bịdi ukumuan ni agey, kụ ọlo ụ́moogh ịyaar esi oḍighi phọ.
Loor esi ogbogh ọghagh ologhi phọ ạmi
ịizupha phọ ạbidi íḍum.”
Oguan Ọmoogh-we phọ esi abumatuman Ịzirel
14 Ọmoogh-we phọ rạḅem mọ, “Mị ạmoogh ni ịyaar ọḅem dị egbolomaam bumatuman phọ Ịzirel, bụphe mophiemi bọ de phọ mị ạngo bọ weye phọ ạmi Ịzirel. Mị kạsighe ni bụkaraph awe phọ ạbuphe phọ sịphe areelhe phọ ạbidi ịdipho oreeny lọ oruphuron, ḅịle kẹn mị kạtagharan ni Juda ạsighe ḍịghaagh ạbidi. 15 Kụ ọlo mem dị mị mạsighe bịdi ạḍuanam, mị kạmoogh ni ọnma ighirigiir esi ạbidi; mị kạsighe ni tọrotoro eelhe aḅulemi ẹpe ade phọ ạbidi ḅịle rꞌẹmha phọ ạbidi. 16 Eḍighi ịyaar dị bịdi omeera mọ awe phọ ạmi ọtughemi bụno ịlo ooseeny ạmi rꞌoomo ologhi phọ kụ kokunya ghan mọ ‘Esi dị Ọmoogh-we phọ odi bọ ni’ — ọdo ịpe bịdi mọtughemi ghan bọ ni weye phọ ạmi oghunya rꞌaḍien aBaal — pọ bịdi kẹn koḍighi aani ni pạkiri awe phọ ạmi ḅịle kẹn edughom kẹtolonaan ni bịdi. 17 Kụ ọlo eelhe lọ ụ́naghanan, pọ mị kạkaraghi ni kụ atuphuron kụ aagulemi. Mị Ọmoogh-we phọ kụ mạḅem.”