4 Ọmoogh-we phọ ụḅeni ịmi ọḅeni awe phọ ọdi mọ, “Mem lọ oye ameel ude, ọdi rạ́ḅile ghan kaḅetenu ḍụghum? Eḍighi ịyaar dị oye aphe eten, ọdi ráaghiraan ghan kaḅula ḍụghum? 5 Eeghia kụ iḍighi bọ kụ nyina awe phọ ạmi ẹḍua bọ esi ạmi bịn réḅula mun bọ? Nyina ekuraam ịkaaghineen aruru phọ anyina bịn ímeera mun íḅula esi ạmi. 6 Mị ulher ri rụru agey, kụ ọlo nyina ị́kaaph igey. Rꞌoniin ọnyo anyina ókiriri loor esi ịkaraph phọ anyina; rꞌoniin ọnyo anyina ópuru mọ ‘Iḍighen kụ ẹdi mị ạpioman bọ?’ Tọrotoro oye rạki ghan eten phọ ẹpe ọdi bịn, ịdipho ạsu dị rọkimom ẹgham. 7 Ghạlamo ọgbaghaghaany bịn alegheri ni mem dị mẹkpe origheel; arukurughozo rꞌạsimugeem ḅịle kẹn rꞌạsimutia bịn elegheri ni mem lọ mẹkpe ọḍua ekpisi ọghi ẹnon esi. Kụ ọlo awe phọ ạmi úlegheri iilogh phọ mị rapoghom bọ bịdi. 8 Nyina kẹḅem bọ ika mọ nyina ẹsu ni iloghi, bịle kẹn mọ nyina elegheri ni iilogh phọ ạmi? Ịmiin, awe areekeleghian monme ẹgeom iilogh phọ. 9 Mosiphe umugholoor weye olegheri-ịyaar phọ anyina; bịdi úlegheri mun esi ọkpaph. Bịdi moghel ikpo ọnhu phọ ạmi; nyịidipho bịdi ọmoogh eeghia ọdo olegheri-ịyaar? 10 Kụ iḍighi kụ mị kạsighe iizo phọ ạbidi ạngo bumoom awe, ạḅile ạsighe nmạriir phọ ạbidi ạngo bụnon awe. Tọrotoro oye, mꞌogbogh mꞌọbam, rabianan ghan ọmoogh ikpoki ịkaraph areten. Ghạlamo ariil phọ ḅịle rꞌariil ạrikia phọ kẹn bịn roogbegheḍiom ni weye. 11 ^*Bịdi roḍighi ghan mụdiadi igbogh ạrelem awe phọ ạmi eḍighi riisi dị ịyaar bịn kụ ẹgoor. Bịdi rọḅem ghan mọ, ‘Oomo ạraraar ẹnighe ni,’ mem dị oomo ạraraar ị́nighe. 12 ^*Weye ạmi, umugholoor isiph ni inyina loor esi ạraraar isa phọ ịphen phọ nyina eḍighi yogh bọ ḍụghum? Eeye, umugholoor inyina ísiph rꞌẹnum; nyina ílegheri rolegheri ịlo okiriri. Kụ iḍighi kụ nyina kemeel li ịdipho ạbueri phọ momeel bọ; mem dị mị ịliom inyina, ẹpe kụ keḍighi eekuna anyina. Mị Ọmoogh-we phọ kụ ụḅem.”

13 “Mị ụwa ni ookpomoghi awe phọ ạmi, ịdipho oye raakpomoghi ghan bọ eḍien ibugha ọdi; kụ ọlo bịdi ọkigh oreeny avain mụghumo ạfig dị úmuum rughuuny, ghạlamo ạrinya phọ bịn mẹghara. Kụ iḍighi kụ mị mạngo ọgel mọ ạbunon awe ọsighe de phọ.”

14 Awe phọ Ẹnaan opuru mọ, “Eeghe kụ iḍighi kụ yira ọtol bọ bịn oḅoorian? Itu yira kokiil ọki ẹpe igbogh ạramha phọ oghoonyogh bọ kụ ọtol omuughu. Ọmoogh-we Ẹnaan phọ ayira mụḅogh iyira ạngo ḍuugh; ọdi mạsighe ịyaar dị kekiigh oye ụngo iyira mọ ọphughol, loor esi dị yira moḍighi ịkaraph esi ọdi. 15 Yira uḍuom ni ologhi ọmoogh ẹepho ḅịle kẹn rꞌamem arookonom, kụ ọlo aruugu ghụn kụ ạḅile aru. 16 Ẹpomoghian phọ ayira mosi ghụn ni ẹpe ẹmha phọ ạDan; yira rọnaghan ni ḍiphooghu ạrusu phọ ạbidi. Aruugu rasiph ni oomo phọ ade phọ mem dị ạrusu phọ ạbidi ẹḅeela. Ẹpomoghian phọ ayira moru oogulemi ade phọ ayira rꞌoomo phọ ạraraar phọ edi bọ sịen ade phọ, ẹmha phọ ayira rꞌoomo phọ awe phọ ọdi.”

17 Ọmoogh-we phọ ạḅem mọ, “Igona siloor anyina, mị mạsighe rạkaraph-ạraraar ratu sịphe ogbo phọ anyina, ạrakaraph-ạraraar dị oye kátue ạze, kụ bịdi kilomi ni inyina.”