2 Ạnyu ekpokolo ẹeḅaraph dị ịyaar répoph, gim ạlagba ẹgham mọ. Lọ ạghiom bụo ẹgham mọ kụ aphoophe ḍịghaagh ạna oḍeenaan ạbidi mọ mẹteeny mem ozuom ạrunhu-aḍibuo ẹmha phọ ephoophe bọ loor. 3 Ọmoogh-we phọ mạmagh amitiom bụo ẹgham obagaam mọ rꞌoḍuom ologhi phọ ọdi ịlo ee ẹgham iigbia rꞌọliom ạbuphe ọdi rạkagham bọ ologhi.

4 Iler rụru ẹnaghan ọyugh ạnyu ạraaḅaraph phọ — ạḍiaḅa oboom ọoloogh awe, ạḍiaḅa areelhe rꞌạramar awe dị reekpomoghan. Ọmoogh-we Ạbuo Ạraagham mọ raakolobian bụo ẹgham ọdi ịlo elephiri. 5 Bịdi ọḍua ịikela areelhe dị ẹkel ẹpe aruukuna aḅirini phọ kụ rotu. Loor esi ọghagh ologhi ọdi Ọmoogh-we phọ ratu ni oogulemi oomo eelhe phọ.

6 ^*Imoghi emoghi eephina! Aḍio Ọmoogh-we phọ mẹkpulan, aḍio phọ ḍịphe Ẹnaan Oomo Ịikpo phọ ketuom bọ muphe phọ. 7 Ạraghaagh ạtorobo oye kẹkporoghaan ni, kụ ạkpo ologhi ạtorobo oye ạḍua. 8 Oomo phọ ạbidi kokpereghaan ni kụ eephina phọ eler bịdi, ịdipho oghunughan dị rakun ạnir. Oniin kapogh nyoniin reegu, rꞌasighisigh umugholoor. 9 Aḍio Ọmoogh-we phọ retu ni — ḍio ọghagh ologhi rꞌofughughuuny phọ ọdi. Kokiton de phọ otene ẹdala, kụ tọrobo oḍighinom ịkaraph kopiemi ni. 10 ^*Tọrobo ẹenaan rꞌạtorobo egu ạraanaan kẹ́mu mun, mem dị erumuḍio phọ remite kebil li, kụ ụnwanyu phọ ḍịḅaal kạ́ngo mun.

11 Ọmoogh-we phọ ạḅem mọ, “Mị katuom muphe sịen ade phọ kụ ạliom oomo ạbukaraph awe esi ịkaraph ạbidi. Mị kasooromi tọrobo ọlo rabaga rꞌọlo igbagbaar. 12 Bụphe kokpetenaan bọ koku opu gol. 13 Mị kaḍighi ni ịdi ạsike phọ keekpeka kụ apighemi de phọ ẹḍua dọl phọ ọdi, ḍio phọ ạḍiphe mị Ọmoogh-we oomo ịikpo phọ kaḍeenaan ọghagh ologhi ạmi.

14 “Aruuruen phọ orugh bọ sịphe Bạbilon kokiil ọḍua okeel reelhe ạbidi, ọowalami ịdipho ạrunuen dị rekpetenaan bọ ịtaya, ịdipho iyool-ịga dị okoriom ụ́moogh. 15 Oye lọ osiph kogimi ni okiigh. 16 Bịdi ropogh ni kụ ẹloghonaan ílho, ịbam ạnmuny ạbidi kọgurogh ni ọze, ruutu ạbidi obumogh rạraar ọsighiogh, kụ nmạriir ạbidi kobiighi ni.”

17 Ọmoogh-we phọ ạḅem mọ, “Mị rạkpaariom bụo aMedia ozuom ạBabilon. Bịdi ụ́manami mạar silva kụ gol kẹn kọ́deghom bịdi. 18 Ọpham sịkumugh rꞌịkpina kọziom ni oomo ugheel phọ. Bịdi kọ́nma ighirigiir bụlo rọmaam mꞌọmoogh igbiririph ịbam ạnmuny. 19 ^*ẠBabilon kụ ọmar dị ạnighe apu oomo ịpheri phọ; ọdi kụ eghuan awe phọ ọdi. Kụ mị Ọmoogh-we phọ kapiemi ni Bạbilon ịdipho mị aḍighi bọ Sọdom rꞌaGomora! 20 Rꞌoniin oye kátugh mun sịphe. Ọlo Arebia dị rakiraan ólho dị kạḅile ạza ogbogo ọdi sịphe, kụ okoriom ịga ólho dị ịnam ọdi kẹḅal sịphe. 21 ^*Keḍighi esi dị ịnam ẹdala ịisaar ketugh rꞌesi dị aruukughum kẹlogh rutu ạbidi. Igbogh ịnun ketugh sịphe, kụ ipeleeny ịga kẹezeghi ghan rạraar phọ ọphueghi bọ eten. 22 Ibogh-otu phọ rꞌasigiga ạbudaam kemenyon ghan rꞌemoghi ạsino rꞌasuogh eḍum. Amem ophiemi ạBabilon mẹteeny! Ariiḍio ọdi remunughan kẹman.”