Ạḍuor ọngoom ạḍiseph
12
Aḍio retu dị awe kọmoor ghan mọ,“Mị aboom nyịna, Ọmoogh-we. Nạ ụghagham ni ịmi ologhi,
kụ nyịidipho nạ rụudereghi ịmi kụ ọghagh ologhi ólho mun.
2 *Ẹnaan kụ ọpelia ạmi;
mị kaḍuom ologhi nyọdi kụ káapuph.
Ọmoogh-we phọ rụngo ghan ịmi ịikpo rꞌịnyaam;
ọdi kụ ọpelia ạmi.
3 Ịdipho ạmubo ạmuum rạngo ghan bọ iboh we dị ạmuum rạpu,
ịdipho kụ ẹdi awe Ẹnaan robo ghan mem dị ọdi ạphel bịdi.”
4 Aḍio retu ni dị awe kọmoor ghan mọ,
“Ịngo ḍịseph Ọmoogh-we phọ! Ịmagh ọdi ạlogh ḍịghaagh.
Ịḅeni oomo areelhe phọ rạraar dị ọdi maḍighi yogh!
Ịḅeni bịdi ịdi ọdi ạbugh.
5 Ịmoor ẹghiom Ọmoogh-we phọ loor esi igbogh ạraraar phọ ọdi maḍighi yogh bọ.
Oomo aḅirini phọ ọnaghan ọghaaph phọ!
6 Oomo awe phọ orugh bọ sịphe Zạyon ọlo kụ ọmoor ghan!
Oye Aghuḍuul phọ Ịzirel ạbugh ni,
kụ ọdi odi ghan igbo awe phọ ọdi.”