Oye phọ
7
Pọ eeghe ọokia ọnyani dị nạ aru!Pọ eeghe ịdi ạrada ạna ẹnighe ologhi arokoro.
Ẹkulaam ạrugbo phọ ạna
ẹkigh rukumuan oye ạmaka.
2 Ẹkpa edi ni sịphe
dị amiim eeḅi eḍu rámuneen ghan.
Ạḍighoroghi ịbiakpa edi ni sịphe
dị ịma ạsifalaway esi ekoom.
3 Ịyal phọ ạramamaam ạna ẹkigh
ịyal ạrunuen mꞌizoogh dị ọmar ịyal.
4 Orum ạna ạkigh ẹsogolo esi otu ạnyu dị oḍighinom oḍu ọoma.
Ariḍien ạna ẹkigh rụudu ạmuum ẹpe ẹmha aHesbon,
etuman ọbalalaany ọnhu-aḍibuo egbogh ẹmha phọ ẹpe.
Izon ạna ẹnighe ịdipho ẹsogolo esi otu ạnyu phọ ạLebanon
ọpo ạmeera bọ rakori ghan ẹmha phọ Dạmaskos.
5 Ẹmhu ạna, ọpam ọmeremi ịdipho Eegum ạKarmel.
Ạsilaal phọ ạna ọkpa bọ ẹkigh ịma ọmelemele ukpe;
ẹnighe ọdi kesiph ni ọdaam ẹkananaam.
6 Pọ eeghe ẹnighenom mọ nạ ạnighe bọ;
pọ eeghe ịdi ạraraar ạḍiḅeeraan ẹphomoghian phọ ạna emunughan.
7 Nạ ạdugh-ọmiin ịdipho alhe dị ạmeera,
kụ ạramamaam ạna ẹkigh ịphunubun alhe.
8 Mị kạsiiny ni alhe phọ
kụ ạsonyon ikpo phọ.
Esi ạmi ạramamaam ạna ẹkigh sịgba iimuma avain;
aḍiphooghu ạna ẹkigh eeḅi eḍu ọmir,
9 kụ ọnhu ạna ạkigh ọkar amugey amiim.
Ạnir phọ
Ẹnighe ni dị amiim kakil ạteeny oye ẹphomoghian phọ ạmi,
akil ạnyu ịidoronhu rꞌạralhaal ọdi.
10 Mị ọlo oye ẹphomoghian phọ ạmi, kụ ọdi rụwa ni ịmi.
11 Tue, osegbe ạmaka ạmi, omite ọghi ẹpe ạrughulukul phọ
kụ ọmina ḍughul ẹpe ịbam ạramha phọ.
12 Yira koḅon oḅetenu kụ opoghoghom ireeny avain phọ
ọmiin mọ bịdi momiigh ni ophoph,
mụghumo ịpe ekpooghian bọ memiigh ọotaranu
kụ mụghumo arekpetughe phọ reḍum ni.
Ẹpe kụ ẹdi mị kạngo nyịna ẹphomoghian ạmi.
13 Nạ kapura ni eḍu ẹḍara
rꞌoomo ịma iimuma dị etuman ọnhu-aḍibuo ayoor.
Osegbe ạmasini ạmi, mị maakolobian aseenaan nyịna
rạraar ạḍiḅeeraan, igbaany rꞌimoom.