Oroma dị ọngo ọdaam mọ
31
Ịphen kụ ikpo ọnhu ẹepho dị onhiin ạLemuel ọdaam mọ ạḅeni nyọdi:2 “Nạ ọony ologhi ạmi, ọphagharanaan ịiḅereghi ạmi. Mị kạḅeni nyịna eeghe? 3 Kápiemi oomo ịnyaam ạna loor ipesi ḅịle rꞌoomo ikpoki ạna loor ạnmariir: bịdi mophiemi yogh ni bụdaam. 4 Nạghan, Lẹmuel. Ạbudaam kụ́pughol ghan miim ḅịle kụ́moogh ekpooko ạmuukpara amiim. 5 Mem lọ bịdi ọphughol bịdi obula iilogh phọ bịn ọḅitonaan riliom awe dị ị́nighenom. 6 Ạmuukpara amiim ạmuo awe lọ romuughu, mụo ạbuphe odi bọ esi ọmiinom. 7 Ọwile bịdi ọphughol owula ekulom mọ rꞌamukum ologhi phọ ạbidi.
8 “Kạaphanaan we lọ kótue ọkaaphanaan siloor. Pạmanaan riliom oomo ạbuphe ẹpelenaan ílho bọ. 9 Kạaphanaan bịdi kụ aḍighi oye igey ịiruen. Pạmanaan riliom arukulom mọ rꞌạbuphe ẹkparam bọ.”
Ogey ạnir phọ
10 Ẹkpar ri iboom ọmiin ogey ạnir! Ọdi ạman mạar apu ikpo-ẹbe.
11 Olhom ọdi ạmoogh oḍuom ologhi esi ọdi, kụ kátue ni bịn aḍighi uwekulom.
12 Oomo phọ amem mọ ạnir phọ raḍighi ghan nyọdi ịdi ẹnighe, kị́karaph.
13 Ạnir phọ óphooghian olho ghan awul rꞌọmur ukpe.
14 Ọdi ạpam ghan eḍien rikpisi dị ẹkel arighelom otu, ịdipho ụnwunyaru abumuul ḍighi raḍighi ghan bọ.
15 Ọdi kaḅetenu kụ egbi ọḅaal, ọsa eḍien dị kole rꞌọḅeni ạnmanyaan-otu phọ rukumuan dị bịdi kokumuan.
16 Ọdi agho de kụ aal, kụ ạsighe ikpoki phọ aḅephom ozo avain.
17 Ọdi ạkpar ri iboom ḍịghaagh, ạmoogh ịnyaam kụ ódugh rꞌamem.
18 Ọdi alegheri ịdi tọrobo ịyaar lọ ọdi aḍighi ẹman, kụ ạtol oḍighi kꞌogbo aḍughul.
19 Ọdi akool iri ọdi kụ aloom rukpe ọdi.
20 Ọdi ạngo ẹlo ạmoogh rukulom mọ rꞌạbulo ạsidol ẹkparam.
21 Ẹephoom nyọdi ị́iḅaghami loor esi dị eghunotu ạbidi ọmoogh rukpe ẹenyuum.
22 Ọdi ạkol ịma arukpe ọde ghan ẹmina kụ ạkpologhian ghan iḍiil ịma ịyegheyeghe arukpe.
23 Olhom ọdi, okpolom oye dị aaleghaan.
24 Ọdi ạnir dị rạkologh ghan rukpe rꞌikuughaam kụ kaala we asiḍighi.
25 Ọdi ạmoogh ịnyaam kụ ọlogh eghuan, kụ óghiilaan ịlo iḍue.
26 Ọdi rạkaaphom ghan rꞌolegheri ịyaar rꞌosooromi aloor.
27 Ọdi rakumuan ghan oomo amem kụ kazuumaam aphogh ịlo otu phọ ọdi ọwa.
28 Ạnmuny phọ ọdi rọngo ghan ni nyọdi ḍịseph, kụ olhom mọ ọdi raboom ghan nyọdi.
29 Ọdi ạḅem, “Ịbadi ạnmariir ilhom ọnighe ni, kụ nạ kụ ụkar ụnighe apu oomo ạbidi.”
30 Ẹnighe dị reemagha ghan kabi ni kụ ẹnighe epe, kụ ọlo ạnir dị aghueni Ọmoogh-we phọ ạkpe ni oboom ghan.
31 Kuom ghan nyọdi esi oomo iiḍighi phọ ọdi. Ạnir phọ ạkpe dị tọrobo oye kạngo ghan nyọdi eghuan.