Ịiḅereghi ọngoom ạḍiseph
138
Mị ạseph nyịna, Ọmoogh-we, rꞌoomo ologhi ạmi;mị rạmoor kạsephom nyịna risigh ạruukpaany kꞌẸnaan.
2 Mị asoman Otu Iigbia phọ ạna,
azumeri ẹmhu, kụ ạseph ḍien phọ ạna
loor esi ẹphomoghian phọ ạna rémuneen ghan bọ ḅịle rꞌamabi rạ́tol ghan bọ,
loor esi dị nạ maḍeenaan mọ aḍien ạna rꞌịtooghi ạna kụ ịkar igbogh.
3 Nạ ụnaghanan ni ịmi mem dị mị ạmagh nyịna;
ịnyaam mọ ạna kụ ịngo ịmi ịnyaam.
4 Oomo ạbudaam mọ odi bọ aḅirini phọ kọseph nyịna, Ọmoogh-we,
loor esi dị bịdi mọnaghan ịpe nạ aguanaan bọ.
5 Bịdi kọmoorom ịlo ịpe nạ maḍighi bọ
rꞌịlo eboom eegu phọ ạna.
6 Ghạlamo ịduon nạ odi bọ kꞌekpisi dị ẹkel ạnyu,
nạ rạpam ni bụphe osooromi bọ siloor,
kụ bụo ophoophe aloor kótue ọbooghian esi ạna.
7 Mem dị ịiḅaghami ikoom ịmi,
nạ ạmaar ụpham ịmi.
Nạ eenan bụmulogh-ḍien ạmi
kụ ụphelom ịmi ịikpo phọ ạna.
8 Nạ kaḍighi ni tọrobo ịyaar lọ nạ maguanaan;
Ọmoogh-we, ẹphomoghian ạna edi ghan bịn.
Muneni oḍighi phọ nạ mamiigh bọ.