Ọkaraghi Ẹnaan phọ
115
Esi ạna bịn, Ọmoogh-we, esi ạna bịn, káyoor, kụ ẹdi kọngo ghan eeguloor esi ẹphomoghian phọ ạna rémuneen ghan bọ ḅịle rꞌébi ghan oguan.
2 Esi ika kụ areelhe phọ upuru bọ iyoor mọ,
“Ẹnaan phọ anyina edi ẹghen?”
3 Ẹnaan ayoor edi kꞌạke;
ọdi raḍighi ghan ịlo ẹḅeeraan nyọdi.
4 *Ạranaan ạbidi oḍighinom silva rꞌagol,
ạraghaagh oye kụ ịka.
5 Bịdi ẹmoogh rụnhu, kụ kétue ẹḅa,
rꞌariḍien, kụ kétue ẹmiin eten.
6 Bịdi ẹmoogh reḅeri, kụ kétue ẹnaghan,
rꞌizon, kụ kétue epura eḍu.
7 Bịdi ẹmoogh rạghaagh, kụ kétue ẹḅogh,
rꞌaruwol, kụ kétue etelhe;
bịdi ị́moogh ẹḍogh.
8 Oomo ạbuphe ọkaaghi bọ ọḅile rooseeny ghan rạraar phọ ịphen
kọkighogh ni rạraar phọ bịdi ọka bọ!
9 Ịkpasaghi emooph anyina esi Ọmoogh-we phọ, nyina awe phọ Ịzirel.
Ọdi rịphel ghan inyina kạḅile iikpereghi inyina.
10 Ịkpasaghi emooph anyina esi Ọmoogh-we phọ, nyina ariil ạrikia phọ Ẹnaan.
Ọdi rịphel ghan inyina kạḅile iikpereghi inyina.
11 Ịkpasaghi emooph anyina esi Ọmoogh-we phọ, oomo anyina ạbuphe rooseeny bọ nyọdi.
Ọdi rịphel ghan inyina kạḅile iikpereghi inyina.
12 Ọmoogh-we phọ rụutughian ghan iyira ḅịle kụseph ni iyira;
ọdi kạseph we phọ Ịzirel rꞌoomo ariil ạrikia phọ Ẹnaan.
13 *Ọdi kạseph tọrobo oye lọ aghueni nyọdi,
mꞌọbam mꞌogbogh.
14 Ọmoogh-we phọ aḍighi ni ịdi nyina kẹmoogh ẹnighenom —
nyina rꞌạnmuny anyina!
15 Ịmoogh ḍịseph esi Ọmoogh-we phọ,
ọpo ạlhem bọ kẹ phọ rꞌade phọ!
16 Ạke phọ ọlo Ọmoogh-we phọ bịn,
kụ ọlo, ọdi ạngo de phọ oye.
17 Bụlo momuughu róboom ghan Ọmoogh-we phọ.
Bịdi mogheel ọmar iḍim oḅoorian nam.
18 Kụ ọlo, yira ạbuphe odi bọ kọngo nyọdi ḍịseph
nyịidipho ḅịle kꞌagee-pọ.
Iboom Ọmoogh-we phọ!