Ịlo eenan ạbumulogh-ḍien
108
Esi ạna kụ ẹdi mị ạkpasi oomo oḍuom-ologhi ạmi, Ẹnaan.Mị kạmoor ạsephom nyịna.
Ḅetenu, uwaloor ạmi.
2 Iḅetenu, ọne rꞌọkama ạmi,
mị kạsumeeny erumuḍio phọ.
3 Mị kạseph nyịna Ọmoogh-we igbo areelhe phọ.
Mị kaboom nyịna igbo aweye phọ.
4 Ẹphomoghian phọ ạna rémuneen ghan bọ epeleghom sịke phọ;
amabi-ólho phọ ạna ạḅogh okuaḍio phọ.
5 Ḍeenaan igbogh phọ ạna ẹpe okuaḍio phọ, Ẹnaan,
ḅịle eegu phọ ạna eleeny oomo ade phọ.
6 Ụphelom iyoor rꞌịnyaam mọ ạna; ạnaghan ịiḅereghi ayoor,
ẹrol dị awe phọ nạ ạphomoghian bọ ọmoogh ọtagharan.
7 Sịphe ạdol iigbia phọ ọdi, Ẹnaan mẹḅem:
“Esi ọkpar-opu mị kadi ni Sẹkem
kụ adiemi Eḍiiny aSukot we phọ ạmi.
8 ẠGiliad ẹlo ạmi rꞌạManase kẹn;
Ifraim eghoony ạmi
kụ aJuda ịkpara ạraalha ạmi.
9 Kụ mị katene Mọab gbạgba ootolaam ạraghaagh ạmi
kụ mị atebeeny rokoro ạmi sịphe Idom,
esi eḍeenaan dị mị kụ ạmoogh ẹmha phọ.
Mị kạlo ḍịolho ọkpar opuom awe aFilistia”.
10 Ạnhian, Ẹnaan, kụ kụsighe ịmi aḍighom ẹmha phọ okpeki bọ?
Ạnhian kụ kuḍiemiom ịmi aḍighom Idom?
11 Nạ mạkar ri ughel iyoor ḍụghum?
Nạ kátelhiom we ẹgham ayoor amitenom ḍụghum?
12 Ụphel iyoor eenan mụlogh-ḍien phọ.
Ọloghonaan ạḍighaagh oye, oopho ịyaar bịn.
13 Ẹnaan kụ ẹrolan rꞌayira, pọ yira kọkpar ri opu;
ọdi kabinighiom ni bụmulogh-ḍien phọ ayira.