Ịiḅereghi ịlo ọloghonaan ạḍighaagh
57
Ẹnaan, ụnma ịmi ighirigiir. Ụnma ịmi ighirigiirloor esi dị mị atu esi ạna ọmoogh eekpereghian.
Sịphe uba araphaaph phọ ạna kụ ẹdi mị ạaghian
tụtu oboom oghim mọ ạgber.
2 Mị ạmagh Ọkaraghi Egbogh Ẹnaan phọ,
Ẹnaan phọ ọpo rạngo ghan bọ tọrobo ịlo mị ạwa.
3 Ọdi kamegheron kꞌẹpe ạke kụ ụphel ịmi.
Ọdi kabinighiom bụphe rụgbiphoghom bọ ịmi.
Ẹnaan kiḍeenaan ịmi ẹphomoghian phọ ọdi rémuneen ghan bọ rꞌamabi-ólho phọ ọdi.
4 Ạbumulogh-ḍien ukoom ịmi,
dị ọghigh riitiir lọ rẹba ghan we.
Ạralaal ạbidi ẹkigh ịsoph rꞌịkpina.
Asinem ạbidi ẹkigh isoko lọ eroph.
5 Ḍeenaan igbogh phọ ạna ẹpe okuaḍio phọ, Ẹnaan,
ḅịle eegu phọ ạna eleeny oomo ade phọ.
6 Ạbumulogh-ḍien ạmi mulherenaan ịmi ọseki osiphom ạmi;
ẹ́ḅaal ologhi miikpereghiom ịmi.
Bịdi uguph ghẹle pạ eten phọ ạmi
kụ bịdi rꞌaloor kụ ụḅile osumughu.
7 Mị ạmoogh oḍuom-ologhi dị amunughan, Ẹnaan.
Mị kạmoor aaseeny nyịna.
8 Sụma, uwaloor ạmi! Sụma!
Mị kạsighe ọne rꞌogumogum,
kụ ạsumenom ḍịroor phọ.
9 Mị kạseph ni nyịna, Ọmoogh-we, sịphe areelhe kịrokiro phọ.
Mị kạseph ni nyịna ogbo oomo areelhe phọ.
10 Ẹphomoghian phọ ạna rémuneen ghan bọ esi ni ẹpe ạsike phọ;
amabi-ólho phọ ạna ạḅogh ni okuaḍio phọ.
11 Ḍeenaan igbogh phọ ạna ẹpe okuaḍio phọ, Ẹnaan,
ḅịle eegu phọ ạna eleeny oomo ade phọ.