Ịiḅereghi oḍuom-ologhi esi Ẹnaan
56
Ụnma ịmi ighirigiir, Ẹnaan, loor esi dị awe ruphorogh ịmi;ạbumulogh-ḍien ạmi rụgbiphoghom ịmi oomo amem.
2 Oomo aḍio awe renaan ịmi.
Bụphe renaan ghan bọ ịmi oḍiza ni.
3 Mem lọ mị ạmoogh oghiilaan, Ọmoogh-we Oomo Ịikpo,
mị aseere oḍuom-ologhi ạmi esi ạna.
4 Mị ạkpasi emooph ạmi esi Ẹnaan kụ mị ụ́moogh oghiilaan;
mị aboom nyọdi loor ịpe ọdi aguanaan bọ.
Eeghe kụ ẹdi oghiil oye kuḍighi ịmi?
5 Ạbumulogh-ḍien ạmi ụwa ịmi sighiton oomo aḍio;
bịdi rogbiighi ghan ịlo oḍighi ạmi ịkaraph.
6 Bịdi rookpomoghan ghan riisi ịbooghian
kụ ogon tọrobo ịlo mị kaḍighi,
rọwa ịlo oghiigh ạmi.
7 Lịom bịdi, Ẹnaan, esi ịkaraph phọ ạbidi;
sịghe ophin ologhi ạna kụ awinighiom bịdi.
8 Nạ alegheri ni ịdi rịiḅaghami ịmi;
nạ ạge ni ọnhu amem dị mị mamoghi.
9 Mem lọ mị ạmagh nyịna,
ạbumulogh-ḍien ạmi koḅula ni ọman.
Mị alegheri ni ịduon: Ẹnaan edi ni rꞌạmi —
10 Ọmoogh-we ọpo mị raboom bọ oguanaan phọ ọdi.
11 Esi ọdi kụ ẹdi mị aḍuom ologhi, kụ mị kạ́moogh oghiilaan.
Eeghe kụ ẹdi oghiil oye kuḍighi ịmi?
12 Ẹnaan, mị kạngo nyịna ịpe mị maguanaan bọ;
mị kạngo nyịna ruunmo ạḍiseph ạmi,
13 loor esi dị nạ mụtagharan ịmi ạsighe loor aḍuugh
ạḅile aḍighi ịdi oye ịmi kạ́kpar apu.
Kụ iḍighi kụ mị atelhe ghisigh Ẹnaan
igbo ạḍiḅaal dị ẹmuom bụphe odi bọ eye.