Ẹkaraph eḍighinom ịyaar awe
(Ạsuor 14)
53
*Bụo elologhi rọḅenian ghan siloor mọ Ẹnaan ílho.Bịdi mọopuan siloor
kụ roḍighi yogh ghan ugbini ugbini.
Ọlo raḍighi ghan igey ólho.
2 Ẹnaan ẹtol ẹpe kꞌạke kụ repogh ghan we sịen ade phọ,
ọmiin mụghumo bụlo ọnaghan ḍụghum odi ni
dị rọwa olegheri ọdi.
3 Kụ ọlo oomo ạbidi mọḍuaghu;
oomo ạbidi obeeph aani ni.
Rꞌoniin ọnyo ạbidi lọ raḍighi ghan ịlo ẹnighe ólho,
rꞌoniin ólho.
4 “Bịdi phọ úlegheri?” Ẹnaan epuru.
“Abuḍighinom ịkaraph phọ ạbuen phọ olegheri-ịyaar ụ́moogh ḍụghum?
Bịdi odianaan omiighi ghan ạraraar awe phọ ạmi
ḅịle bịdi ịmi rụ́uḅereghi ghan.”
5 Kụ ọlo keḍighi ni ḍiigu esi ạbidi,
ịdi kẹ̋rol ghan esi ạbidi kꞌekulha,
loor esi dị Ẹnaan kẹewalami ịḅarara ạbumulogh-ḍien awe phọ ọdi.
Ẹnaan meghel bịdi,
kụ iḍighi kụ Ịzirel kọkpar ri opu bịdi bịn kpel kpel kpel.
6 Mị ạkar ri rạlom mọ ọkpar opu
ạḍua ẹpe Zạyon aru ạteeny Ịzirel.
Pọ eeghe ọdo ọḅaal ologhi dị awe Ịzirel kọmoogh
mem dị Ẹnaan kẹḅile bọ ẹngo bịdi ẹeḍiom.