Ịiruen Ẹnaan rꞌọnma ighirigiir
52
Eeghe kụ nạ raabagaam ghan bọ ịkaraph phọ ạna, oye aḍigbogh ạdol.Ẹphomoghian phọ Ẹnaan edi ghan ni kꞌagee-pọ.
2 Nạ ạmoogh igbiighi ọphue ạbunon awe;
anem ạna ẹtol mụdi ẹleke ẹmhu lọ oghola.
Nạ odi ghan ọgba ọkpe oomo amem.
3 Nạ ạpomoghian ịkaraph kụ apu igey,
ọkpe kụ apuemi ịpe eru bọ ịne.
4 Nạ ạmoogh ḍịḅeeraan ọphuenom awe rꞌikpo ọnhu ạna, nạ ọgbaam ọkpe.
5 Kụ ọlo Ẹnaan kephiemi ni nyịna kꞌagee-pọ;
ọdi kạpham ni nyịna kụ aziton ạsighe sịphe otu phọ ạna;
ọdi kạgbole ni nyịna sịphe aḅirini ạbuphe odi bọ eye.
6 Awe aruukuan kọmiin ni ịphen phọ kụ okiilaan;
kụ bịdi ọmilogh nyịna kụ ọḅem mọ,
7 “Mịin, phọn oye dị ụ́kpasi oomo eekpereghian aloor esi Ẹnaan,
kụ ạkpasi ghụn esi eboom ẹelha ọdi
ạḅile ạkparamian loor ọdi sịpioghom.”
8 Kụ ọlo mị ạkigh oreeny-ọliv dị rasi sịphe otu phọ Ẹnaan;
mị aḍuom ologhi ẹphomoghian phọ ọdi rémuneen ghan bọ kꞌagee-pọ kꞌagee-pọ.
9 Mị kạseph ni nyịna oomo amem, Ẹnaan, esi ịpe nạ maḍighi bọ;
ghisigh awe phọ ạna
mị kagbeelom mọ nạ ạnighe ni.