Ạḍuor oboomiom
40
Mị mạkparam ni akoriom ọloghonaan ạḍighaagh Ọmoogh-we phọ.Ọdi mazuumaam ạnaghan emoghi phọ ạmi.
2 Ọdi mụpham ịmi apune sịphe ooni amuphe phọ
rꞌịsiphe ọposo ẹghorom mọ;
kụ ụmeremi ịmi ạnyu aḍighiigh,
ḅịle aruwol ạmi mẹkpaph ude mị ratelhe.
3 Ọdi mụtughemi ịmi ḍimoom ạḍuor,
mọ mị ụmoor ghan uboom Ẹnaan phọ ayira;
ịbadi awe kọmiin ni kụ okiilaan
kụ ogbi oḍuom Ọmoogh-we phọ ologhi.
4 Iboh rẹtolonaan ghan oye phọ ọpo aḍuom bọ Ọmoogh-we phọ ologhi,
kụ úkiton bọ úsoman ịkaaghineen ạrumugh
ḅịle úḍighan bọ rꞌạbuphe rọoḅereghi ghan bọ ruru phọ.
5 Ọmoogh-we Ẹnaan phọ ayoor, iiḍighi phọ ịpe nạ uḍighinaan bọ iyoor ẹpughan.
Oye ólho dị ạghigh nyịna.
Ịitughian phọ ịpe nạ rụutughianam ghan bọ iyoor eḍighi ịikia iikia.
Mị útue ụ́kaaph oomo phọ ịdi —
aḍita phọ ẹbugh ni iboom!
6 *Nạ ọ́wa rịkia rꞌinmo.
Ịnam lọ ọphophoghi ikpom sịphe enmeny ịyaar aghuḍum mọ
ḅịle rꞌạrikia oselemian aloor nạ ọ́wa.
Nạ maaphoghion reḅeri ạmi kụ mị ạnaghanan nyịna,
7 kụ ạḅem mọ, “Uphogh ịmi. Mị maru.
Sịphe ạḍinya iilogh phọ ạna ọge aani ni ịlo ạmi.
8 Ẹnaan ạmi, ịḅeeraan ịmi oḍighi ịpe nạ rạwa bọ;
iilogh phọ ạna mị aseerian ni ologhi ạmi.”
9 Ọmoogh-we, sịphe ookpomoghan aḍita awe phọ ạna,
mị ụghaaph ni ooḅi ọghaaph ạpeleeny phọ ạna.
Nạ alegheri ni mọ mị kạ́bile ghan ọghaaph ịlo ạna.
10 Mị úkpophonom ologhi ạmi bịn ịpe nạ ụphel bọ iyoor.
Oomo amem kụ ẹdi mị rạkaaph ghan ịlo ẹ́moogh-amabi phọ rꞌạpeleeny phọ ạna.
Sịphe ogbo ookpomoghan awe phọ ạna
mị ráḅoorian ghan ọgba ịlo ẹ́moogh-amabi rꞌẹphomoghian phọ ạna rémuneen ghan bọ.
11 Ọmoogh-we, mị alegheri ni mọ nạ kạ́bile ọnma ghan ạmi ighirigiir phọ;
ẹphomoghian phọ ạna rꞌẹ́moogh-amabi phọ ạna kụ riiko ghan ịmi oomo amem.
Ịiḅereghi ọloghonaan ạḍighaagh
(Ạsuor 70)
12 Ọdo kịrokiro ịminimiin mikoom ịmi ekitonom
dị kótue ogbi;
kụ ịkaraph phọ ạmi misoroghuom ịmi,
ḅịle mị rạ́miin ghan mun eten.
Ịkaraph phọ ạmi epu sịlaal ẹmhu ạmi,
kụ oḍuom-ologhi ịmi úlho mun.
13 Ụphel ịmi, Ọmoogh-we; ụlhoghonaan ịmi ḍịghaagh nyịidipho.
14 Umugholoor asiph ḍita ạbuphe rụwa ghan bọ ịmi ịlo oghiigh;
ọgbaragbara asoorom bịdi, bịdi ophe!
Aḍita ạbuphe robo ghan bọ mem ịminimiin phọ ạmi
oḅulolom rꞌẹgum ọman rꞌumugholoor!
15 Bịdi oḍiku ạagia oguul!
Ịphen kụ eru ịikpia ạbuphe rụmilogh bọ ịmi!
16 Kụ ọlo oomo ạbuphe oḍighom bọ nyịna
ọmoogh iboh rꞌọḅaal ologhi.
Oomo ạbuphe nạ ạphel bọ ọseph ghan nyịna
ọḅem ghan mọ, “Ọmoogh-we phọ ạbugh ni.”
17 Mị adugh ni kụ ịyaar ịmi ílho,
kụ ọlo Ọmoogh-we phọ ịmi úwula.
Nạ kụ Ẹnaan ạmi dị rịphel ghan ịmi.
Gboogborion aru uḅegh ịmi.