Ootuma ịkaraph rꞌọsar ọwile
32
*Ạḍiseph rẹtolonaan ghan nyọpo mọwilenaan bọ ịkaraph phọ ọdi,nyọpo ookpereghi bọ ịkaraph phọ ọdi.
2 Ạḍiseph rẹtolonaan ghan oye phọ ọpo Ọmoogh-we phọ rágbianaan bọ ịkaraph,
nyọpo ologhi iigbegheḍiom uwaloor ọdi úlho bọ.
3 Tọro amem lọ mị ịkaraph ạmi ụ́gba umitiom,
bịn aloor ạmi reminonom, loor esi ịkuph phọ ạmi oomo aḍio.
4 Ḍughul rꞌootaany ạḍighaagh phọ ạna riwiririom ghan ịmi;
ịnyaam ạmi memuneen
ịdipho ịizupha lọ ẹghologhol aghozogh esoorom.
5 Mị aloghoma ni ịkaraph phọ ạmi esi ạna.
Mị ụ́booghi ịkaraph phọ ạmi risigh ạna.
Mị ạḅem mọ mị kaatuma ni ọpioman phọ ạmi aḍeenaan Ọmoogh-we phọ
kụ ọdi agbi ọsar ịkaraph phọ ạmi ọwilenaan ạmi.
6 Loor ịphen phọ, mem ịiḅaghami, mem lọ ekuom bịdi,
bụphe osooromi bọ loor ọoḅereghi ghan nyọdi
ọbo ooḍigha ạmuum ịiḅaghami kạtophoron ghan bọ bịdi.
7 Nạ kụ oghoph ịbooghian ạmi.
Nạ kụphel li ịmi ạsighe esi ịiḅaghami;
kụ mị ạmoor sụor ịlo ạpeleeny phọ ạna
ịdi eḍighi bọ nạ muuko ịmi.
8 Ọmoogh-we phọ ạḅem mọ, “Mị karomoghiom nyịna,
ạḅile ạtughemi reten phọ ịpe nạ kạdaph bọ.
Mị karelhiom nyịna; ariḍien ạmi kẹ́ḍua esi ạna.
9 Kạ́kigh ghan ạsu mꞌẹnam adool
dị rẹ́naghan ghan ḍụghum kụ ịnhu phọ ạbidi ọkasaghiom izime
ọbo bịdi ọnaghanan.”
10 Bụo ạsipioghom mọ kọmiinom ni iboom,
kụ ọlo bụphe oḍuom bọ ologhi Ọmoogh-we phọ
ẹphomoghian phọ ọdi rémuneen ghan bọ kẹtolonaan ni bịdi.
11 Nyina ạbuo aruukuan phọ, ịḅaalami iloghi anyina kụ eboh
loor esi ịpe Ọmoogh-we phọ maḍighi bọ.
Nyina ạbuphe iloghi phọ eseleman bọ, ịḅaalami iloghi anyina kụ eboh.