Ịiḅereghi oḍuom ologhi esi Ẹnaan
31
Ọmoogh-we, mị aḍigh ḍibuo ạna.Loor ariliom eḍighinom ạraraar phọ ạna,
kámeera umugholoor usiph ịmi kꞌagee-pọ.
2 Ler rụru ạna, ụnaghanan ịmi,
aagborion aru ụphel ịmi ạsighe.
Nạ kụ aḍighiigh ạmi dị ẹkpar,
aḍibuo otu ạpeleeny ạmi.
3 Nạ kụ aḍighiigh ạmi rꞌotu ạmi dị ophighi ọkparami.
Loor esi aḍien phọ ạna urorori ịmi, urororiom ịmi rꞌẹepho.
4 Ụutoghion ịmi ạsighe sịphe ọseki phọ bịdi ạaghian bọ ulherenaan ịmi.
Nạ kụ ịnyaam ạmi.
5 *Mị ạḅogh uwaloor phọ ạmi ạlogh ḍịghaagh ạna.
Nạ mụtagharan ịmi, Ọmoogh-we,
Ẹnaan dị ọkpe rẹ́gba ghan.
6 Nạ akel li bụphe rọoḅereghi ghan bọ oopho ạrumugh.
Mị aḍuom Ọmoogh-we phọ ologhi.
7 Mị kạḅaalami ni ologhi ạmi kụ mị abo,
loor esi ẹphomoghian phọ ạna rémuneen ghan bọ.
Nạ ạmiin ni ịminimiin phọ ạmi;
nạ alegheri ni ịiḅaghami phọ ạmi.
8 Nạ ịmi ụ́ḅogh bọ ụngo rạghaagh ạbumulogh-ḍien phọ ạmi.
Nạ mụngo ịmi ẹereegh ọghi ekpisi lọ mị ạwa.
9 Ọmoogh-we, ụnma ịmi ighirigiir,
mị odi esi ịiḅaghami,
amukum ologhi mạaḅaghami riḍien ạmi,
mị maminonom amuneen.
10 Mị odimom ghan rꞌọto rꞌịḅiphighu
oomo ạsia aghuḍum mọ ạmi;
ịnyaam ịmi ílho mun loor ịkaraph phọ ạmi
ịḅarara ạmi mẹghola.
11 Mị maḍigh ạagia esi oomo ạmulogh-ḍien phọ ạmi
ḅịle rꞌesi amatuman phọ ạmi.
Mị mạghigh nonom esi iigbo phọ ạmi,
kụ tọro ọlo ụmiin ịmi rasuma ghan bịn.
12 Muwula ịmi bịn sịphe iloghi phọ ạbidi ịdipho oye lọ mamugh.
Mị ạḅile ạkigh ọnyoki lọ aḅomaan,
13 Mị rạnaghan ni dị ịbadi ạbidi roophola ghan,
kụ aruugu rusiph ghan ịmi.
Bịdi rumitonom ghan ịmi ruuzue
roopuruan ghan ịlo ọsighe aghuḍum ạmi.
14 Ọmoogh-we, mị aḍuom nyịna ologhi
kụ mị rạḅem ghan mọ nạ kụ Ẹnaan ạmi.
15 Amem mọ ạmi edi ḍịghaagh ạna.
Ụphel ịmi ạsighe rạghaagh ạbumulogh-ḍien phọ ạmi,
rꞌesi ạbuphe ruusophoghian bọ ịmi.
16 Ḅạalami risigh ạna esi otelhedom mọ ạna;
ụnma ịmi ighirigiir ụphel ịmi ạsighe.
17 Ọmoogh-we, kámeera umugholoor usiph ịmi.
Loor esi dị mị ạmagh nyịna, umugholoor asiph bụo ạsipioghom mọ;
ịnhu ạbidi ikpom ẹpe ọmar iḍim.
18 Kpomori yogh ịidoronhu ọkpe phọ ạbidi,
bụphe rọgbaaghi ghan bọ ịlo orue
kọḅam rụmhu ạbuo aruukuan phọ.
19 Eḍighi ịikia iikia ịma ạraraar phọ
ịpe nạ aseenaan bọ bụphe roghueni ghan bọ nyịna,
ịpe nạ raako ghan bọ bụphe oḍuom bọ nyịna ologhi.
20 Nạ kạbooghi ni bịdi esi ịbooghian phọ ạna
loor ịpe awe roosophoghian bọ bịdi.
Bọoghi bịdi esi dị ịyaar bịdi kéḍighi;
bịdi okpetenaan sinem ịruonu.
21 Ạḍiseph ẹrolonaan Ọmoogh-we phọ,
ịdi eḍighi bọ ọdi muḍeenaan ịmi ẹphomoghian phọ ọdi
mem mọ uzuom bọ ịmi okitonom ẹpe egbogh ẹmha phọ.
22 Rꞌunmam bịn mị ạḅem
mọ ọdi mạsighe riḍien ọdi esi ạmi,
kụ ạri nạ ụnaghan ni ẹḍogh ịlom mọ ạmi,
mem mọ mị amoghi bọ aphoghomiom nyọdi.
23 Ịpomoghian Ọmoogh-we phọ, nyina awe oḍuom-ologhi phọ ọdi.
Ọmoogh-we phọ raako ghan bụo oḍuom-ologhi phọ ọdi,
kụ rạkpeeghiom ghan bụo iituma ịdi ẹkasian ịkaraph phọ ạbidi.
24 Ịmoogh ạkpo ologhi, ẹkparam,
oomo anyina phọ ạbuphe oḍuom bọ ologhi Ọmoogh-we phọ.