Ịiḅereghi oḍuom-ologhi
16
Ẹnaan, ụphel ịmi, mị aḍigh ḍibuo ạna.2 Mị ạḅeni Ọmoogh-we phọ mọ, “Nạ kụ Ẹnaan ạmi.
Nạ múlho bọ ọbo igey ịmi mị́teeny.”
3 Bụo igey ạroozo ịsien aḅirini phọ kụ awe Ẹnaan.
Bịdi ọḅaalami ghan ni ologhi ạmi.
4 Bụphe oghiil bọ ọghi esi ịnon ạrumugh
rọsighe ghan ịbadibadi ịiḅaghami koruom siloor ạbidi.
Mị káḍighan bịdi ọphinyon ạrikia phọ ạbidi.
Mị kạ́aḅereghi ruru phọ ạbidi.
5 Nạ, Ọmoogh-we, kụ abin erua dị mị alhe.
Nạ kụ oomo ịdi mị ạmoogh.
Ịpe idianaan bọ ịmi risigh edi rạghaagh ạna.
6 Ạdol phọ nạ useenaan bọ ịmi ẹnighe ni agey;
pọ eeghe ịma ạdol.
7 Ọmoogh-we, mị rạseph ghan ni nyịna ọpo urorori ghan bọ ịmi.
Ḍughul aḍughul, ịitughian phọ ạmi rịphur ghan ịmi rụru.
8 Mị alegheri ni mọ Ọmoogh-we phọ odi ni rꞌạmi oomo amem.
Ọdi utuman ịmi kụ ịyaar kégboton dọl phọ ạmi.
9 Ịduon kụ iḍighi kụ ologhi ạmi ạḅaal li.
Uwaloor ạmi rabo ni. Ịyaar ịmi kíḍighi.
10 *Nạ kụ́wile ịmi ọmar iḍim.
Nạ kámeera aḍizu Oye Aghuḍuul phọ ạna ẹḅor.
11 *Nạ kuḍeenaan ịmi eten phọ ẹpe retorori ghan bọ kẹlogh ghuḍum.
Ịduon mị odi bọ rꞌạna, ologhi ạmi ạḅaal li iboom,
kụ rịngo ghan ịmi iboh kꞌagee-pọ.