40
1-2 Job, nạ kụ ụpa ịnugh Ẹnaan Oomo Ịikpo phọ;nạ kạ́gba mun nyịidipho ḍụghum kụ nạ kạpagharanaan ni?
Ịkponhu aJob
3-4 Mị ụghaaphom rꞌelologhi, Ọmoogh-we. Mịna kạpagharanaan eeghia?
Mị kạ́ki mun ọghaaph ịyaar.
5 Ọghaaph phọ ạmi mạphughan.
Ọmoogh-we phọ
6 Kụ esi oghim kụ ẹdi Ọmoogh-we phọ ạḅaanaan kẹn Job.
7 Mẹera nyịidipho ịdipho olephiri ọony,
ạphanyanaan sipuru phọ ạmi.
8 Nạ rạwa ghan ọma omitiom mọ mị rásoph ghan igey ịiruen —
ọḅem mọ mị odi ekeeny kụ nạ odi elhiom?
9 Nạ ạmoogh ni ịikpo uuleeny ịmi ḍụghum?
Ẹḍogh ạna ketue ni emoogha ịduon ẹphen ạmi?
10 Eḍighi ịdipho, pọ mẹeraam rughuenian phọ ạna,
sịghe igbogh rꞌeegu kụ ạkpologhian.
11 Mịin bụphe ophoophe bọ loor phọ ạbidi;
kạgham bịdi ologhi bịdi osooromi loor ạbidi.
12 Ii, pogh bịdi ạsighe asoore ude;
piemi bụkaraph awe phọ sịphe bịdi ọmeera bọ.
13 Sịghe oomo ạbidi aḍi ude;
pạḍi bịdi ẹpe ọmar iḍim.
14 Kụ mị agbi oḍighi ọḅel oye dị kaboomi nyịna,
ạḅile ameeraam mọ nạ mazin ḍịghaagh iphelegbe.
15 Mạar aphogh ọoma ạmuum;
mị kụ ụlhem nyọdi ạḅile ạlhem nyịna.
Ọdi rạtaal ghan rọogho ịdipho ạnam
16 kụ ọlo ịpe eeghia ịikpo dị edi sịphe aloor phọ ọdi,
ḅịle kẹn ịpe eeghia ịikpo dị edi sịphe ighiph phọ ọdi!
17 Ẹsoph phọ ọdi ẹmeera ịdipho ọsaga
ḅịle kẹn ighiph aruwol phọ ọdi ẹmoogh ni ịikpo.
18 Ịḅarara phọ ọdi ẹkpar ịdipho enaba,
ḅịle kẹn aruwol phọ ọdi ẹkigh okuron.
19 Ọdi kụ ọkaraghi ẹekia ẹnam esi oomo ạraraar phọ mị ạlhem bọ!
Ọpo ạlhem bọ nyọdi bịn kụ katue ạkpar apu nyọdi.
20 Ạroogho dị ọdi rạtaal ghan rasi ghan
ẹpe aroogbolom mọ ilhom ịnam mọ repegh ghan bọ ephegh phọ.
21 Ọdi raḍigh ghan ni esi ạroogho iitoor kụ kạaghian,
ạḅile ạbooghian ologhi iipoghoḍian esi ighool.
22 Ạroogho iitoor phọ rꞌireeny ọgbal okol ạmuum mọ
kụ reekpereghiom ghan nyọdi oghoph.
23 Ọdi rákiilaan ghan mụum ọphiiny dị rakil iboom;
mem lọ ạmuum ạJodan phọ aakpereghiom ghisigh ọdi, ọdi rạpoomi ghan ni loor ọdi.
24 Ạnhian kụ katue apuki riḍien ọdi bịn asiph nyọdi?
Ọbo kẹn ạnhian kụ katue ạkpami ḍiphil dị kesiph izon ọdi?