35
1-2 Job, íḍighi elhiom dị nạ kạḅemmọ nạ aseleman ni risigh Ẹnaan,
3 ọbo kẹn opuru Ẹnaan mọ, “Ịkaraph phọ ạmi iḍighi ika kụ rẹeḅaghami bọ nyịna?
Eeghe kụ ạsuo ạmi mem dị ịkaraph mị úḍighi?”
4 Mị kạphagharanaan nyịna rꞌạrighiri phọ ạna kẹn ni.
5 Pogh ẹpe okuaḍio phọ. Mịin ịdi ọotu phọ ạkel ạnyu.
6 *Eḍighi ịyaar dị nạ aḍighi ịkaraph, ịpe phọ kétue eḍighi ịyaar Ẹnaan.
Eḍighi ịyaar dị nạ aḍighi ịkaraph ịbadi amem, ịpe phọ keḍighi ni nyọdi ịyaar?
7 Ạdol aruukuan phọ ạna ketue ni ẹloghonaan ḍịghaagh Ẹnaan ḍụghum?
Ịyaar ílho dị Ẹnaan rẹwa ḍịghaagh ạna.
8 Ạbunon awe ịduon ạna kụ rọmiinom ghan esi ịkaraph phọ ạna,
ḅịle igey lọ nạ aḍighi rẹloghonaan ghan ḍịghaagh bịdi.
9 Mem dị rọgbiphoghom weye, bịdi rọkuph ghan ni
bịdi romoghi ghan ni ọwa oye lọ kạpel bịdi.
10 Kụ ọlo bịdi rọ́ki ghan esi Ẹnaan phọ ẹlhem bọ bịdi,
ọpo rẹngo ghan bọ bịdi oḍuom ologhi mem ogbogh ufiri ạbidi.
11 Bịdi rọ́ki ghan esi Ẹnaan phọ rịngo ghan bọ iyira olegheri-ịyaar,
olegheri-ịyaar dị apu ọlo ịnam rꞌịnun.
12 Bịdi romoghi ghan ọloghonaan ạḍighaagh, kụ ọlo Ẹnaan rẹ́naghan ghan,
loor esi dị bịdi ịkaraph awe dị ophoophe loor.
13 Emoghi phọ ạbidi ị́moogh ịyaar oḍighinom;
Ẹnaan Oomo Ịikpo phọ kẹ́miin ḅịle kẹ́naghanan bịdi.
14 Job, nạ ụḅem mọ nạ kạ́miin Ẹnaan;
kụ ọlo kpạram akori — aḍighiton phọ ạna edi ni rꞌọdi.
15 Nạ ragbiom ghan mọ Ẹnaan rẹ́liom ghan,
mọ ọdi ọ́maghami ịkaraph ịyaar.
16 Ị́moogh ịyaar oḍighinom ịduon nạ ạghaaph bọ rạkiom;
eḍeenaan mọ nạ ólhegheri ịpe nạ rạkaaph bọ.