33
Kụ nyịidipho, Job, mạar ạnaghan oomo ịphen mị kạkaaph bọ.2 Mị maakolobian ọghaaph ịpe edi bọ ologhi phọ ạmi.
3 Oomo ikpo ọnhu phọ ạmi ịne ni;
ḅịle kẹn mị rạkaaph ni igey phọ.
4 Uwaloor phọ Ẹnaan kụ ụlhem ịmi ạḅile ụngo ịmi ghuḍum.
5 Ụphagharanaan ịmi, mụghumo nạ atue. Kookolobian ịpe nạ kạkaaph bọ ạgbagharan.
6 Nạ rꞌạmi igina phọ ni risigh Ẹnaan,
ụsighe ni ọposo kụ ọḅolom ịyal ayira.
7 Kụ iḍighi kụ nạ ọ́moogh ịyaar ọtuan oghiilaan ạmi;
mị nyịna kákpobiom.
8 Nyịidipho ịphen kụ ịdi mị ạnaghan dị nạ ạḅem:
9 “Mị ịyaar ụ́piom; mị úḍighi ịyaar ekeeny.
Mị ologh úsoor ḅịle ịkaraph úḍighi.
10 Kụ ọlo Ẹnaan ẹmoogh ni eeghola ọtuan ọtomoghi ạmi
kụ oḍighi ạmi ịdipho ẹpomoghian.
11 *Ọdi ạsighe izime kụ ạpaḍiom ruwol ạmi;
ọdi ragon ghan ni tọrobo ịlo mị arelhe.”
12 Kụ ọlo mị rạḅeni nyịna, Job, nạ ạpioman ni.
Ẹnaan epu ni tọrotoro oye.
13 Eeghe kụ iḍighi bọ kụ nạ rạnughe bọ ẹka Ẹnaan phọ
mọ ọdi rạ́pagharanaan ghan ịlo oye ạlom nyọdi?
14 Ghạlamo ịdipho Ẹnaan ẹghaaph bọ ni ẹḅile ẹghaaph,
oye ọ́naghanan ịpe ọdi rạḅem bọ.
15 *Ḍughul mem lọ awe mọnaani,
Ẹnaan rẹḅaanaan ghan reten ạmalha rꞌọmiin ikon.
16 Ọdi raḍighi ghan ni ịdi bịdi kọnaghanan ịpe ọdi rạkaaph bọ,
kụ aruugu rasiph ghan ni bịdi esi ịlo ọdi ạphur rụru.
17 Ẹnaan rẹkaaph ghan oḍighi ịlo bịdi kọbile oḍighi ịkaraph
rꞌọphelom ạbidi ọbo kopoophe ghan bọ loor.
18 Ọdi kámeera mọ bịdi oogulaan;
ọdi rạpel ghan bịdi esi aḍuugh rꞌaloor.
19 Ẹnaan rẹsighe ghan ni ẹzegh keelemiom oye,
ẹḅile emuzeḍiom loor phọ ọdi rꞌariiphina.
20 Oye dị úmoon rạ́moogh ghan ẹephua olhe eḍien,
ghạlamo eḍien dị ọkuami ni ọsa retu ghan ozu.
21 Aloor phọ ọdi remiteghu ghan ni iboom;
nạ katue ni ạmiin oomo ịḅarara phọ ọdi.
22 Ọdi rạwa ogheel ọmar iḍim.
23 Iini ọokpaany katu ni ọloghonaan ọdi ḍịghaagh —
oniin esi ạsimuunir ạruukpaany kꞌẸnaan,
bụphe rọotughianam ghan bọ weye iiḍighi phọ ạbidi.
24 Esi ọnma ighirigiir ọokpaany phọ kạḅem mọ, “Ịbile nyọdi.
Ọdi kạ́ki ọmar iḍim.
Pọrono ịyaar ọtagharanam ọdi.”
25 Aloor phọ ọdi kẹḅile ni ẹekparagh ịdipho ọbumoony.
26 Mem lọ ọdi ạaḅereghi, Ẹnaan kẹnaghan ni ịiḅereghi phọ ọdi;
ọdi kaaseeny ni Ẹnaan rꞌibo; Ẹnaan kẹḅile ni eselemi rạraar phọ ọdi.
27 Ọdi kạkaaph ni esi ogbo mọ, “Mị maḍighi ịkaraph.
Mị agey úḍighi, kụ ọlo Ẹnaan ịnma ni ịmi ighirigiir.
28 Ọdi ómeera mọ mị ukeel ọmar iḍim,
kụ mị ạḅile bọ ni odi rapooghu.”
29 Ẹnaan reḍighi ghan ni kẹḅile eḍighi ịphen phọ;
30 Ọdi rạpel ghan ni ghuḍum oye,
kạḅile ạngo nyọdi iboh aghuḍum.
31 Nyịidipho, Job, nạghanan ịphen mị rạkaaph bọ;
ḅoorian mị kạkaaph.
32 Kụ ọlo eḍighi ịyaar dị nạ ạmoogh ịyaar ọghaaph, pọ kạaph mị ụnaghan.
Mị kameeraam ni rꞌibo mọ nạ odi ni elhiom.
33 Kụ ịdipho ílho, pọ ḅoorian ụnaghanan ịmi,
bịn mị kạtughemi nyịna olegheri-ịyaar.