Ọghaaph dị akureriom ḍighiton phọ aJob
29
AJob amiigh ọḅile ọghaaph.Job
2 Ḅẹlee mọ aghuḍum mọ ạmi katue ni ạḅile ạtol
ịdipho ạrol ghan bọ mem mọ ọpo Ẹnaan kụ iphogh ghan bọ ịmi.
3 Ẹnaan ịrolan ghan rꞌạmi oomo amem mọ ọpo phọ,
ẹḅile ịngo ghan ịmi ḍịḅaal mem lọ mị ratelhe esi ufiri.
4 Ịpe phọ iḍighi riiḍio dị mị ạmoogh ghan edughom,
kụ oḍighi ạrighiri rꞌẸnaan phọ iiko ghan ni ọto kꞌạmi.
5 Ẹnaan Oomo Ịikpo phọ ịrolan ghan ni ịmi mem mọ ọpo phọ,
ḅịle ạnmuny ạmi ukoom ghan ni ịmi.
6 Ạsinam rꞌạrutu-ịga ạmi ịngo ghan ni ịmi muboom ạmamaam,
ḅịle ireeny ọliv ạmi iḍum ghan agey ghạlamo esi ade asighiigh.
7 Tọrotoro amem lọ ikumoor awe ẹmha phọ ookpomoghan
kụ mị ạrolom aani ạgada ạmi sịphe igbo phọ ạbidi,
8 ugheel ạnmuny ụgbol ghan ni tọro amem lọ ụmiin ịmi,
ḅịle ikumoor awe uḅerenu ghan ni ọmeera ọngo ạmi rughuenian.
9 Abuḍiemiom awe phọ ụwile ghan ni rạghaaph lọ ọpham;
10 ghạlamo ọkar ikpolom awe phọ bịn uḅoroghian ghan ni.
11 Tọrotoro oye lọ ụmiin ịmi mụghumo ạnaghan ịlo ạmi
ạmoogh ghan ni igey ạraraar ọghaaph ịdi mị maḍighi ghan.
12 Mem lọ arukulom omoghi omitiom, mị ụlhoghonaan ghan ni bịdi ḍịghaagh;
mị ụngo ghan ni ọloghonaan ạḍighaagh bụnyigo ạnmuny lọ ụ́moogh esi ọkpaph.
13 Awe lọ ọrol esi igbogh ịminimiin uboom ghan ni ịmi,
ḅịle mị ụlhoghonaan ghan ḍịghaagh rukpukele ạnmariir ọmoogh dọl.
14 Oomo amem mị uḍighi ghan rạraar ạmi aalemi.
15 Mị uḍighi ghan riḍien awe phọ ạbuphe eten rọ́miin ghan bọ,
rꞌaruwol ạbuphe oḍiku bọ rạagha.
16 Mị uḍighi ghan ịdipho ọde arukulom
ạḅile ghan aḍighan ruuruen lọ ọrol esi ịiḅaghami.
17 Mị uugulemi ghan ni ịikpo ịkaraph awe,
ạḅile ạtagharan weye lọ bịdi mokpobiom.
18 Mị ugon ghan ọghelom ạkuudoony aghuḍum
rꞌomugh ologhi otu ạmi rꞌẹepho.
19 Mị ụghigh ịdipho oreeny dị ạsini phọ ẹmoogh mụum oomo amem
ḅịle ooto asoorom ghan ịla phọ ọdi.
20 Tọrotoro oye uboom ghan ịmi oomo amem,
ḅịle kẹn ịnyaam mọ ạmi ịmi íbi.
21 Mem lọ mị ạngo oroma, awe uḅoroghian ghan ni kụ ọnaghanan ịpe mị rạkaaph bọ;
22 bịdi ụ́moogh ghan ịyaar opumom mem lọ mị ạghaaph ạmadan.
Ikpo ọnhu phọ ạmi iḍiku ghan loor awe phọ ịdipho ikpo ọlophia,
23 tọrotoro oye ạsighe ghan ni
ịdipho abuḅephom iizo rọsighe ghan bọ ọlophia mem aghozogh.
24 Mị ụyigh ghan ni aphogh bịdi mem lọ iloghi ạbidi meḅonyonu;
ẹyighom mọ ạmi ịkparamiom ghan ni iloghi phọ ạbidi.
25 Mị uḍiemiom ghan ni rạghaaph;
mị uḍiemiom ghan bịdi ịdipho ọdaam raḍiemiom ghan bọ weye ẹgham ọdi,
ạḅile ạadereghi bịdi mem lọ bịdi oḍuom ologhi ụ́moogh mun.