Zofar
20
1-2 Job, nạ maḍighi ịdi rịiḅaghami ịmi. Nyịidipho rịtiirogh ịmi ọphagharanaan ạna.3 Ịphen nạ mạghaaph bọ itonyonaan;
kụ ọlo mị alegheri ni ịdi mị kạphagharanaan nyịna.
4 Ọkar agey nạ alegheri ni mọ kꞌageedi phọ,
mem mọ ọpo ọphur bọ oseere oye sịen ade phọ,
5 ọkaraph oye ólho dị mạrolom ghan rꞌiboh ebia.
6 Ọdi katue ni aḍighi ogbogh, ạḅogh kẹ phọ;
aḍighi ogbogh dị ẹmhu phọ ọdi kekara okuaḍio phọ,
7 kụ ọlo kopula nyọdi ọsighe ịdipho ọoru.
Awe dị olegheri ghan nyọdi kookia ghan ni ekpisi phọ ẹpe ọdi mạghi bọ.
8 Ọdi kape ịdipho ạmalha-aḍughul
bịn kọ́ḅile mun ọmiin.
9 Ọdi kape ni bịn sịphe ọdi ạrol ghan bọ;
10 kụ ạnmuny ọdi koḅulemi ịpe ọdi amiighi bọ ḍịghaagh arukulom mọ.
11 Aloor phọ ọdi iḍighi ghan ni loor ọbumoony ẹḅile ẹmoogh ịnyaam,
kụ ọlo keten ọoru.
12-13 Ịkaraph rẹdugh ghan iboom esi ọdi
dị tụtu ọdi ạpughughuom iniin sịphe ọnhu phọ ọdi kụ rạkelom ghan ḍịdugh phọ.
14 Kụ ọlo ẹpe ọkuruḅaka phọ ọdi eḍien phọ kekitonu ni ekiḍim,
ekiḍim ịdipho ọogho dị kakiigh oye.
15 Ọkaraph oye phọ rakuḅa ghan ni ẹelha phọ ọdi amiighi bọ;
Ẹnaan rẹḅile ghan ni kẹsighiogh emiteghom, ghạlamo mesi ni ologhi ọkuruḅaka.
16 Ịyaar dị ọkaraph oye ạmin ẹkigh ịdipho ọkaraph ọogho dị kakiigh ni oye;
kakiigh ni oye ịdipho ẹrol dị ẹkaraph-ịyaar kụ ilom.
17 Ọdi kạ́tol ạmiin rịphiiny ạmunum-ọliv
ọbo ọbo asikol dị ạmamaam rꞌẹnuum aḍiowo kụ rekil.
18 Ọdi kạbile oomo ịpe ọdi makumuan bọ ạmoogh;
ọdi kạ́moogh ọgel ọghelom ẹelha phọ ọdi,
19 loor esi dị ọdi ạgbiphoghom ni ạḅile ạḅitonaan rukulom mọ,
ạḅile azirion ạsighiogh ruutu dị ạbunon awe kụ ọlogh.
20 Ịyaar nyọdi rẹ́gbaanyan ghan.
21 Mem lọ ọdi ale eḍien, rásugheeny ghan ịyaar,
kụ ọlo nyịidipho ẹelha phọ ọdi mesi eekuna.
22 Mem dị igbogh phọ ọdi mẹkaraghi ẹbugh,
oomo ẹemor ịminimiin kẹezighiḍi ni nyọdi.
23 Ọdi ale ni oomo ịlo ọdi rạwa!
Ẹnaan kẹliom ni nyọdi esi ọghagh ologhi.
24 Mem dị ọdi ạkparagha okpetenaan elhool ẹgham arukuron,
ạkumugh dị oḍighinom enaba kẹtaph ni nyọdi eler.
25 Ekpo-ẹkpina egim ni loor phọ ọdi;
ịḅaal phọ ọdi rẹteph ni sịphe ọnhu ẹkpina phọ kụ aruugu masiph ekpom ọdi.
26 Oomo phọ ạraraar phọ ọdi aseere bọ moogulemi;
ạnian dị oye ụ́kpooni
kekoph nyọdi rꞌọto kꞌọdi.
27 Ạke phọ magananami ịkaraph oye phọ ọphon phọ,
ḅịle ade phọ mẹgba epume nyọdi.
28 Oomo ẹelha phọ ọdi koogulemi ni
esi ạmuum-aḍigho ạghelhe phọ Ẹnaan.
29 Ọphon kụ ọda ịkaraph awe,
ọda dị Ẹnaan meseenaan bịdi.