Job
16
1-2 Mị mạnaghan ghan ni ọdo ikpo ọnhu phọ ịphen;ịidereghi phọ nạ ạngo bọ eḍighi ịminimiin bịn.
3 Nạ kạtol ọghaaph ọghaaph bịn kꞌagee-pọ ḍụghum?
Ogina ạna bịn kụ kạkaaph ghan bịn emineen ḍụghum?
4 Eḍighi ịyaar dị nạ odi dọl phọ ạmi kụ mị odi ḍịphe ạna,
mị mutue ni ạghaaph oomo ịphen nạ rạkaaph bọ.
Mị mutue ni aphighemi ẹmhu ạmi ịlo olegheri-ịyaar
kụ mụsighe ikpo ọnhu dị ẹghigh mụum-aḍigho ẹminom nyịna.
5 Mị mutue ni ạsighe oroma ạngoom nyịna,
ạḅile ạghaaph ghan ạadereghiom nyịna.
6 Kụ ọlo ịyaar dị mị ạḅem dị kẹlogh ḍịghaagh ílho,
kụ oḅoorian kẹn bịn ọ́phoomi eephina phọ ạmi.
7 Nạ maḍighi ịdi aloor phọ ạmi mẹyololo, Ẹnaan;
nạ mameera mọ ọze eghunotu phọ ạmi.
8 Nạ musiph ịmi; nạ ẹpomoghian ạmi.
Mị masugha ruzu rꞌịḅarara bịn,
kụ awe ọsighenom ịduon phọ mọ eḍeenaan ọpioman phọ ạmi.
9 Esi ọghagh ologhi Ẹnaan mịphanyi ịmi ẹmadan;
ọdi ạnmagharan kụ ruphoghom ịmi ḍikia.
10 Awe rụnmoghoghoom ghan ịmi;
bịdi ukoom ịmi kụ uuḅorogh ịmi.
11 Ẹnaan mịḅogh ịmi ẹngo ịkaraph awe.
12 Mị ụrol ghan ni dọl ẹepho,
kụ Ẹnaan ẹpogh ooko ạmi
kụ ịgurogh ịmi eetughuḍi.
Ẹnaan ịsighe ịmi kụ eseere rẹtuughaam ghan ọraph ọka,
13 kụ rạtaḅal ghan oomo ạmi ịkpina —
ikpo-ịkpina dị regim ghan kiḍighi ịmi ịyaar;
kụ ghạlamo ịduon phọ ni kẹn bịn ọdi óḍeenaan igbiririph.
14 Ọdi ruḍighi ghan ịmi rạraar elegh bịn kạghiom risigh;
ọdi uzuom ịmi ẹgham ịdipho oye ẹgham lọ raḍigh ẹlaal esi aḍikia.
15 Mị odi ọto kụ ạkpologhian rukpe-ọto,
kụ mị ạtol sịen ophugh phọ, aloor ạmi medugh.
16 Mị mamoghi tụtu arisigh ạmi rạtogh,
ariḍien phọ ạmi mewuphogh oogho akitonom,
17 kụ ọlo mị ụ́piom ọphue ịyaar oye,
ḅịle kẹn ịiḅereghi phọ ạmi esi Ẹnaan ẹki ni oyen.
18 Nạ Ade phọ, kạ́booghi ịkaraph phọ ịphen muḍighi bọ ịmi!
Kámeera awe ọzerom iiḅi ịiruen phọ mị ạlho bọ rạmagh ghan.
19 *Oye odi ni ẹpe kꞌạke
dị kameera ọgbaanaan ạmi.
20 Ạrighiri ạmi rụmilogh ghan ịmi;
ariḍien phọ ạmi rezu ghan izin kephoghom Ẹnaan.
21 Mị rạwa ni oye dị kạaḅereghian Ẹnaan loor ẹmhu ạmi,
ịdipho oye rakol ghan bọ ọyaghiri ọdi kạaḅereghian.
22 Ạsia phọ ạmi remuneen,
kụ mị ratelhe eten phọ ẹpe rótigheel ghan bọ.