3
*ADevid ọdaam mọ, ọde phọ ạSolomon, maakolobian esi aseenaan Otu Ọmoogh-we phọ. Ẹpe Jeruselem, ạnyu Eegum aMoraya, esi phọ ẹpe Arauna ọnyo aJebusait phọ aghum ghan bọ riiḍien ikpo phọ. ẠSolomon ọdaam mọ amiigh ọlogh Otu Ịiḅereghi phọ 2 ụnwanyu dị amuneniom ịyal, lhạ dị eḍighi inya ọda phọ ọdi. 3 Otu Ịiḅereghi phọ ạSolomon ọdaam mọ ạlogh bọ aḍighi 27 akuḅu ḍịdoony kụ 9 akuḅu ẹreghe. 4 Osoph phọ ọpo roḍigh bịn, ạregh aaleeny ẹreghe Otu phọ, 9 akuḅu, kụ aḍighi 54 akuḅu ḍiphoph. Sịphe ologhi otu phọ uleenyiom ọkar agol ogbotu. 5 Ọkar osoph phọ ọḅagham rạsaga kụ ozuom ude phọ ogey agol dị ọpoghogh mụdi areelhe kụ oniin atulan nyoniin. 6 Ọdaam mọ ạnighemiom Otu Ịiḅereghi phọ rꞌịma ịbekulari rꞌagol dị ọsighe kꞌẹpe de aPavaim kụ oru. 7 Ọdi ạsighe gol phọ ạdamaghiom aḍue oomo iikpe Otu Ịiḅereghi phọ, ịgurom mọ, ạrunhu-aḍibuo phọ, rꞌarughuugh phọ. Sịphe iikpe phọ, awe iiḍighi phọ ụpoghogh rụukpaany aghuḍuul dị ẹmoogh raphaaph. 8 *Osoph ologhi phọ oghol bọ mọ Ẹphan phọ iḍighi esugha akuḅu ḍịdoony rꞌesugha akuḅu ẹreghe, dị eḍighi oomo ẹreghe Otu Ịiḅereghi phọ. Epel 20 ọkaraghi igbogh ịtoom ẹemor agol ọsighe bọ kụ ọdamaghiom iikpe Ẹphan phọ. 9 570 ịtoom ẹemor agol dị ootughuḍi kụ ẹdi ọlemom iḍugh, kụ iikpe iisoph ạnyu phọ ụdaaghiom kẹn gol.10 *Ọdaam mọ ạḅeni kẹn we iiḍighi phọ mọ ọsighe ạmama ọlemom ịyal ạruukpaany aghuḍuul dị ẹmoogh raphaaph, kụ okpoghom gol kụ oseere sịphe Ẹphan phọ, 11-13 esi dị bịdi kọtol eniin ẹrolom kụ opogh ghan eḍighom mọ. Tọrobo ọnyo ạbidi ạmoogh ịyal araphaaph, oniin ạloghom ịyaar esi 2.2 akuḅu ḍịdoony, dị ọotarion kụ oniin ạḅogh nyoniin sịphe ogbo osoph phọ kụ ẹteeny iikpe ịyal ịigaany osoph phọ, ọgbuton ọḅeenye oomo ẹreghe phọ dị ẹwa ọman esugha ariisi ọtoom. 14 *Ukpe osophom Ẹphan phọ ụkolom ọyegheyeghe rꞌịnon arukpe dị ọotoghoḍiom ạbiloogh, oodor rꞌọtogh-tọgh kụ oḍighi rạraar dị ẹmoogh raphaaph ooteneghiom.
Ịyal ạroko enaba phọ
15 Ọdaam mọ ạlhem ịyal ạroko enaba, ạḍidoony phọ ẹman bọ 15.5 akuḅu eniin ẹko, kụ asereghi ghisigh Otu Ịiḅereghi phọ. Tọrobo ọnyo ạbidi ạmoogh eme dị aḍiphoph ẹman 2.2 akuḅu. 16 Ụnighemiom ạnyu ạroko phọ ịkomoghineen izime dị ooteneghiom 100 iimuma dị eḍighi enaba. 17 Usereghi rọko phọ ịigaany eḍighom Otu Ịiḅereghi phọ: nyẹpe ạga esoorom mọ ughol mọ aJakin kụ nyẹri phọ ạga ephunom mọ ughol mọ ạBoaz.