Rookolobian ọlogh Otu Ịiḅereghi phọ
2
ẠSolomon ạatughian ọlogh otu ịiḅereghi esi ooseeny ghan Ọmoogh-we phọ, ọḅile ọlogh otu-ọolha ọlo ọdi. 2 Ọdi asereghi ni 70,000 awe orool ạraraar ọḍua esi ọghimom ẹnon, ḅịle ra 80,000 awe oogbo asighiigh. Ọrol bọ 3,600 awe dị ophogh ghan iiḍighi phọ.3 ẠSolomon arom dom ạghiom Hiram ọdaam mọ aTaya mọ, “Muul ḍighi ạsuo rꞌạmi ịdipho nạ amuul bọ rꞌaDevid ọde phọ ạmi, mem mọ nạ aalha bọ nyọdi ikulha ireeny ọsaga ịlo ọloghom otu ọdaam mọ ọdi. 4 Mị rạlogh otu ịiḅereghi oghueniom Ọmoogh-we Ẹnaan phọ ạmi. Keḍighi esi iigbia dị awe ạmi rꞌạmi kooseeny nyọdi kụ ọsu ghan ịnsens ịma eḍu, esi dị kosereghi ạbred ọngo nyọdi oomo amem, rꞌesi dị kọpinyon ghan rịkia oguom ạnian, ḍịroor ḍịroor rꞌadulhe adulhe, tọrobo aḍio ophooghian rꞌẹyaal omoom ụnwanyu rꞌịnon ariiḍio iigbia oghueniom Ọmoogh-we Ẹnaan phọ ayoor. Ọdi mạto mọ Ịzirel oḍighi ghan ịphen phọ kꞌagee-pọ. 5 Mị ạatughian ọlogh ogbogh otu ịiḅereghi, ịdi eḍighi bọ Ẹnaan ayoor kụ ipu tọrobo ẹkaaneen ẹnaan. 6 *Oye ólho dị katue ạloghonaan otu Ẹnaan loor esi dị ghạlamo oomo ẹreghe ạnyu ạke phọ kẹ́kasian nyọdi. Ika kụ ẹdi mị kạlogh bọ otu dị kapel esi ọsu ghan ịnsens ọngo Ẹnaan. 7 Nyịidipho uruomaan ịmi oye lọ alegheri ịlo ọpoghogh ịyaar, dị kaḍighinom gol, silva, enaba rꞌarukuron, rꞌọlemom, ạbiloogh, oodor rꞌọtogh-tọgh ukpe. Ọdi kaḍighi oḍighi rꞌawe ẹmaar phọ aJuda rꞌaJeruselem, bụphe aDevid ọde ạmi ạson bọ. 8 Mị alegheri ịdi awe oḍighi ireeny anyina ọmaar, kụ uromaan ịmi rạsaga, robool rꞌiirum-ireeny ịpe edi ghan bọ Lẹbanon. Mị ạnya orom awe ạmi ọloghonaan ḍịghaagh bụo ạna 9 oselemi ịbadi arukulha ireeny, ịdi eḍighi bọ otu ịiḅereghi phọ mị rạatughian bọ ọlogh phọ kạbugh kụ ạnighe. 10 Esi ạraraar dị awe iiḍighi ạna kole, mị karuomaan nyịna 2,000 ọkaraghi igbogh ịtoom ẹemor ọbiakpa, 2,000 ọkaraghi igbogh ịtoom ẹemor abali, 400,000 aruuku amiim, ra 400,000 aruuku ạmunum-ọliv.”
11 AHiram ọdaam mọ ạge ḍịnya ọphagharanaan ạghiom Sọlomon ịduon: “Loor esi dị Ọmoogh-we phọ ạphomoghian bọ we phọ ọdi, ọdi maḍighi nyịna ọdaam ạbidi. 12 Ạḍiseph ẹrolonaan Ọmoogh-we Ẹnaan phọ Ịzirel, Ọlemia ạke rꞌade, dị ạngo bọ Devid ọdaam mọ mọony dị ạsu ologhi, dị olegheri ịyaar amuza loor rꞌẹmaar; ọdi nyịidipho raakolobian ọloghonaan otu ịiḅereghi Ọmoogh-we phọ ḅịle rꞌotu ọlo ọdi. 13 Mị raruom nyịna oye ologhi rꞌẹmaar dị oghol mọ aHuram. 14 Onhiin ọdi ọlo eghun ạDan kụ ọde ọdi ọkar ọlo aTaya. Ọdi ạmaar oḍighinom ạraraar gol, silva, enaba, rukuron, sighiigh rꞌireeny. Ọdi ạmaar ọlemom ạbiloogh, oodor rꞌọtogh-tọgh ukpe. Ọdi arue ni aḍighi ịbadibadi iiḍighi olooghiom ịyegheyeghe arukpe ḅịle arue ni aḍighi tọrobo ịlo ọḅeni nyọdi. Ọdi aḍighi aani rꞌawe ẹmaar phọ ạna rꞌạbuphe oḍighi ghan bọ rꞌọde phọ ạna Devid ọdaam mọ. 15 Kụ nyịidipho uruomaan iyoor ịbiakpa, bali, miim rꞌạmunum-ọliv phọ ịpe nạ aguanaan bọ. 16 Sịphe ạraaḅaraph phọ ạLebanon, yoor koogbo ni oomo ọsaga phọ nạ ạwa bọ, ọkoroghi esi esi, ọḅam ạnyu ạmuum, opoophom osi kꞌẹpe Jọpa. Kụ nạ ạsighe sịphe kụ asiom Jeruselem.”
Omiigh ọlogh Otu Ịiḅereghi phọ
17 ẠSolomon amiighe loor agbi oomo aruuruen dị ọrol de phọ Ịzirel, ọdo phọ ịpe aDevid ọde phọ ọdi agbi bọ. Ọrol bọ 153,600 aruuruen. 18 Ọdi asereghi ni 70,000 awe orool ạraraar ọḍua esi ọghimom ẹnon, ḅịle ra 80,000 awe oogbo asighiigh sịphe ạraaḅaraph phọ, kụ ạmaaghi 3,600 bụo ophogh ghan ọmiin mọ oḍighi ni oḍighi phọ.