Bụo aFilistia phọ okel Devid
29
Awe aFilistia phọ uukpomoghi ni oomo awe ẹgham mọ ạbidi ẹpe Afek; kụ awe Ịzirel phọ odoghoḍi rugbogo ẹgham ạbidi otumeniom okol ạmuum ẹpe eḍiiny phọ ạJezreel. 2 Oogh phọ ạbudaam mọ aFilistia uḅerenu ni oḍiemiom weye ẹgham mọ ạbidi, buniin oniin okuron, buniin oniin ọonir awe; aDevid rꞌawe phọ ọdi usugha ọman, bịdi rꞌAkis ọdaam mọ. 3 Abuḍiemiom ẹgham mọ aFilistia phọ ụmiin ni bịdi kụ opuru mọ, “Awe aHibru phọ ạbuen phọ roḍighi ghan eeghe sịen phọ?”Kụ Akis ạphagharanaan mọ, “Ọphon kụ aDevid phọ, oniin oye ịtooghi ạSol ọdaam mọ Ịzirel. Mebia ni ọdi odi ghan bọ rꞌạmi. Kụ ọdi kőḍighi ghan ịyaar dị mị kạtuan ạḅaam nyọdi kꞌaḍio phọ ọdi aru bọ.”
4 Kụ ọlo abuḍiemiom ẹgham mọ aFilistia phọ ụghagham ni ologhi Akis kụ ọḅeni nyọdi mọ, “Ḅulemi oye phọ ọphon ẹpe ẹmha phọ nạ ạngo bọ nyọdi. Kámeera ọdi ụdaph iyira ạghi ẹgham mọ. Ọdi katue ni akitonaan atuphiom weye phọ ayira mem lọ robeeghi ẹgham mọ. Ẹghen kụ ẹnon eten dị ọdi kạsighe ạḅile ạmooghom ḍigey aḍien esi ọde-otu phọ ọdi dị epel rụmhu awe phọ ayira lọ ọdi ạze? 5 *Ọphon phọ kụ aDevid phọ ni, ọpo ạnmariir phọ ọmoorom ghan bọ kụ ọgher ghan bọ mọ ‘ẠSol mạze ni sịmuunir, kụ ọlo aDevid ạze sịmuunir ạsimuunir.’”
6 Akis ạmagh Devid kụ ạḅeni mọ, “Mị akunya rꞌaḍien Ẹnaan phọ Ịzirel ẹpe edi ghan bọ bịn phọ mọ nạ rạnaghanan ghan ni ịlo mị ạḅem. Kụ kịḅeeraan ni ịmi lọ nạ kụdaph ịmi ạki aani ẹgham mọ ẹphen. Mị kọ̋miin ghan ịyaar ọtuan ọḅaam ạna kꞌaḍio phọ nạ arigheel bọ ẹphen kꞌạmi. Kụ nạ ọ́ḅeeraan bụeri phọ abuḍiemiom mọ. 7 Kụ iḍighi kụ keel ẹpe ologhi otu nyịidipho rꞌẹepho, ḅịle kẹn káḍighi ịyaar lọ kekia ghan bịdi.”
8 Kụ aDevid apuru Akis mọ, “Mịna ụpioman eeghe, oye phọ? Eḍighi ịyaar dị ịduon nạ kụ ạḅem bọ ni mọ nạ ụ́miin ịyaar ọtuan ọḅaam ạmi emiigh kꞌaḍio phọ mị amiigh bọ okumu ạna, eeghia kụ iḍighi bọ kụ mịna kạ́daph bọ ọde-otu phọ ạmi rꞌọdaam mọ ạki eenan ẹgham rꞌẹpomoghian phọ ạna?”
9 Kụ Akis ạphagharanaan mọ, “Mị ameeraam ni. Mị ạmiin ni mọ nạ rạnaghanan ghan ni ịlo mị ạḅem ịdipho ọokpaany kꞌẸnaan. Kụ ọlo ạbueri phọ ạbudaam mọ úmeera mọ nạ ụdaph iyoor, ạghi ẹgham mọ. 10 Kụ iḍighi kụ, Devid, eḅon ạḍiroor iḍueneen ḅetenu agheel, nạ rꞌoomo phọ anyina ẹwile bọ Sọl kụ erigheel ẹphen kꞌạmi. Mem lọ rọmiina siloor, ịḍua egheel.”
11 ADevid rꞌawe phọ ọdi oḅetenu eḅon ạḍiroor ạḍieri phọ aḍio phọ onyeene ogheel ẹpe Filistia. Kụ bụo aFilistia phọ oten ọghi osi ẹpe Jẹzreel.