Igbiighi
Ẹḅel amem ogbi awe phọ Ịzirel
1
*Ḍịḅel aḍio omuneniom ịyal ụnwanyu esi ạlha dị emuneniom ịyal dị awe phọ Ịzirel mọḍua bọ ẹpe eelhe phọ Ijipt, ḍịḅel aḍughul-otu ịyal ụnwanyu ạlha phọ, aMozis odi sịphe ẹdala phọ aSainai sịphe Ogbogo Ạdol Ọmoogh-we phọ kụ ọdi ạghaaph ạḅeni nyọdi mọ, 2 “Nạ rꞌEeron igbi oomo aḍita awe phọ Ịzirel, bụo ọto rꞌopolo kꞌạburude phọ ạbidi, elegheri ọnhu ịlo bịdi ọman, ẹge siḍien ạbidi, oye rꞌoye, 3 emiigh bụlo mọman ịyaldi ạsia kụ ẹghiom risigh, bụlo mọmanam ọghi ẹgham sịphe Ịzirel, oki atum oki. 4 Eghun eghun, oye oye kụ ọḅaram rꞌanyina, oye lọ aru uwo ẹmhu sịphe ọto phọ ạbidi.” 5-16 Bụen kụ ạbudi mọmaaghi bọ omitiom sịphe ogbo aḍita ịsiphe arughunughun phọ Ịzirel ịlo oḍighi phọ ọphon:| Eghun | Uwo ẹmhu ọto |
| Ruben | Elizur ọony phọ aSedeur |
| Sịmion | Sẹlumiel ọony phọ aZurisadai |
| Juda | Nason ọony phọ Ạminadab |
| Ịsaka | Nẹtanel ọony phọ aZuar |
| Zẹbiulon | Eliab ọony phọ aHelon |
| Ifraim | Elisama ọony phọ Amihud |
| Mạnase | Gạmaliel ọony phọ aPedazur |
| Bẹnjamin | Abidan ọony phọ aGidioni |
| Dạn | Ahiezer ọony phọ Amisadai |
| Ạser | Pạgiel ọony phọ Ọkran |
| Gạd | Eliasaf ọony phọ ạDeyel |
| Nạftalai | Ahira ọony phọ Enan |
17 AMozis rꞌEeron ọsighe we phọ ạbuen phọ ọgo bọ siḍien ạbidi. 18 Kụ ḍịḅel aḍughul-otu ịyal ụnwanyu phọ, kụ bịdi ookpomoghi oomo aḍita awe phọ egina esi, kụ ọgeeghian siḍien ạbidi bụo ọto rꞌopolo, bụo ọto rꞌọto kꞌạburude phọ ạbidi. Ọdaph ọnhu asiḍien phọ ogbi bụo mọman ịyaldi ạsia kụ ọghiom risigh. 19 AMozis ạtuugh ịdipho Ọmoogh-we phọ ạghaaph bọ ạḅeni nyọdi agbi we phọ ẹpe Ẹdala aSainai. 20-46 Awe phọ ogbi bọ omitiom bụo ọto rꞌopolo, ọto rꞌọto kꞌạburude phọ ạbidi, bụlo mọman ịyaldi ạsia kụ ọghiom risigh, tọrobo oye lọ mạmanam ọghi ẹgham, emiigh kꞌeghun phọ aRuben ọkpana ọony phọ ạJekob:
| Eghun | Ọnhu |
| Ruben | 46,500 |
| Sịmion | 59,300 |
| Gạd | 45,650 |
| Juda | 74,600 |
| Ịsaka | 54,400 |
| Zẹbiulon | 57,400 |
| Ifraim | 40,500 |
| Mạnase | 32,200 |
| Bẹnjamin | 35,400 |
| Dạn | 62,700 |
| Ạser | 41,500 |
| Nạftalai | 53,400 |
| 603,550 |
47 Eghun phọ aLivai, ọto rꞌopolo, ọto rꞌọto kꞌạburude phọ ạbidi, úgbiom aani, 48 loor esi dị Ọmoogh-we phọ ạḅeni Mozis mọ, 49 “Kạ́ḅaram eghun phọ aLivai ágbiom aani sịphe awe phọ Ịzirel. 50 Sịghe bịdi aseere sịphe Ogbogo Ạdol phọ ạmi, bịdi ophogh ghan oomo ạraraar phọ edi bọ sịphe Ogbogo phọ rꞌoomo ạraraar iiḍighi phọ eru bọ ịlo ịsiphe. Bịdi okumuan ghan rukumuan ịsiphe Ogbogo phọ; bịdi orugh okoom Ogbogo phọ. 51 Kụ mem lọ kopoophe Ogbogo phọ ọḍuanam, bụo kꞌaLivai kụ ọsighe ghan oseere ude, kụ mem lọ kọmeremi Ogbogo phọ, bụo kꞌaLivai kụ ogim ghan ọmeremi. Kụ oopho oye kụ ạghi atuman sịphe phọ, pọ ikiigh oye phọ ọpo. 52 Awe phọ Ịzirel odoghoḍi rugbogo phọ ịpe ạbidi; bụo ẹku rꞌẹku, uwo ogbogo rꞌogbogo ọdi, oye ye ạlogh ịpe ẹḅeeraan bọ nyọdi. 53 Kụ bụo kꞌaLivai orugh okoom Ogbogo phọ ạraraar ọghiom ologhi phọ, ọbo ọgbaragbara kạtol ghan bọ ogbo awe Ịzirel. Bụo kꞌaLivai kụ ạbudi ophogh ghan Ogbogo phọ.” 54 Oomo phọ ịpe Ọmoogh-we phọ ạto bọ ạḅeni Mozis kụ ịdi awe phọ Ịzirel ọtuugh ghan oḍighi.