Aḍio iiwopha
16
Ikpo ọnhu Ọmoogh-we phọ iru ẹteeny Mozis mem mọ ịyal phọ ạnmuny phọ Eeron momugh bọ, mem mọ bịdi ọghi bọ egbodo Ọmoogh-we phọ oḍighi eeruen ịyaar aghuḍum kụ ọrol bọ sịphe omugh. 2 *Ọmoogh-we phọ ạghaaph ạḅeni nyọdi mọ, “Ḅẹni Eeron umor phọ ạna mọ ọdi kúgbor ghan uḍigh sịphe osoph Ẹphan phọ, ẹpe ọkpo bọ ukpe phọ osophom, ọbo ọdi kamugh ghan bọ, ịdi eḍighi bọ ịsiphe kụ ẹdi mị ramite ghan ologhi ọotu sịphe ạnyu ekpereghi phọ edi bọ ạnyu Igbe Ịyo phọ. 3 *Eeron ạphur ạsighe rạraar phọ ịphen ạpham arumom kụ agbi oḍigh: ḍiniin onyugheel aḍilephiri ạnam ọlo oḍighinom ịyaar aghuḍum ịkaraph, rꞌoniin odughuna ọlo oḍighinom ịyaar aghuḍum oguom ạnian.”4 Ọmoogh-we phọ ạto ạḅeni Mozis mọ Eeron ạphur ạghi asoor ologhi ạmuum awura kụ agbi ọkpologhian ạsuoma ekpologhi phọ ọdi rꞌạsuoma phọ ọpo ạḍua bọ esin ọdi ạteeny ruukum rꞌokugham, kụ agbi ọsighe onyora mọ onyora, ọsighe eghoony ịkiapu phọ ozua. Ịphen phọ ibura oyil ạrikia phọ. 5 Aḍita ookpomoghan awe phọ Ịzirel kọngo ghan Eeron ịyal arekpe ịlo oḍighinom ịyaar aghuḍum ịkaraph, rꞌodughuna ọlo oḍighinom ịyaar aghuḍum oguom ạnian. 6 Ọdi kạsighe ḍilephiri ạnam ạphighironom ẹkia owopha loor ọdi, awoph ọto kꞌọdi rꞌọdi ạsighe ịkaraph. 7 Ịphen phọ reten kụ ọdi ạsighe ịyal phọ arekpe phọ aseere egbodo Ọmoogh-we phọ, sịphe ọnhu-aḍibuo Ogbogo Ạdol Ọmoogh-we phọ. 8 Kụ ạsaami ẹlhel rekpe phọ, eniin ẹlhel phọ ẹlo Ọmoogh-we phọ, ẹpheri phọ ẹlhel ẹlo Ạzazel. 9 Kụ ạsighe ekpe phọ nyẹpe ẹlhel phọ eḍeenaan bọ mọ ọlo Ọmoogh-we phọ, ạsighe ạki ạphighironom ẹkia ịkaraph phọ. 10 Kụ ọsighe ekpe phọ ẹpe ẹlhel Ạzazel phọ esiph bọ, ọsighe ọogharanaan oḍeenaan ekpe phọ imoom ọngo egbodo Ọmoogh-we phọ, ịlo ọsighe ọghi oroph ẹpe ẹdala phọ Ạzazel.
11 Eeron kạsighe ḍilephiri ạnam mọ ạḍiphe ọdi kaḍighinom bọ ịyaar aghuḍum owopha loor phọ, awoph ọto kꞌọdi rꞌọdi ạsighe ịkaraph. 12 Ọdi kạsighe ọkeeghi ạkophom iiḅu ạnian amuzeḍi, ạki ẹpe enmeny ạrikia phọ egbodo Ọmoogh-we phọ, ạsighe ḍịghaagh ọdi akpophom ịnsens lọ ẹman ịyal ẹezua ạḍighaagh ọdi, ạsighe atu sịphe Ẹphan phọ, 13 ạsighe ịnsens phọ asumeeny sịphe ạnian phọ edi bọ egbodo Ọmoogh-we phọ, ọbo ạmughi ịnsens phọ aakpereghiom ekpereghi Igbe Ịyo phọ, ọbo ọdi kạmiin ghan bọ amugh. 14 Ọdi kạsighe ghụnugh ọdi atiom ịḅaal ạnam mọ ạsighe ạsaraghi sịphe esomanan ekpereghi phọ rꞌịsiphe aghisigh Igbe Ịyo phọ oḍual amem.
15 *Ịphen phọ reten, kụ ọdi kakiigh ekpe phọ nyẹpe ọpinyonom ẹkia ịkaraph phọ awe phọ Ịzirel, kụ ạsighe ịḅaal phọ ạsighe atumeriom sịphe ukpe phọ ọkpo bọ, kụ ạsighe ịḅaal phọ ạtuugh aḍighinom ịdipho ọdi aḍighi bọ ịḅaal aḍilephiri ạnam mọ, ạsighe ạsaraghi ạnyu ekpereghi phọ rꞌegbodo Igbe Ịyo phọ. 16 Kụ ọdi awoph Ẹphan phọ ạsighe esi oomo ịkaraph phọ rꞌoomo ạsipioman phọ awe phọ Ịzirel oḍighi yogh bọ. Ịphen kụ ịdi ọdi kaḍighi aani Ogbogo phọ bịdi ọrolom bọ ịkaraph phọ ạbidi kụ ọopu bọ sịphe phọ. 17 Oye kụ́tol sịphe Ogbogo phọ, egbi kꞌamem mọ Eeron maḍigh bọ owopha oselemian aloor phọ ọdi rꞌọto ọdi rꞌoomo aḍita ookpomoghan phọ Ịzirel tụtu ẹteeny mem mọ ọdi kạḍua bọ amite. 18 Ịphen phọ reten, ọdi kạki sịphe enmeny ạrikia phọ edi bọ egbodo Ọmoogh-we phọ, awoph aselemi; kụ ạsighe ịḅaal aḍilephiri ạnam mọ rꞌịḅaal ekpe phọ ạsanyan ologhi ạraphaal phọ edi bọ sịphe enmeny ạrikia phọ akitonom. 19 Kụ ạsighe ghụnugh ọdi atiom ịḅaal phọ, ạsaraghi sịphe phọ oḍual amem, ạasa aselemi, agbianaan iigbia ịlo esi phọ ịsiphe phọ, ịlo ạruupuan phọ ạnmuny phọ Ịzirel.
Ọga adool ịkaraph phọ
20 Kụ Eeron rọmadan iiwopha ịsiphe Ẹphan phọ rꞌịsiphe Ogbogo Ạdol Ọmoogh-we phọ rꞌịsiphe enmeny ạrikia phọ, kụ ọdi agbi ọsighe ekpe phọ nyẹpe úkiigh bọ ọsighe oru. 21 Eeron ạsighe rạghaagh ọdi ạzuom ẹmhu ekpe phọ kụ aatuma oomo ạsipioghom rꞌạsipioman rꞌịkaraph phọ awe phọ Ịzirel ạḅam ẹmhu ekpe phọ, kụ ạsighe ạngo oye lọ aseleman mọ ạsighe ạghi aroph ẹpe ẹdala phọ. 22 Ekpe phọ erool oomo ạsipioghom mọ ạbidi, egheelom ekpisi lọ awe útugh, kụ ọdi ạwile ọga phọ dị asuma ạghi ẹpe ẹdala phọ.
23 *Ịphen phọ reten, Eeron kạki aḍigh sịphe Ogbogo phọ, ạkporonaan rụsuoma phọ ịpe ọdi ạkpologhian bọ mem mọ dị rạki bọ sịphe Ẹphan phọ asereghi pạ. 24 Ạsighe mụum ịsiphe Ẹphan iigbia phọ abura, ạsighe rụsuoma phọ ọdi ạkpologhian, atu amite ạpighironaan ẹkia oguom ạnian phọ ọdi rꞌịyaar aghuḍum oguom ạnian phọ, nyẹpe awe phọ Ịzirel, awoph we phọ rꞌọdi ạsighe esi ịkaraph. 25 Kụ ọdi ạsighe ẹnuum ẹnam mọ ẹpe oḍighinom bọ ịyaar aghuḍum ịkaraph phọ aguom nịan sịphe ạnyu enmeny ạrikia phọ. 26 Kụ oye phọ ọpo ạsighe bọ ekpe aragharanaan phọ ạghi aroph ẹpe ẹdala phọ Ạzazel kaatologh ni rukpe ọdi, asoor ologhi ạmuum abura, kụ agbi origheel ịsiphe ologhi arugbogo phọ 27 *Kụ ḍilephiri ạnam mọ rꞌekpe phọ, ịpe oḍighinom bọ ịyaar aghuḍum ịkaraph phọ, ọsighe bọ ịḅaal ạbidi kụ owoph bọ Ẹphan phọ oselemi, kọsighe ozu phọ, ịnam mọ, rꞌạriir phọ ạbidi ọḍuanam sịphe arugbogo phọ oguom nịan. 28 Kụ oye phọ ọpo ạsighe bọ ạghi aguom nịan phọ, kaatologh ni rukpe ọdi, asoor ologhi ạmuum awura, ạtol ẹpe phọ ẹnum amem kụ agbi origheel ẹphen arugbogo phọ.
Ịlo ooko ghan aḍio ọphomoghi oye rꞌẸnaan
29 *Ọphon phọ ologh dị awe Ịzirel kọpamanam kꞌagee-pọ. Ḍioph aḍughul-otu oḍual ụnwanyu phọ, bịdi ọrol ghan ọkoony, kúḍighi ghan rꞌẹnum oḍighi ḍio phọ ạḍiphe; mꞌọlo ịsiphe ẹmha phọ mꞌooruen lọ oḍighan rꞌạbidi. 30 Aḍio phọ ạḍiphe kụ ẹdi oyil ạrikia phọ kạboor awoph bịdi aselemi ạsighe esi ịkaraph phọ bịdi mọopuan bọ siloor phọ ạbidi egbodo Ọmoogh-we phọ. 31 Aḍio phọ ạḍiphe eḍighi ḍio ophooghian rꞌọrol ghan ọkoony esi ạbidi. 32 Kụ oyil abiil phọ ọpo modeneghi bọ mọ ạsighe esi ọde phọ ọdi kụ kạḅile ghan ạpinyon rịkia phọ rꞌiiwopha phọ, amunughian rukpe iiḍighi phọ rꞌạrusuoma iigbia phọ. 33 Ọdi kụ kạḅile ạmeera esi ọphinyon ghan ạrikia phọ sịphe Ẹphan phọ, sịphe Ogbogo Ạdol Ọmoogh-we phọ rꞌịsiphe enmeny ạrikia phọ. Kụ ọdi kụ kạpinyon ghan rịkia awoph bụpinyon rịkia phọ rꞌoomo aḍita ookpomoghan awe phọ. 34 Ịphen phọ iilogh dị kooko ghan kꞌagee-pọ. Mem bịn lhạ uwo ẹmhu oyil ạrikia phọ kạpighironaan ẹkia phọ ẹphen, awoph ghan we Ịzirel ạsighe esi ịkaraph phọ ạbidi.
Kụ aMozis ạdaph oomo phọ ịpe Ọmoogh-we phọ ạḅeni bọ nyọdi aḍighi.