Enmeny ạrikia phọ
27
“Ịsighe oreeny ạkasia kụ ẹkanam enmeny ạrikia. Inya phọ ạraghaagh phọ eeleeny ni, 2.2 akuḅu ḍịdoony, ḅịle 2.2 akuḅu ḍịregh, ḅịle kẹn 1.3 akuḅu ḍiphoph. 2 Ịlogh ni sịogho inya phọ aruukuna ẹpe ạnyu phọ. Ạsiogho phọ ẹḅophan ni rꞌenmeny phọ kụ eekpereghiom oomo phọ ọdi enaba. 3 Ịsighe enaba kụ ẹlemom sịgbagba ọboorom ọoru, rụsua, rụkpa, ịkoro ḅịle rꞌasuugh. 4 Ịsighe enaba ẹlemom enmeny kụ ekomori inya ịkoro enaba ọphamam ẹpe aruukuna phọ. 5 Ịkpo ẹkerekere phọ eeghelaan eeḍian enmeny phọ. 6 Ịsighe rọkolom ạkasia dị ogbul enaba ẹkaam ịkolom, 7 kụ eḅughe sịphe ịkoro phọ edi bọ ịigaany enmeny phọ mem lọ ophoophe. 8 Ịsighe ikpooghi kụ ẹkaam enmeny phọ kụ ẹwile ẹpe ologhi phọ aphoghogho, ọdaphan ịpe mị aḍeenaan bọ nyịna sịphe ạnyu eegum mọ.”Oghoony Ogbogo Ạdol Ọmoogh-we phọ
9 “Ịsighe ịyegheyeghe arukpe kụ ẹkpo eghoonyom Ogbogo Ạdol Ọmoogh-we phọ. Ạga esoorom mọ, arukpe phọ eḍighi inyadi rꞌinya akuḅu ḍịdoony. 10 Ịsighe ịyaldi ạroko enaba kụ egim, ẹḅile ẹsighe ịyaldi ạroko enaba esuom. Ạroko phọ ẹmoogh ni ịkoro rꞌạrokolom dị oḍighinom silva. 11 Ịtuugh ịduon kụ eḍighi aani ḍịghaagh ephunom mọ. 12 Ạga phọ ẹpe erumuḍio phọ remeel ghan bọ, ịkpooghi rukpe ịyaldi rꞌịyal akuḅu ḍịdoony, eguph ḍioph aropogh kụ egim iḍioph ạroko. 13 Ạga phọ ẹpe erumuḍio phọ remite ghan bọ, ẹpe ọnhu-aḍibuo phọ odi bọ, oghoony phọ aḍighi aani ịyaldi rꞌịyal akuḅu ḍịregh. 14-15 Tọrotoro ạḍighaagh ọnhu-aḍibuo phọ ịkpo ghan ukpe dị ạman 6.6 akuḅu, egim ịraar ạroko ẹphamam. 16 Sịphe ọkaraghi ọnhu-aḍibuo phọ, ịkpo ghan ukpe dị ạman esugha akuḅu ḍịdoony aḍighi ọyegheyeghe ukpe dị ooteneghiom ạbiloogh, oghozo ḅịle rꞌọtogh-tọgh ogbidagbida ukpe kụ ọḅile olo ọnighemi. Igim inya ạroko kụ ẹphamam. 17 Oomo phọ ạroko phọ ekitonom bọ oghoony phọ kokpoghom ikpo arukuron asilva ḅịle ịkomom mọ ạbidi eḍighi silva kụ ade phọ eḍighi enaba. 18 Oghoony phọ aḍighi inyadi rꞌinya akuḅu ḍịdoony, ịyaldi rꞌịyal akuḅu ḍịregh, ḅịle 2.2 akuḅu ạnyu. Arukpe phọ eḍighi ọyegheyeghe ukpe kụ ade phọ eḍighi enaba. 19 Oomo phọ ạraraar phọ koḍighinom ghan bọ sịphe Ogbogo phọ, oomo ạsikan phọ kẹpam bọ Ogbogo phọ rꞌoghoony phọ iḍighinom enaba.
Ịpe kopogh ghan bọ ọtozi phọ
20 “Tọ ạḅeni we phọ Ịzirel mọ ọsighe ọkar amugey ạmunum-ọliv oruom nyịna ạlogh ghan ọtozi phọ, pịdi ọsu ghan tọrotoro adulhe. 21 Eeron rꞌạnmuny phọ ọdi kụ kọsu ghan ọtozi phọ sịphe Ogbogo Ạdol phọ ạmi ẹphen esumanan ukpe phọ ọkpo bọ osophoghom Igbe Ịyo phọ. Ọtozi phọ kaamor ghan sịphe ạdol phọ ạmi emiigh dulhe tụtu ẹḅaal ḍịroor. Awe phọ Ịzirel rꞌẹemara ẹemara ạbidi ooko ologh phọ ọphon kꞌagee-pọ.