Ogbogo Ạdol Ọmoogh-we phọ
26
“Ịsighe ḍioph arukulha ịyegheyeghe arukpe kụ elhoom ạbiloogh, oodor, ḅịle rꞌọtogh-tọgh ogbidagbida ukpe lọ ạtogh kụ eselemiom ẹpe ologhi Ogbogo Ạdol phọ ạmi. Ilo oogho ạruukpaany aghuḍuul lọ ẹmoogh raphaaph kụ ẹdamaghiom. 2 Tọrotoro ekulha eeleeny ni, ḍioph rꞌịyal akuḅu ḍịdoony, ḅịle ịyal akuḅu ḍịregh. 3 Ịkol oogh ịne esi pạ oniin otu ukpe, ẹḅile ẹtuugh ịdipho eḍighi ịpheri phọ oogh phọ. 4 Ịsighe ukpe lọ aḍighi ạbiloogh ẹkaghagh ruukuna ekulha ukpe phọ ẹpe edi bọ ạnyu. 5 Ịkaghagh ooghdi ariisi ẹḅel ekulha ọḅel otu ukpe phọ ẹḅophan ẹḅile ẹkagh ooghdi ariisi ekulha eekuna omuneniom ịyal otu ukpe phọ. 6 Ịsighe ooghdi ikpo ịkomom agol ẹkomoghiom ịyal aruutu ukpe phọ etene nyoniin.7 “Ịsighe suphuugh ạrutu-ịga elhoom ḍioph rꞌoniin arukulha ukpe ezuom ghan Ogbogo phọ. 8 Iilemi ni oomo phọ arukulha phọ, ḍioph rꞌịraar akuḅu ḍịdoony ḅịle ịyal akuḅu ḍịregh. 9 Ịkol oogh arukulha esi oniin otu, ịpheri phọ odiiny phọ ọnon otu. Ikpooghi omuneniom odiiny ekulha phọ ịyal amem ezuom risigh Ogbogo phọ. 10 Ịkagh ooghdi ạruuḅugh aruukuna ekulha oniin otu ukpe phọ, ḅịle ooghdi ạruuḅugh aruukuna ọphori phọ otu phọ. 11 Ịsighe ooghdi ikpo ịkomom enaba ẹkomoghiom ạruuḅugh phọ ọkaghagh bọ etul ịyal aruutu ukpe phọ etene nyoniin. 12 Ịnyor ọpherepe lọ apeel ezuom ọman Ogbogo phọ. 13 Ooghdi ẹkulom ạḍighaagh ukpe phọ epeelogh bọ ẹedonya phọ, ezuom ịigaany Ogbogo phọ.
14 “Ịkol ịyal ịnon arekpereghi, eniin eḍighi ozu idughuna dị ogbul ịtogh-tọgh, ẹpheri phọ ozu ạnam eḍighi eghuugh esomanan phọ.
15 “Ịsighe oreeny ạkasia ẹkaam ịḅagham Ogbogo phọ. 16 Tọrotoro ọḅagham ạman ghan inya akuḅu ḍịdoony ḅịle 66 ẹkulom ạḍighaagh ḍịregh, 17 rꞌịyal ạsiogho dị eeleeny pịdi otue otulughi ịḅagham mọ. Oomo phọ ịḅagham mọ ẹmoogh ni sịogho phọ. 18 Ịka ịyaldi ịḅagham ẹlhogh ạpakiri esoorom mọ, 19 ḅịle ịsighe silva ẹlemom inyadi ipoḍi lọ kọlogh eeḍian phọ ạbidi, ịyal ipoḍi pịdi ẹpam ghan ịyal phọ ịpe ọmeremi bọ. 20 Ịka ịyaldi ịḅagham ẹlhogh pạkiri ephunom Ogbogo phọ, 21 ḅịle ịsighe silva ẹlemom inyadi ipoḍi lọ kọlogh eeḍian phọ, ịyal ịne eeḍian oniin ọḅagham. 22 Ẹpe ọman Ogbogo phọ, ạga phọ ẹpe erumuḍio phọ remeel ghan bọ, ịka odiiny ịḅagham, 23 ḅịle ịyal ịḅagham ẹrol ạrughulukul phọ. 24 Ịḅagham ịpe ẹkul phọ etulan emiigh ude kụ esi ẹpe ạnyu phọ. Ịtuugh ịduon kụ ẹka ịyal phọ ịḅagham mọ edi bọ ịyal phọ ạrughulukul phọ. 25 Pịdi ọphaanya ịḅagham kụ ẹtol rꞌaḍioph rꞌodiiny ipoḍi dị oḍighinom silva ẹpe eeḍian phọ, ịyal ịne eeḍian oniin ọḅagham.
26 “Ịsighe oreeny ạkasia ẹkaam ḍioph rꞌoogh igbonoghineen, oogh ịne ịlo ịḅagham eniin ạḍighaagh Ogbogo phọ, 27 oogh ịne ịlo ịḅagham ạḍieri phọ ạḍighaagh phọ, ḅịle oogh ịne ịlo ẹpe ebughotu phọ ẹpe erumuḍio phọ remeel ghan bọ. 28 Ogbogoriom mọ ọpo ogbo phọ, ọpo odi bọ ogboku ọḅagham mọ, ạḍua eniin eekuna Ogbogo phọ asi ẹpheri phọ eekuna phọ. 29 Ịsighe gol kụ egbul ịḅagham mọ kụ ẹsighe ịkoro agol kụ ẹphamam igbororiom mọ, egbul aani kẹn gol. 30 Tụugh ịpe mị ạḅeni bọ nyịna ạnyu eegum mọ kụ ạlogh Ogbogo phọ.
31 “Ịsighe ọyegheyeghe ukpe kụ ẹkolom ukpe ogbo phọ kụ elhoom ạbiloogh, oodor, ḅịle rꞌọtogh-tọgh ogbidagbida ukpe. Ilo oogho ạruukpaany aghuḍuul lọ ẹmoogh raphaaph kụ ẹdamaghiom. 32 Ịsighe oreeny ạkasia dị ogbul gol, kụ ọlogh ịkoro egim inya ạroko, kụ ẹkpo ukpe phọ, ude inya iizin phọ eḍighi silva. 33 *Iseere ukpe ogbo phọ eeḍian ạḍikool ịkoro phọ edi bọ ạnyu otu Ogbogo phọ; ḅịle ọman ukpe ogbo phọ iseere Igbe Ịyo phọ, pạ ọlogh bọ ịyal phọ ipoḍi asighiigh phọ ọge bọ iilogh phọ. Ukpe ogbo phọ kạgbarion Dọl Iigbia phọ ḅịle rꞌẸphan phọ. 34 Ịsighe ekpereghi phọ ẹḅam Igbe Ịyo phọ. 35 Esumanan Ọgbanaghi phọ iseere ịdaabili phọ ẹpe ephunom ạḍighaagh Ogbogo phọ, ḅịle ọmeremiom ọtozi phọ ạrol esoorom ạḍighaagh phọ.