Ja' li' yaloj ti iyal ti Pabloe ti tsc'an c'oponbel Rioxe yo' xp'olic o ti much'utic ta xch'unic li sc'op Rioxe
3
Ja' xa no'ox chacalbeic ti c'oponboticotic Rioxe yo' xp'olic o ta ora ti much'utic ta xch'unic li sc'op Rioxe, yo' xich'ic o ta muc' ti Rioxe chac c'u cha'al avich'ojic ta muc' li vo'oxuque. 2 C'oponic Riox noxtoc yo' mu xispajesoticotic o ti much'utic chopol sjolique ti mu sc'anic xvinaj sc'oplal ti Cajvaltic Jesuse. Yu'un mu scotoluc crixchano ta xch'unic li sc'op Rioxe. 3 Ti Cajvaltique ta onox stsatsubtas avo'onic, ta onox xaxchabiic yo' mu xcuch o yu'un ti pucuje yu'un yech yaloj. 4 Jpatoj co'onticotic ti yolel chapasic ti c'usitic icalticotic comele yu'un ja' chascoltaic ti Cajvaltique. Jpatoj co'onticotic noxtoc ti chach'unic ti c'usitic yan chacalbeticotique. 5 Ta jc'anbeticotic ti Cajvaltic Jesuse ti mu me xch'ay ta ajolic ti sc'anojoxuc ti Rioxe, yo' xcuch o avu'unic scotol li ilbajinele chac c'u cha'al icuch yu'un ti Jesucristoe.Ja' li' yaloj ti persa chi'abtejotique
6 Vo'otic ti jchi'il jbatic ta xch'unel li sc'op Rioxe, xu' chacalbeic jp'eluc mantal yu'un ja' yech tsc'an ti Cajvaltique. Ti much'u xch'unoj li sc'op Rioxe, mi ch'aj ta abtele, mu me xachi'inic, mu me xac'uxubinic. Yu'un mu xch'un ti lacalbeic ti tsc'an cha'abtejique. 7 Ana'ojic c'u x'elan ijpasticotic ti c'alal li'oticotic ta ateclumalique. Avilic ti li'abtejoticotique, ti muc bu ch'ajoticotique. Tsc'an ti ja' yechoxuque. 8 Mu ta matanaluc lajc'anbeic jve'elticotic; ijmanticotic. Ta c'ac'al ac'ubal ch'abal xocobel cu'unticotic. Icalticotic sc'op Riox, li'abtejoticotic yu'un mu jc'an xcac'ticotic avocolic yu'un ti jve'elticotique. 9 Ac'u mi yech sc'oplal ti chamac'linoticotique pero mu jc'anticotic yech. Li'abtejoticotic yo' xachanic o ti persa cha'abtejic uque. 10 Ti c'alal li'oticotic ta ateclumalique, ja' onox yech icalticotic: “Ti much'u ch'aj ta abtele, mu ya'uc ve'uc”, xichioticotic. 11 Yu'un ca'yojticotic ti oy jayvo' li' achi'uquic ti ch'ajic ta abtele. Ja' no'ox ta yo'onic slo'iltael xchi'ilic. 12 Ti much'utic yech tspasique xu' xcalbeticotic jp'eluc mantal yu'un ja' yech tsc'an ti Cajvaltic Jesucristoe. Ta xcalbeticotic ti ac'u abtejicuque yo' x'ayan o c'usuc yu'unique.
13 Vo'otic ti jchi'il jbatic ta xch'unel li sc'op Rioxe, mu me xtavan xava'iic spasel li c'usitic leque. 14 Mi oy much'u mu xch'un li c'usi lacalbeic tal ta vune, mu me xavaq'uic ochuc ta templo yo' xq'uexav oe. 15 Pero mu me xacrontainic o. “Mu xapas yech chac le'e”, utic yu'un achi'il abaic ta xch'unel li sc'op Rioxe.
16 Ti Cajvaltic Jesucristoe tspas ta jun co'ontic. Yech'o un ac'u spas ta jun avo'onic scotol c'ac'al yo' xcuch o ayu'unic ti c'usuc no'ox paltail chataique. Ac'u xchi'inoxuc o ti Cajvaltique.