3 Lavi co'ol chi'abtejoticotic xchi'uc ti Rioxe, mu jc'an mi oy much'u ta jta jmul ta stojole. Yu'un ja' mu jc'an ti chopol chbat cu'un sc'oplal ti Rioxe. 4 Yu'un ja' chitun yu'un, ja' ta jc'an ti ac'u vinajuc ti lec chbat cu'un li c'usi yalojbon ti chcal a'yuque. Li ilbajinele chcuch cu'un scotol. Ac'u mi abol xa jba, ac'u mi ch'abal xa c'usuc cu'un, chcuch cu'un. 5 Ac'u mi xquich' arsial, ac'u mi chistiq'uic ta chuquel, ac'u mi x'avlajetic xa ta jpat ta jxocon li crixchanoetique, ac'u mi tsots li abtele, ac'u mi oy mu xivay sjunul ac'ubal, ac'u mi oy bu mu jta jve'el, chcuch cu'un scotol. 6 Ja' no'ox chcac' iluc ti mu jc'an jpas li c'usi chopole, ti chul ta jol c'usi lec chil ti Rioxe, ti cuchem cu'un scotole, ti lec co'one, ti xchi'inojon ti Ch'ul Espíritue, ti chic'uxubinvane. 7 Li c'usi chcale yech. Ja' chcac' iluc ti chiscolta ti Rioxe. Lec ta jtac'be c'usitic chal ti much'utic sc'ac'alon yo'onique. Tuc' chcalbe ti much'utic chopol c'usitic tspasique. 8 Ja' ta jc'an ti lec chbat cu'un li c'usi yalojbon chcal a'yuque, ac'u mi ich'bilon ta muc', ac'u mi ch'abal, ac'u mi oy much'u lec c'usi chiyalbe ta jpat ta jxocon, ac'u mi oy chopol. “Le'e jlo'lovanej”, ac'u mi xi jc'oplal, pero ta onox xvinaj ti yech li c'usi chcale. 9 Ac'u mi chalic ti muc much'u ta xch'un li c'usi chcale, pero ep xa much'utic ixch'unic. Ac'u mi snopojic ti chismilique, pero cuxulon to. Ac'u mi chalic ti chiyac'be castico ti Rioxe, pero muc bu chiyac'be. Naca no'ox chisp'ijubtas, mu'nuc chismil. 10 Ac'u mi chalic ti chcat co'one, pero jun co'on scotol c'ac'al. Ac'u mi toj me'onon chiyilic, pero ep xa much'utic icac'be sc'ulejalic ya'el scuenta sbatel osil. Ac'u mi ch'abal c'usuc cu'un chiyilic li' ta sba balamile, pero jc'ulejon chca'i yu'un ja' chiyac'be ti Cajvaltique.

11 Vo'oxuc ti ach'unojic sc'op Riox ta Corintoe, jamal lacalbeic scotol li c'usitic ta jnope, ti c'u x'elan co'one. 12 Mu c'usi ti muc xacalbeique. Pero li vo'oxuque muc bu más ac'anojicon. 13 Li vo'oxuque co'ol xchi'uc jch'amaloxuc chca'i, yech'o un ja' tsc'an ti chac'anicon uque.

14 Mu me c'usi co'ol xanop xchi'uc li much'utic mu to ta xch'unic li sc'op Rioxe. Ja' no'ox yech noxtoc, mu me xanupun achi'uquic. Yu'un li much'utic lec xa yo'onique ma'uc yech ta snopic chac c'u cha'al ta snopic li much'utic chopol sjolique. Ja' chac c'u cha'al li sac osile ti ch'acal xchi'uc li ic' osile. 15 Ja' no'ox yech ti Cristoe mu co'oluc sjolic xchi'uc ti pucuje. Yech'o un mu co'oluc joltic xchi'uc ti much'utic mu to ta xch'unic li sc'op Rioxe. 16 Ja' chac c'u cha'al ti parte yeclexail ti santoetique, parte noxtoc stemplo ti Rioxe. Li vo'otique stemplootic Riox ya'el ti cuxul ta sbatel osile. Yu'un yech onox yaloj ti Rioxe: