2 Vo'oxuc ti ma'uc j'israeloxuque, ana'ojic ti c'alal mu to'ox chach'unic li sc'op Rioxe, ach'unojic to'ox lo'loel, avich'ic to'ox ta muc' li santoetique ti mu cuxlicuque. Ti butic santoal la'albatic sc'oplale ach'unic. 3 Yech'o un ja' xa ta jc'an ti mu xach'unic lo'loele. Ti much'utic chopol c'usi chalbeic ti Jesuse, yu'un muc bu chi'inbilic yu'un ti Ch'ul Espíritue. Ti much'utic chich'ic ta muc' ti Jesuse, yu'un chi'inbilic yu'un ti Ch'ul Espíritue.

4 Stosoltosol ti c'usi ac'bilotic o ta jpastique, pero jun no'ox ti much'u chaq'ue, ja' ti Ch'ul Espíritue. 5 Stosoltosol chitunotic jujuntal, pero jun no'ox ti much'u chispasotic ta mantale, ja' ti Jesuse. 6 Stosoltosol ti c'usi chiscoltaotic ta spasel ti Rioxe, pero ja' onox tspas scotol ti stuque. 7 Ti c'usi chac' jpastic jujuntal ti Ch'ul Espíritue, ja' yo' co'olco'ol jcolta o jbatique. 8 Li jlome chalic c'u x'elan smelol li sc'op Rioxe yu'un ja' yech ac'bilic yu'un ti Ch'ul Espíritue. Li jlome chalic c'u x'elan xch'unojic li sc'op Rioxe yu'un ja' yech ac'bilic yu'un ti Ch'ul Espíritue. 9 Li jlome ch-ac'bat xch'unic más yu'un ti Ch'ul Espíritue ti chcoltaatic yu'un ti Cajvaltique. Li jlome chet'esic chamel yu'un ja' yech ac'bilic yu'un ti Ch'ul Espíritue. 10 Li jlome chaq'uic iluc slequilal syu'elal Riox. Li jlome chalic ti c'usi ch-albatic yu'un ti Rioxe. Li jlome chilic cha'iic mi Riox, mi pucuj p'ijubtasbil o ti much'u tspas c'usi tspase, chal c'usi chale. Li jlome chc'opojic ta ora ta yan o c'op. Li jlome ta sjelubtasbe sc'op ti much'u chc'opoj ta ora ta yan o c'ope. 11 Ti c'usitic tspas cu'untic jujuntale yu'un ja' yech chac' jpastic ti Ch'ul Espíritue, ja' ti c'u x'elan lec chil stuque.

12 Ja' chac c'u cha'al li vo'otique ti ep ta tos li c'usitic oy cu'untique; oy coc jc'obtic, oy jsatic. Ja' no'ox yech, ac'u mi epotic, pero junotic ta stojol ti Cristoe. 13 Ac'u mi jurio, ac'u mi ma'uc, ac'u mi mozoinbil, ac'u mi ch'abal, jun chiyilotic ti Cristoe yu'un jun ti Ch'ul Espíritu xchi'inojotic ta jcotoltique.

14 Li vo'otique oy coctic, oy jc'obtic, oy jsatic. Mu jtosuc no'ox, yech'o ti stac' xi'abtejotique. 15 Ti sna'uc c'opojuc li coctique: “Lavi ma'uc c'obilone, mu c'u jtu”, ti xiuque, pero mu xu' ti ch'abale. 16 Ti sna'uc c'opojuc li jchiquintique: “Lavi ma'uc satilone, mu c'u jtu”, ti xiuque, pero mu xu' ti ch'abale. 17 Ti c'ajomuc jsatic oye, mu c'usi xca'itic ti yechuque. Ti c'ajomuc jchiquintic oye, mu c'usi xca'ibetic yic' ti yechuque. 18 Yech'o un ti Rioxe ja' tey iyac' ti bu xc'ot o chile, stosoltosol chtun. 19 Ti jtosuc no'oxe, mu c'u stac' jpastic ti yechuque. 20 Yech'o un ep ta tos li c'usitic oy cu'untique, pero junotic no'ox.

21 Li jsatique “mu c'u xatun o cu'un”, mu xu' xut li jc'obtique. Ja' no'ox yech li joltique, “mu c'u xatun o cu'un”, mu xu' xut li coctique. 22 Ac'u mi mu c'u stu yilel jtosuc, pero mu xu' ti ch'abale. 23 Ti bu mu jc'antic xvinaje, ta jlap jc'u'tic yo' mu xiq'uexavotic oe. 24 Ti bu mu persauc sc'u'ulale, teyuc t'anetuc noxtoc. Yu'un ja' yech spasojotic ti Rioxe ti persa oy sc'u'ulal ti bu chiq'uexavotic oe. 25 Ti x'elan lispasotic ti Rioxe, ja' yo' scolta o sbaic li c'usitic oy cu'untique, mu'nuc chopol chil sbaic. 26 Mi oy bu c'ux jset'uque, c'ux chca'itic ta junlejtic. Yan mi oy c'usi lec ista jtosuque, lec chca'itic ta junlejtic.

27 Lavie spat xoconotic xa ya'el ti Cristoe, yech'o un oy jtutic jujuntal. 28 Oy much'utic más tsots yabtel ta stojolic ti much'utic xch'unojic li sc'op Rioxe, vo'oticotic li apoxtoloticotique. Li xcha'tosole, ja' ti much'utic chalic ti c'usi ch-albatic yu'un ti Rioxe. Li yoxtosole, ja' ti much'utic ta xchanubtasvanic ta sc'op Rioxe. Oy much'utic chaq'uic iluc slequilal syu'elal Riox. Oy much'utic chet'esic chamel. Oy much'utic chcoltavanic ta spasel li c'usi tsc'an pasele. Oy much'utic chnitvanic ta spasel c'usi tsc'an ti Rioxe. Oy much'utic chc'opojic ta ora ta yan o c'op, chalic ti c'usi ch-albatic yu'un ti Rioxe. 29 Mu jcotolticuc apoxtolotic. Mu jcotolticuc oy c'usi chiyalbotic ti Rioxe ti chcaltic a'yuque. Mu jcotolticuc ti jchanubtasvanejotic ta sc'op Rioxe. Mu jcotolticuc ti chcac'tic iluc slequilal syu'elal ti Rioxe. 30 Mu jcotolticuc chquet'estic chamel. Mu jcotolticuc chic'opojotic ta ora ta yantic o c'op. Mu jcotolticuc jna'tic sjelubtasel. 31 Yech'o un li vo'oxuque sjunul avo'onic xavalbeic ti Ch'ul Espíritue ti ja' ac'u yac' apasic ti bu más tsots sc'oplale. Vo'on chacalbeic ti c'usi más chitunotic oe.