Ja' li' yaloj ti ja' no'ox iyal a'yuc ti Pabloe ti vo'otic ta scoj jmultic ti icham ta cruz ti Cristoe
2
Vo'otic ti jchi'il jbatic ta xch'unel li sc'op Rioxe, ti c'alal ay cal ava'iic li sc'op Rioxe, ma'uc icac' avilic ti p'ijone, ti lec jna' xic'opoje. 2 Ijnop ti mu c'usi yan chacalbeique, ti ja' no'ox chacalbeic ti vo'otic ta scoj jmultic ti icham ta cruz ti Jesucristoe. 3 Ti c'alal ijva'an jba ta atojolique, mu c'usi xul ta jol ica'i. Xit'elt'on xa ta xi'el mi ma'uc yech smelol xbat cu'un sc'oplal ti Cristoe. 4 Ti c'alal ical ava'iic li sc'op Rioxe, ma'uc ta jp'ijil jtuc ti lajchanubtasique. Ja' lisp'ijubtas ti Ch'ul Espíritue ti x'elan lacalbeique. 5 Yech'o un ma'uc ta sp'ijil crixchano ach'unic li sc'op Rioxe. Ta syu'el Riox ach'unic.Ja' li' yaloj ti ja' chiyalbotic ti Ch'ul Espíritue ti c'usi tsnop ti Rioxe
6 Li sc'op Riox chcalticotique oy bu mu xvinaj smelol. Ja' no'ox cha'ibeic smelol ti much'utic xch'unojic xa leque. Yu'un mu xco'olaj xchi'uc c'usi tsnop li crixchanoetic li' ta sba balamile. Mu xco'olaj xchi'uc c'usi tsnop li jyu'eletique. Yu'un sna' xchamic. 7 Li sc'op Riox chcalticotique, ja' ti c'usi vo'ne snopoj ti Rioxe ti c'alal ch'abal to'ox li vinajel balamile. Mu to'ox much'u sna'. Lavie liyalbotic xa ti Rioxe ti chac' jcuxlejaltic ta sbatel osil mi chquich'tic ta muc' ti Jesucristoe. 8 Ti jyu'eletique mi jun muc sna'ic. Ti isna'icuc ti oy slequilal syu'elal ti Jesucristoe, muc bu ismilic ti yechuque. 9 Ts'ibabil onox ta sc'op Riox:
Lec tajmec c'usi jnopoj ta jcha'leic ti much'utic chisc'anique.
Muc much'u yiloj, muc much'u ya'yoj.
Mi jun crixchano mu xnop yu'un c'u x'elan,
xi ti Rioxe, xi ts'ibabil. 10 Ti c'usi vo'ne snopoj ti Rioxe, liyalbotic xa ti Ch'ul Espíritue. Yu'un ti Ch'ul Espíritue sna'oj scotol. Yiloj c'usi tsnop ti Rioxe.
11 Ja' yech chac c'u cha'al li vo'otique ti mu jna'be jbatic c'u x'elan co'ontique, jtuctic no'ox jna'ojtic c'u x'elan co'ontic. Ja' no'ox yech uc, muc much'u sna'be c'u x'elan yo'on ti Rioxe. Ja' no'ox sna'oj ti Ch'ul Espíritue ti jun xchi'uque. 12 Ti Ch'ul Espíritu xchi'inojotique ja' tey liquem tal yo' bu ti Rioxe, mu li'uc ijtatic ta sba balamile. Yech'o ti chiyalbotic ti c'usi snopoj Riox chiyac'botique. 13 Yech'o un ti c'alal chichanubtasvanoticotique, ja' chisp'ijubtasoticotic ta yalel ti c'usi chcalticotic a'yuque. Mu jtucticoticuc ta jnopticotic li c'usi chcalticotic a'yuque. Ti much'utic chi'inbilic xa yu'un ti Ch'ul Espíritue lec xa'ibeic smelol li c'usi chcalticotique. 14 Yan ti much'utic mu to ta xchi'inatic yu'un ti Ch'ul Espíritue ti jun xchi'uc ti Rioxe, mu xa'ibeic smelol. “Mu c'usi bal o”, xiic, ja' ti mu xa'ibeic smelole. Ja'to mi ichi'inatic yu'un ti Ch'ul Espíritue cha'ibeic smelol. 15 Ti much'utic chi'inbilic xa yu'un ti Ch'ul Espíritue mu c'usuc no'ox xch'unic. Ti much'utic mu to ta xchi'inatic yu'un ti Ch'ul Espíritue, mu sna'ic c'u yu'un ti mu c'usuc no'ox xch'unic ti much'utic chi'inbilic xa yu'un ti Ch'ul Espíritue. 16 Ja' chac c'u cha'al ts'ibabil ta sc'op Rioxe: “Muc much'u sna' ti c'usi tsnop ti Rioxe. Muc much'u xu' chchanubtas”, xi ts'ibabil. Yan li vo'otique ti xchi'inojotic xa ti Ch'ul Espíritue, ti co'ol c'usi ta jnoptic xchi'uc ti Cristoe, jna'ojtic c'usi tsnop ti Rioxe.