Ja' li' yaloj ti ic'ot ta Malta balamil ti Pabloe
28
Ti c'alal liloc'oticotic ta ti'mare, ica'iticotic ti Malta sbi li balamil yo' bu lic'ototicotique. Tey ta o'lol mar. 2 Ti crixchanoetic tey nacale lisc'uxubinoticotic, istsoyic c'oc' ta ora yu'un tol sic, yu'un ja'o chac' vo'.―La' c'atinan acotolic ―xiic.
3 Li Pabloe ba stsob tal vach', iyac' ta c'oc'. Tey capal tal ta vach' jcot quiletel chon. C'alal iya'ibe sq'uixnal ti c'oq'ue, iloc' ti chone, iti'bat sc'ob li Pabloe. 4 C'alal iyil ti crixchanoetique ti ilaj ta chon li Pabloe ―Li vinic li'i yu'un jmilvanej, yech'o ti iti'e ta chone. Ac'u mi iloc' to li ta mare, pero chcham onox ―xut sbaic.
5 Li Pabloe islilin ochel ta c'oc' li chone. Pero mu c'usi ispas o. 6 Ismalaic mi ta sit sc'ob li Pabloe, mi ta xcham o ta ora. Jal ismalaic pero iyilic ti mu c'usi icha'leate.
―Riox nan li'i ―xiic xa.
7 Ti yo' bu ijtsob jbaticotique tey nopol nacal ti preserente ta Maltae, Publio sbi. Liyic'oticotic ochel ta sna. Oxib c'ac'al lismac'linoticotic. Jun yo'on tajmec ti teoticotique. 8 Ti stot ti Publioe ip, puch'ul ta stem. Tilem, cha'i simnac'al. Li Pabloe och sq'uel, isc'oponbe Riox, iyac' sc'ob ta sba, i'ech' o li chamele. 9 C'alal iya'i ti much'utic tey nacal ta Maltae ti lec xa ti stot Publioe, ital scotol ti much'utic ip teyo'e, i'et'esbat xchamelic yu'un li Pabloe. 10 Ep iyac' jmotonticotic. C'alal li'ochoticotic ech'el ta barco noxtoque, liyac'boticotic ech'el ti c'usitic chtun cu'unticotic ta bee.
Ja' li' yaloj ti ic'ot ta Roma ti Pabloe
11 Oxib u tey lipajoticotic ta Maltae. Ts'acal to li'ochoticotic ech'el ta yan barco liquem tal ta jteclum Alejandría. Yu'un tey ta smala ta x'ech' corixmatic ta Malta uque. Oy chib sloc'ol yajsantoic ta sni' ti barcoe. Ti june Cástor sbi. Ti june Pólucs sbi. 12 Lic'ototicotic ta jun jteclum, Siracusa sbi. Tey lipajoticotic oxib c'ac'al. 13 Liloc'oticotic ta Siracusae, ta ti'ti'mar libatoticotic. Tey lic'ototicotic ta jun jteclum, Regio sbi, ta estado Italia. Ta yoc'omal ital tsots ic' ta xocon vinajel ta sur, lixujoticotic ech'el. Ta chib no'ox c'ac'al lic'ototicotic o ta jun jteclum, Puteóli sbi, tey no'ox ta estado Italia. Tey liloc'oticotic ta barco. 14 Tey ijtaticotic jayvo' ti much'utic xch'unoj li sc'op Rioxe.
―Pajanic vucubuc c'ac'al ―xiyutoticotic.
Ts'acal to libatoticotic ta Roma. Ta coc xa libatoticotic. 15 Ti much'utic xch'unoj sc'op Riox ta Romae, iya'iic ti po'ot xa xic'ototicotique. Oy tal snupoticotic ta ch'ivit Apio sbi. Oy tal snupoticotic yo' bu Oxp'ej Na sbie. C'alal iyil li Pabloe ti tal nupvanicuc ti much'utic xch'unoj li sc'op Rioxe, itsatsub yo'on, xmuyubaj xa. “Coliyal Riox”, xi. 16 C'alal lic'ototicotic ta Romae, ti capitan solteroe iyac'be entrucal scotol jchuqueletic ti totil soltero ta Romae. Li Pabloe i'albat ti xu' tsloc' jp'ejuc na slecoje, pero chabibil onox ta jun soltero.
Ja' li' yaloj ti iyal a'yuc sc'op Riox ta Roma ti Pabloe
17 Yoxibal xa'ox c'ac'al sc'otel ta Roma li Pabloe, istac ta iq'uel ti much'utic más ich'bilic ta muc' yu'un ti xchi'iltac ta jurioal tey ta Romae. Ti c'alal istsob sbaique, lic c'opojuc li Pabloe:
―Jchi'iltactic, mu c'usi chopol jpasojbe li jchi'iltactique. Muc bu ical ti chopol scostumbreic ti vo'ne moletique. Pero ti jchi'iltactic ta Jerusalene liyaq'uic entrucal ta sc'ob li jromaetic ti tey ochemic ta coviernoale. Yech'o ti lichuque tal li'toe. 18 C'alal lismeltsanbeic jc'oplal ti coviernoetique, muc bu listabeic jmul ti chimile oe, ta xa'ox xiscoltaic. 19 Yu'un ti mu xicta sbaic ta stiq'uel jmul ti jchi'iltactique, solel ical ti ac'u smeltsanbon jc'oplal li preserente César li'toe. Pero mu'nuc tal jtic'beic smul ti jchi'iltactique. 20 Ti lajtaquic ta iq'uele, yu'un ta jc'an chajc'oponic. Ti li' chuculon ta carina chavilique, yu'un jch'unoj ti tspas xa ta mantal crixchanoetic ti much'u jmalaojtic ta xtale, ja' ti Jesuse ―xi li Pabloe.
21 ―Muc bu ists'ibaic tal ac'oplal ta vun ti jchi'iltatic ta Judeae. Mi ja'uc jun, muc much'u ay yal ti oy amul yu'unique. 22 Pero ta jc'an chca'ibeticotic smelol ti c'usi ach'unoje yu'un chalic li crixchanoetique ti chopole ―xiic ti moletique.
23 Ixch'acbeic sc'ac'alil ti c'usi ora ta xtalique. Ti c'alal ic'ot sc'ac'alile, ep ic'otic yo' bu isloc' na li Pabloe. Li Pabloe iyalbe ya'iic ti tspas xa ta mantal crixchanoetic ti much'u st'ujoj ti Rioxe, ja' ti Jesuse ti i'ay xae. Iyal ti ja' onox sc'oplal ti Jesuse ti ists'iba comel ti Moisese xchi'uc ti yan yaj'alc'optac Riox ti ta vo'nee, yo' xch'unic oe. Sob istambe yalel, ja'to ilaj c'alal ich'ay c'ac'ale. 24 Oy jlom ixch'un ti c'usi iyal li Pabloe; oy jlom muc xch'un. 25 Yu'un ti muc xch'un scotolique, c'alal chbatic xa'oxe, i'albatic yu'un li Pabloe:
―Yu'un onox yech ti c'usi i'albatic ti vo'ne moletique c'alal ich'amunbat ye yu'un Ch'ul Espíritu ti Isaías yaj'alc'op Rioxe:
Batan, ba albo ya'i lachi'iltaque:
Ja' yech liyalbe ti Rioxe:
26 Ep to ta ech'el cha'iic lachi'iltaque pero mu xa'ibeic smelol.
Ep to ta ech'el chilic, pero co'ol xchi'uc mu xilic.
27 Yu'un stoyoj sbaic.
Yu'un mu sc'an xictaic spasel li c'usitic chopole,
yech'o ti mu xcac' cuxlicuc ta sbatel osile,
xi ti Rioxe, xavut lachi'iltaque, x'utat onox ti Isaíase. 28 Chacalbeic. Lavie ja' xa chich' albel ti much'utic ma'uc jchi'iltique ti ja' no'ox chac' jcuxlejaltic ti Jesucristoe. Ja' ta xch'unic ―xi li Pabloe.
29 Ti c'alal laj yal li Pabloe, ibat ti xchi'iltaque. Xalxalbe xa sbaic ech'el.