Ja' li' yaloj ti iyilbajin ti much'utic yich'ojic ta muc' Cajvaltic Jesús ti Sauloe
8
Li Sauloe ―Más lec ti ichame ―xi la uc. Lic la yilbajin ti much'utic yich'oj ta muc' Cajvaltic Jesucristo ta Jerusalene. Istani la sbaic ta scoj ti ilbajinele. Ti jlome istani la sbaic ta sjunlej estado Judea. Ti jlome ibatic la ta estado Samaria. Stuquic xa la tey icomic ta Jerusalén li apoxtoletique. 2 Oy la jayvo' viniquetic ti sjunul yo'on yich'ojic ta muc' ti Rioxe, ja' la ba smuquic ti Estebane. Iyoq'uitaic la tajmec. 3 Li Sauloe yo'onuc la xch'aybe sc'oplal ti much'utic yich'ojic ta muc' ti Jesuse. I'och la ta naetic, istsac la loq'uel ti viniquetique xchi'uc ti antsetique, istic' la ta chuquel.Ja' li' yaloj ti iyal sc'op Riox ta Samaria ti Felipee
4 Ti much'utic istani sbaique, buyuc no'ox la iyalic a'yuc ti ja' chac' jcuxlejaltic ta sbatel osil ti Cajvaltic Jesuse. 5 Ti Felipee tey la ibat ta jun jteclum ta estado Samaria. C'ot la yalbe ti crixchanoetique ti i'ay xa ti much'u st'ujoj Riox tspasvan ta mantale, ja' ti Cristoe. 6 Ti crixchanoetic teyo'e istsob la sba scotolic, tal la ya'iic c'usi chal ti Felipee. Ti c'alal iyilic ti ep ta ech'el iyac' iluc slequilal syu'elal Riox ti Felipee, ts'ijajtic xa la cha'iic ti c'usi iyale. 7 Ti much'utic ochem pucuj ta yo'onique isloq'uesbe la. Ti c'alal iloc' ti pucujetique, tsots la i'avanic. Ti much'utic alubem jun yoc sc'obe xchi'uc ti coxoetique, ilecubic la. 8 Xmuyubajic xa la scotol ti crixchanoetic tey ta jteclume.
9 Tey la jun vinic, Simón la sbi. J'ilol to'ox la, sna' la májico noxtoc. Ep la islo'lo crixchanoetic tey ta Samariae yu'un la iyal ti oy syu'el uque. 10 Scotol crixchanoetic, ta biq'uit ta muc', iyich'ic la ta muc' ti j'ilole.
―Li vinic li'i co'ol syu'el xchi'uc ti Rioxe ―xiic la.
11 Ja' xa la yich'ojic ta muc' ti j'ilole yu'un la vo'ne xa lic lo'loaticuc. 12 Pero c'alal i'albatic yu'un ti Felipee ti ja' st'ujoj Riox chispasotic ta mantal ti Jesuse, ti ja' istoj jmultique, ep la viniquetic, ep la antsetic ixch'unic. Ti ixch'unique, i'ac'bat la yich'ic vo' yu'un ti Felipee. 13 Ixch'un la ti Simón uque, iyich' la vo' uc, ja' la ixchi'in ech'el ti Felipee. C'alal iyil ti ep ta ech'el iyac' iluc slequilal syu'elal Riox ti Felipee, xch'ayet xa la yo'on.
14 C'alal iya'i li apoxtoletic ta Jerusalene ti ixch'unic xa c'usi yaloj Cajvaltic Jesucristo li jsamariaetique, itaqueic la ech'el ta Samaria li Pedroe xchi'uc li Juane. 15 Ti c'alal ic'otique, isc'oponbeic la Riox ti jaylajunvo' ixch'unique yo' la xchi'ineic o yu'un ti Ch'ul Espíritu uque. 16 Yu'un la mu to'ox bu chi'inbilic yu'un ti Ch'ul Espíritue, ja' no'ox la ti yich'ojic xa vo' ta scuenta ti Cajvaltic Jesucristoe. 17 Li Pedroe xchi'uc li Juane iyac' la sc'obic ta sjol jujun ti much'utic ixch'une, ja' la ichi'ineic o yu'un ti Ch'ul Espíritue.
18 C'alal iyil ti Simone, yo'onuc xa la yac'be taq'uin li apoxtoletique.
19 ―Ac'becon jyu'el yech uc yo' xich'ic o cu'un Ch'ul Espíritu li much'utic ta xcac' jc'ob ta sjolic uque ―xi la.
20 ―Batan ta c'oc' xchi'uc lataq'uine yu'un chaval ti stac' manel ti Ch'ul Espíritue ti chac' jchi'intic ti Rioxe. 21 Li vo'ote mu xu' chatun yu'un ti Rioxe yu'un yiloj ti chalo'lovane. 22 Ictao xa spasel li c'usitic chopole. C'opono Riox, jq'ueltiquic mi xa'ac'bat to pertonal yu'un li c'usi chopol chanope. 23 Yu'un chavac' o sc'ac'al avo'on chquil ti oy jyu'elticotique. Tiq'uilot to ta mulil ―x'utat la yu'un li Pedroe.
24 ―C'oponbecon Riox che'e naca me ochicon ta c'oc' ta sbatel osil chac c'u cha'al avalbone ―xi la ti Simone.
25 Li Pedroe xchi'uc li Juane, c'alal laj yalbeic crixchanoetic scotol ti c'u x'elan yilojbeic slequilal syu'elal ti Rioxe, xchi'uc ti c'alal laj yalic li sc'op Rioxe, isutic la ta Jerusalén. Ech' la yalic noxtoc ta jujun parajel ta estado Samaria ti ja' chac' jcuxlejaltic ti Jesuse.
Ja' li' yaloj ti iyalbe sc'op Riox jun j'etiopía ti Felipee
26 Ti Felipee ic'oponat la yu'un jun anjel ta vinajel:
―Batan ta xocon vinajel ta sur. Tey chanupbe li sbelel jteclum Gazae, ja' li be chlic tal ta Jerusalene ―x'utat la.
Li sbelel Gazae tey ch-ech' ta xocol balamil. 27 Ibat la ti Felipee. Tey la ista ta be jun j'etiopía. Ti yajpreserente j'etiopíaetique, ants la, Candace la sbi. Ti vinique pasbil la ta capón yu'un la ta x'abtej ta yabtel ti antse. Ja' la xchabiojbe staq'uin xchi'uc c'usuc yu'un ti antse. Ti vinique ay la yac'be smoton Riox ta Jerusalén. 28 Jsutel xa'ox la ech'el ti c'alal itae yu'un ti Felipee. Jun la yo'on chotol ech'el ta scarretaca'. Yolel la tsq'uel ech'el sc'op Riox ti ists'iba ti Isaíase.
29 ―Nopojan, chi'ino ech'el li vinic le'e ―x'utat la yu'un ti Ch'ul Espíritue.
30 Ti Felipee inopoj la. Iya'i la ti yolel ta sq'uel sc'op Riox ti ists'iba ti Isaías yaj'alc'op Rioxe.
―¿Mi xava'ibe smelol li vun chaq'uele? ―xut la ti vinique.
31 ―Mu xca'i yu'un muc much'u xiyalbe smelol ―xi la.
I'iq'ue la muyel ta carretaca' ti Felipee. Ixchi'in la ech'el ta chotlej.
32 Li sc'op Riox ti yolel ta sq'uele, ja' la yech chal:
Ch'an la xi ta milel chac c'u cha'al jcot ch'iom chij, mu la c'usi chal.
Ja' la chac c'u cha'al ch'an xi c'alal chloc'bat stsatsal li chije,
ja' no'ox la yech ti much'u chtal stojbotic jmultique,
mu la c'usi chal ti c'alal xmilee.
33 Abol la sba cu'untic yu'un la muc bu lec ta smeltsanbat sc'oplal.
Tsnopic la ti j'ech'el ta xch'ay o sc'oplal ti c'alal smilique,
xi la li sc'op Riox ti ta sq'uele.
34 ―Albon ca'i much'u sc'oplal ti li' ts'ibabile ―x'utat la ti Felipee―. ¿Mi sc'oplal stuc ti Isaíase, mi yan o? ―xi la.
35 ―Ja' sc'oplal ti Jesuse ―xut la ti Felipee.
―Q'uelavil, oy li' uc'ume. ¿Mi mu xu' xavac'bon quich' vo'? ―xi la ti vinique.
37 ―Mi j'ech'el ach'unoje, xu' ―xi la ti Felipee.
―Jch'unoj ti ja' Xch'amal Riox ti Jesucristoe ―xi la.
38 Ti vinique iyalbe la ti yajtijca'e ti ac'u spajes ti carretae. Ti vinique xchi'uc ti Felipee iyalic la, ibatic la ta uc'um. Iyich' la vo' ti vinique. 39 Ti c'alal iloq'uic tal ta uc'ume, ti Felipee i'iq'ue la ech'el yu'un ti Ch'ul Espíritue ti jun xchi'uc ti Cajvaltic Jesucristoe. Muc la x'ile bu ibat. Ti vinique jun la yo'on isut ta slumal ti ixch'un xa ti itojbat xa smul yu'un ti Cajvaltic Jesuse. 40 Ti Felipee tey la c'ot vinajuc ta jteclum Azoto. Tey to la lic xanavuc. Ti bu i'ech ta jujun jteclume, ech' la yal a'yuc ti ja' chac' jcuxlejaltic ti Cajvaltic Jesuse. Ibat la c'alal jteclum Cesarea.